ءا. مامبەتوۆ اتىنداعى مەملەكەتتىك دراما جانە كومەديا تەاترىندا كسرو حالىق ءارتىسى, كسرو جانە قاز كسر مەملەكەتتىك سىيلىقتارىنىڭ لاۋرەاتى, حالىق قاھارمانى ءازىربايجان مامبەتوۆتىڭ 90 جىلدىعىنا ارنالعان ەسكە الۋ كەشى ءوتتى. شارا بارىسىندا ساحنا ساردارىنىڭ وتباسى مۇشەلەرىمەن, بىرگە قىزمەت ىستەگەن تەاتر جانە ونەر قايراتكەرلەرىمەن, شاكىرتتەرىمەن شىعارماشىلىق كەزدەسۋ ۇيىمداستىرىلدى.
كەش وزگەشە فورماتتا وتكىزىلدى. سۇحباتتار جانە ينتەراكتيۆتى ويىندارعا كەزدەسۋ قوناقتارى ءا.مامبەتوۆتىڭ جارى قازكسر حالىق ءارتىسى, قازاق ۇلتتىق ونەر ۋنيۆەرسيتەتىنىڭ پروفەسسورى قورلان قاليلامبەكوۆا, نەمەرەسى كارينا يزمايلوۆا, كۇيەۋ بالاسى نۇرلان يزمايلوۆ, قىزى دينا مامبەتوۆا قاتىستى. سونىمەن قاتار قازاقستاننىڭ حالىق ارتىستەرى تىلەكتەس مەيراموۆ پەن گۇلجان اسپەتوۆا, رىمكەش ومارحانوۆا, نۇركەن وتەۋىلوۆ, قۋاندىق قىستىقباەۆ, سىرىم قاشقاباەۆ, التىناي نوگەربەك, نۇرلان جۇمانيازوۆ, بەكبولات قۇرمانعوجاەۆ, مۇرات ماقسۇتوۆ, بەيبىت باحتىگەرەەۆ, رەجيسسەر ءومىرىنىڭ سوڭعى جىلدارى ەڭبەك ەتكەن. ق.قۋانىشباەۆ اتىنداعى قازاق مەملەكەتتىك اكادەميالىق مۋزىكالىق دراما تەاترىنىڭ ديرەكتورى ايبولات ءجاۋدىر, مۋزىكالىق جاس كورەرمەن تەاترىنىڭ ديرەكتورى اسحات ماەميروۆ, «جاستار» تەاترىنىڭ كوركەمدىك جەتەكشىسى نۇرقانات جاقىپباي, جانقالدىبەك تولەنباەۆ, لەيلو بەكنازارقىزى حانينگا, امانتاي جۇماشەۆ, اقىش ومار ەستەلىكتەرىمەن ءبولىستى.
گۇلجان اسپەتوۆا قۇرمانعازى اتىنداعى كونسەرۆاتوريانى بىتىرەردە ديپلومدىق جۇمىسىندا قاراگوزدى وينادى. كوميسسيا توراعاسى ءازىربايجان ءماديۇلى بولدى. ايگىلى رەجيسسەر اسپەتوۆانىڭ ويىنىنا ءتانتى بولىپ, م.اۋەزوۆ تەاترىنا جۇمىسقا شاقىردى. كەيىننەن تەاتردا «قاراگوزدى» قويعاندا وسى ءرولدى وعان بەردى. 1999 جىلى ءازىربايجان مامبەتوۆ ەلباسىنىڭ شاقىرۋىمەن ق.قۋانىشباەۆ اتىنداعى تەاترعا باس رەجيسسەر بولىپ كەلدى. سول كەزدە الماتىدان ءبىرىنشى شاقىرعان ارتىستەردىڭ ءبىرى – گۇلجان اسپەتوۆا. اكتريسا باستاپقىدا رەجيسسەردىڭ كومەكشىسى بولىپ, كەيىننەن ءازىربايجان ءماديۇلى ساحنالاعان سپەكتاكلدەردە كەيىپكەرلەردى سومدادى. اكتريسا سول كەزدەر تۋرالى اڭگىمەلەدى.
ءازىربايجان مامبەتوۆ 4-كۋرستا وقىپ جۇرگەن تىلەكتەس مەيراموۆقا عابيت مۇسىرەپوۆتىڭ «قوزى كورپەش–بايان سۇلۋ» تراگەدياسىنداعى باستى كەيىپكەر – قوزى ءرولىن سەنىپ تاپسىردى. اكتەردىڭ استاناعا قىزمەت اۋىستىرىپ, قاللەكي تەاترىنا تەز ءسىڭىسىپ كەتۋىنە دە ءازىربايجان ءماديۇلىنىڭ كومەگى زور بولدى. وسىنى ايتقان اكتەر ءازىربايجان مامبەتوۆ باس قالاعا اۋىسىپ كەلگەندە مۇحتار اۋەزوۆ تەاترىنداعى تاماشا ءداستۇر مەن سىيلاستىقتى, ادامي قارىم-قاتىناستى, ايرىقشا ءبىر جىلىلىقتى وزىمەن بىرگە قاليبەك قۋانىشباەۆ تەاترىنا دا الا كەلگەنىن, سول قاسيەتتى ۇجىم بويىنا سىڭىرگەنىن جەتكىزدى.
كەزدەسۋ بارىسىندا كەش قوناقتارىنا سۇراقتار قويىلىپ, وتباسىلىق جەكە مۇراعاتتان بەينەجازبالار كورسەتىلدى. بيىل 22-30 قازان ارالىعىندا ەلوردادا وتەتىن «TEATRALL» ءىى حالىقارالىق تەاتر فەستيۆالى ءازىربايجان مامبەتوۆتىڭ 90 جىلدىعىنا ارنالاتىنى ايتىلدى.
