قازاقستاننىڭ حالىق ءارتىسى تىلەكتەس مەيراموۆ ۇلى جەڭىس كۇنىنە ارناپ ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ساحناسىندا «مايدان اندەرى» مونوسپەكتاكلىن قويدى. جازۋشى روللان سەيسەنباەۆتىڭ اڭگىمەسىنىڭ جەلىسىمەن ساحنالانعان سپەكتاكلدى ليريكالىق دراما جانرىنا جاتقىزساق بولادى.
كەز كەلگەن سوعىستىڭ ادام جانىنا سالعان جاراسىنىڭ جازىلۋى ەكىتالاي. ەتىگىمەن سۋ كەشىپ, بەرلينگە دەيىن جەتكەن مايدانگەر سادىر بايبارىسوۆتىڭ دا ەكىنشى دۇنيەجۇزىلىك سوعىس كورىنىستەرى كوز الدىندا ءجيى كولبەڭدەپ, مازالايدى. سول كەزدە گەرمانيا جەرىندە وققا ۇشقان قارۋلاس دوسى گريگوري اۆيلوۆتى ساعىنادى. ال دنەپردەن وتكەندە ءفاشيستىڭ وعىنان جارالانىپ قالعان ورىس قىزىن تاۋىپ, جاراسىن تاڭعانى, سوسىن ارقالاپ بارىپ پارتيزاندارعا تاپسىرعانى جادىنان ماڭگى وشپەستەي بولىپ جازىلىپ قالدى. سونى ەسكە العان كەزدە اندەتىپ سالاتىنى بار. الايدا مايدان اندەرىن عانا شىرقايدى. سول كەزدە جاراسى ءسال جەڭىلدەگەندەي بولادى.
مونوسپەكتاكلدە «كەستەلى ورامال», «داريعا, سول قىز», «توس مەنى, توس», «ۆ زەمليانكە», «تەمنايا نوچ», «سيني پلاتوچەك», «دوروگي» سىندى باس-اياعى 10 شاقتى ءان ايتىلادى. سادىردىڭ ءرولى تىلەكتەس مەيراموۆتىڭ انشىلىك قىرىن اشقانىن ايتا كەتەيىك. بۇل بەينەنى ءارتىس اۋەزوۆ تەاترىندا جۇرگەندە العاش رەت ساحناعا الىپ شىعىپ, ساحنا ساڭلاعى ءازىربايجان
مامبەتوۆتىڭ ريزاشىلىعىن العان. ال «مايدان اندەرىنىڭ» استاناداعى پرەمەراسى وسىدان ەكى جىل بۇرىن ۇلى جەڭىستىڭ 70 جىلدىعى قارساڭىندا ءوتتى. ءبىر ساعاتقا جەتەر-جەتپەس قويىلىم ارقىلى اكتەر اتالار رۋحىنا تاعزىم ەتىپ, ءتىرى جۇرگەن مايدانگەرلەرگە قۇرمەت كورسەتتى. بۇل جولى مونوسپەكتاكلگە كەلگەن كورەرمەندەر دە نەگىزىنەن قارتتار بولدى. سپەكتاكل ولاردىڭ كوڭىلىنەن شىققان سياقتى. ايتەۋىر, ءبىز قويىلىم بىتكەندە كوپشىلىگىنىڭ كوزىنەن ءبىر مۇڭدى بايقادىق. شىندىعىن ايتقاندا, ەلىمىزدە سۇراپىل سوعىس وتى شارپىماعان وتباسى كەمدە-كەم. ءتىپتى, جوق تا شىعار. جەڭىس كۇندەرى مايدانگەر اتالارىمىزدى دا ءجيى ەسكە تۇسىرەمىز. كورەرمەن دە سپەكتاكلدى تاماشالاي وتىرىپ, سونداي سەزىمدى باستان كەشىرگەن شىعار…
امانعالي قالجانوۆ
