استانا قالالىق «نۇر وتان» پارتياسىنىڭ فيليالى سوعىس جانە تىلدا ەڭبەك ەتكەندەردى نازاردان تىس قالدىرماي, ۇنەمى قامقور قولىن سوزىپ كەلەدى. جىل سايىن وتەتىن «ارداگەرلەردى ارداقتايىق!» شاراسى اياسىندا نۇروتاندىقتار ارداگەرلەرمەن كەزدەسۋ, ولاردىڭ پاتەرلەرىنە بارىپ اڭگىمەلەسۋ, ءتۇرلى سىيلىقتار تاپسىرۋ سياقتى قامقورلىق شارالارىن تۇراقتى تۇردە جۇرگىزىپ كەلەدى. بيىل دا بۇل يگىلىكتى شارا قولعا الىندى.
اكتسيانىڭ العاشقى كۇنى «جاس وتان» جاستار قاناتىنىڭ مۇشەلەرى سوعىس ارداگەرلەرى سۇلەيمەن ايتقوجينوۆ, قۇرمانباي ايتجانوۆ, الەكساندر بالاكين, اۋباكىر قوجىمۇراتوۆ, سيحىمباي مامىروۆتاردىڭ ۇيلەرىندە بولىپ, جاستار قاريالاردىڭ اۋلاسىن تازارتىپ, ءۇي شارۋاسىنا جاردەمدەسىپ, ءتۇرلى سىيلىقتار تابىس ەتتى. جالپى, «جاس وتان» جاستار قاناتىنىڭ 50-گە جۋىق جاستارى ارداگەرلەر تۇراتىن كوشەنى, اۋلانى جەڭىس كۇنى قارساڭىندا تازارتىپ, قاريالاردىڭ العىسىن الىپ قايتتى.سوعىس جاۋىنگەرى سيحىمباي مامىروۆ جاستارمەن بولعان اڭگىمەسىندە قان مايداندى ەسىنە الدى. دنەپردە بولعان كەسكىلەسكەن ۇرىستا 1943 جىلى سول جاق جامباسىنان جاراقات العانىنا قاراماستان, جەڭىس ءۇشىن قاسىق قاندارى قالعانشا سوعىسقان ارداگەر سيحىمباي اتا 1944 جىلى سەۆاستوپولدە بومبا جارىلعاندا, توپىراق استىندا كومىلىپ قالعانىن ءالى كۇنگە دەيىن ۇمىتپايدى ەكەن. تانىنە تۇسكەن جارادان ەمەس, جانىن جارالاعان سول ءبىر سۇم سوعىستى بۇگىنگى ۇرپاقتارى كورمەسىن دەپ تىلەيدى ول.
– ەكىنشى دۇنيەجۇزىلىك سوعىستا ەرلىكتىڭ حاس ۇلگىسىن كورسەتكەن مايدانگەرلەردى ماداقتاۋ, ولاردىڭ الدىندا باس ءيىپ قۇرمەتتەۋ – بۇگىنگى ۇرپاقتىڭ بۇلجىماس پارىزىنا اينالۋى ءتيىس, – دەيدى «نۇر وتان» پارتياسى استانا قالالىق فيليالى توراعاسىنىڭ ءبىرىنشى ورىنباسارى ەدىل مامىتبەكوۆ. ۋاقىت وتكەن سايىن سول ءبىر سۇراپىل سوعىستىڭ كۋاگەرلەرى بولعان قاھارمانداردىڭ قاتارى سيرەپ بارادى. سوندىقتان دا ارداگەرلەردى ارداقتاۋدى بۇگىنگى جاستار ەشقاشان نازاردان تىس قالدىرماۋ كەرەك. راسىندا دا, قان مايداندا جاڭبىرداي جاۋعان وقتىڭ استىندا مۇز جاستانىپ, قار جامىلىپ, قانىن توككەن اتالارىمىز بەن تىلدا ارىپ-اشىپ ەڭبەك ەتكەن قاريالارىمىزدىڭ الدىندا ءبىز ومىرباقي قارىزدارمىز. ويتكەنى بۇلار – ارداقتى ارداگەرلەر.
