مەملەكەت باسشىسى نۇرسۇلتان نازارباەۆ مالايزيا پرەمەر-ءمينيسترى نادجيب تۋن رازاكپەن كەزدەسىپ, ساۋدا-ەكونوميكالىق, ينۆەستيتسيالىق, يندۋستريالىق-يننوۆاتسيالىق جانە مادەني-گۋمانيتارلىق سالالارداعى ەكىجاقتى ىنتىماقتاستىق اياسىن كەڭەيتۋدىڭ نەگىزگى باعىتتارىن تالقىلادى دەپ حابارلادى پرەزيدەنتتىڭ ءباسپاسوز قىزمەتى.
سونداي-اق, نۇرسۇلتان نازارباەۆ پەن نادجيب تۋن رازاك حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى.
قازاقستان پرەزيدەنتى مالايزيا پرەمەر-مينيسترىنە ساپارمەن كەلگەنى, سونداي-اق استانا ەكونوميكالىق فورۋمىنا قاتىسىپ, ونىڭ دەڭگەيىن كوتەرۋگە ىقپال ەتكەنى ءۇشىن العىس ايتتى.
– سوڭعى ءۇش جىلدا ءبىز ءۇش رەت كەزدەستىك, بۇل ەلدەرىمىز اراسىنداعى قارىم-قاتىناستى جانداندىرۋعا سەرپىن بەرەدى. بىلتىر كورسەتكىشتەردىڭ 14%-عا ارتقانىنا قاراماستان, 130 ميلليون دوللار تاۋار اينالىمى كولەمىنىڭ جەتكىلىكسىز ەكەنىن ايتقان ءجون. بۇل باعىتتا بىزدە زور پەرسپەكتيۆا بار. ەلدەرىمىزدىڭ جانە جەكە ءوزىمىزدىڭ ارامىزدا قالىپتاسقان دوستىق پەن ءوزارا تۇسىنىستىك قارىم-قاتىناس ءسىزدىڭ ساپارىڭىزدى ەكىجاقتى ىنتىماقتاستىق ءۇشىن پايدالى بولادى دەپ ايتۋعا مۇمكىندىك بەرەدى, – دەدى مەملەكەت باسشىسى.
ءوز كەزەگىندە نادجيب تۋن رازاك فورۋمعا قاتىسۋعا عانا ەمەس, رەسمي ساپارمەن كەلۋگە دە شاقىرعانى ءۇشىن نۇرسۇلتان نازارباەۆقا العىسىن ايتتى.
– ماعان استانا ەكونوميكالىق فورۋمىنىڭ اشىلۋ ءراسىمى ۇلكەن اسەر قالدىردى. وعان وسىنشا كوپ ادامنىڭ قاتىسۋى شارانىڭ بەدەلى قانشالىق وسكەنىن كورسەتەدى. وسىنداي فورۋم وتكىزۋ ارقىلى وزەكتى حالىقارالىق ماسەلەلەردىڭ تالقىلانۋىنا ءسىزدىڭ قوسىپ وتىرعان ۇلەسىڭىزدى اتاپ ايتقىم كەلەدى, – دەدى مالايزيا پرەمەر-ءمينيسترى.
نادجيب تۋن رازاك بىرقاتار سالالارداعى ىنتىماقتاستىقتىڭ دەڭگەيى ءوسىپ كەلە جاتقانىن, ول بۇعان دەيىنگى كەزدەسۋلەر بارىسىندا مەجەلەنگەن ۋاعدالاستىقتاردى جۇزەگە اسىرۋعا وڭ ىقپال ەتىپ وتىرعانىن اتاپ ءوتتى. سونداي-اق, ول ساۋدا-ەكونوميكالىق ىنتىماقتاستىقتى جانداندىرۋ ءۇشىن كولىك-لوگيستيكا سالاسىنداعى مۇمكىندىكتەردى كەڭەيتۋدىڭ ماڭىزدىلىعىنا توقتالدى.
مالايزيا پرەمەر-ءمينيسترى ءوزارا ءىس-قيمىلدى مەملەكەتارالىق دەڭگەيمەن قاتار حالىقارالىق قۇرىلىمدار اياسىندا دا نىعايتۋدىڭ ءمان-ماڭىزىنا نازار اۋداردى.
