كەشە «ەكسپو-2017» كورمەسىندەگى مالايزيا پاۆيلونىندا ءبىلىم اپتالىعى باستالدى. 18 تامىزعا دەيىن جالعاساتىن شارا مالايزيا مەن قازاقستان ۋنيۆەرسيتەتتەرى اراسىندا تاجىريبە مەن ءبىلىم الماسۋ ايماعىنا اينالماق. سونىمەن قاتار, دەلەگاتتار مالايزيانىڭ جوعارى ءبىلىم بەرەتىن دۇنيەجۇزىلىك ورتالىقتاردىڭ بىرىنە اينالۋداعى تالپىنىسىن تانىستىرماق.
مالايزيا استاناسى كۋالا-لامپۋر قالاسىندا ءتۇرلى سالادا بىلىكتى مامان دايارلايتىن 50-دەن استام جوو بار. ولاردىڭ ارتىقشىلىقتارى مەن ەرەكشەلىكتەرى تۋرالى ءار جىلدارى الەمدىك باسىلىمداردا جاريالانىپ, ءتۇرلى رەيتينگتەردە ورنى كورسەتىلەدى. ماسەلەن, QS Worldwide Rankings 2015-2016 جىلعى رەيتينگكە سايكەس, كۋالا-لامپۋر ستۋدەنتتەر ءۇشىن ەڭ قولجەتىمدى قالا اتانعان. ال Study by British Council مالايزيالىقتارعا جوعارى حالىقارالىق ءبىلىم بەرۋ جۇيەسىندەگى ەڭ اشىق جۇيە دەگەن باعا بەردى. ايتا كەتەيىك, بۇگىنگى تاڭدا مالايزيادا 1000-عا جۋىق قازاقستاندىق ستۋدەنت ءبىلىم الىپ جاتىر. ال 2013-2017 جىلدار ارالىعىندا 7000-نان استام جاس مالايزيادان وقۋ وقىپ كەلگەن بولاتىن.
اپتالىق اياسىندا مالايزيانىڭ الدىڭعى قاتارلى وقۋ ورىندارىنىڭ پروفەسسورلارى مەن ستۋدەنتتەرى نازارباەۆ ۋنيۆەرسيتەتىندەگى ارىپتەستەرىمەن ءبىلىم جۇيەسىنە «جاسىل» ەكونوميكا تاقىرىبىن ەنگىزۋ تۋرالى كەلىسسوزدەر جۇرگىزەدى. ال بۇگىن, 15 تامىزدا, مالايزيادا ءبىلىم الۋعا نيەتتى شەتەلدىك تالاپكەرلەر قاجەتتى اقپاراتتى الا الادى. كەلەسى كۇنى «جاسىل تەحنولوگيالار تۋرالى حاباردار بولۋ» اتتى ستۋدەنتتىك فورۋم وتەدى. سونداي-اق, 18 تامىزدا دەلەگاتتار كەلەشەكتە ورنايتىن كوشەدەگى كەپتەلىستى بولجامداي وتىرىپ, ەلەكترلىك جاعىنان بەيتاراپ جارىقتى باسقارۋ جۇيەسىن تانىستىرادى. ال مالايزيا تەحنولوگيالىق ۋنيۆەرسيتەتىنىڭ وقىتۋشىسى دوكتور ابدۋل حاليم بين ابدۋللا ءبىلىم بەرۋ مەن وقىتۋداعى يننوۆاتسيالىق ادىستەر تۋرالى بايانداپ بەرەدى.
گۇلدانا
تالعاتقىزى
