وسىدان ءبىراز جىلدار بۇرىن جاپون پسيحولوگتارى قىزمەتكەرلەردىڭ جان كۇيزەلىسىن, بويىنداعى سترەستى جويۋ ءۇشىن باستىعىنىڭ كەلبەتى سالىنعان قۋىس قۋىرشاقتى سوعۋعا رۇقسات بەرگەن بولاتىن. دەمەك, جاپونيادا دا جامان باستىق جوق ەمەس. ولارعا ىشتەي كىجىنىپ, سىرتىنان جۇدىرىعىن ءتۇيىپ جۇرگەندەرگە وسى ءادىس وڭىنان كەلىپتى. كۇندە كەشكىسىن جۇمىستان شىعا سالىسىمەن قۋىس قۋىرشاقتى سوققىلاپ, ىشتەگى قىجىلىن باسادى ەكەن. ال ەرتەسىنە ايىزى قانعان قىزمەتشىلەر تۇك بولماعانداي باسشىسىنا كوزىنىڭ قيىعىمەن قاراپ,
جۇمىسىن جالعاستىرا بەرگەن.
دەسە دە, جاپونداردىڭ قۋانىشى كوپكە سوزىلماعان. ويتكەنى سوققىعا جىعىلعان قۋىرشاقتاردىڭ شىن يەلەرى بىرىنەن سوڭ ءبىرى دەرتتى بولىپ, كوبىسى جاسىنا جەتپەي كوز جۇما باستاعان. بۇل قۇبىلىسقا تاڭ قالعان ماماندار تىكەلەي بايلانىستى «تاياق جەگەن» قۋىرشاقتان كورىپ, ونىمەن ويناۋعا تىيىم سالىپتى. سەبەبى شارتتى تۇردە بولسا دا, ناشار ەنەرگيانىڭ كۇيرەتۋشى كۇشى بارى قايعىلى جايتپەن دالەلدەنگەن.
جامان ەنەرگيا دەگەنىمىز – بۇگىندە جۇيكەمىزدى دىڭكەلەتىپ جۇرگەن, جانىمىزدى كۇيزەلتىپ جۇرگەن عىلىمي تىلمەن ايتقاندا, سترەستىڭ ءبىر اتاۋى. ال مۇحيتتىڭ ارعى جاعىنداعىلار مۇنى قاتەرلى دەرت دەپ ساناپ, جاڭا عاسىردىڭ ەپيدەمياسى ەكەنىن مويىنداپ وتىر.
ءسوزىمىزدىڭ دالەلى رەتىندە جاقىندا عانا الەۋمەتتىك جەلىلەردى اينالىپ وتكەن ءبىر جايتپەن بولىسەيىك. وسى جىلدىڭ ناۋرىزىندا لوندوننىڭ ورتالىعىندا بيىك عيماراتتىڭ شاتىرىنىڭ شەتىنەن تومەنگە سەكىرگەلى تۇرعان 84 ەركەكتىڭ ءمۇسىنىن ورناتىپ قويىپتى. مۇنىڭ ءبارى – 45 جاسقا دەيىنگى ازاماتتاردىڭ سۇلباسى. ولاردىڭ پوشىمىن يدەيا اۆتورى مارك دجەنكينس دۇنيەدەن وتكەن ءوزىنىڭ جاقىن دوستارىنىڭ بەينەسىنەن الىپتى.
ەگەر ناقتىلاي كەتسەك, بۇگىنگى كۇندە ۇلىبريتانيادا اپتاسىنا 84 ادام وزىنە قول جۇمسايدى ەكەن. ولاردىڭ دەنى – ەركەكتەر. ۇيىمداستىرۋشىلاردىڭ باتىل قادامى ەر-ازاماتتاردىڭ دەنساۋلىعىنا ءمان بەرۋگە شاقىرسا دا, ءبىز بارىنە ورتاق ماسەلەنى العا تارتقىمىز كەلەدى.
وسى ورايدا تاجىريبەلى پسيحولوگ ايقىن دۇيسەنباەۆتىڭ مىنا پىكىرىن تولىقتاي بەرگەندى ءجون كورىپ وتىرمىن. «سترەسس دەپ ىشتەگى قورقىنىشتىڭ, قوبالجۋدان تۋىنداعان جانىڭىزعا جايسىز جايتتاردىڭ قوردالانىپ, ىشتەگى بەرىشتىڭ ۇلعايا ءتۇسىپ, جۇيكەنىڭ توزۋىن ايتادى.
جالپى العاندا, ادام بالاسىنىڭ جاراتىلىسى وزگەرگەن جوق. انتروپولوگتار كونە زامانداردا اعاشقا تاس بايلاپ, مامونتقا قارسى شىققانداردى ارعى اتالارىمىز دەپ سەندىرەدى. بۇگىنگى كۇننىڭ پسيحولوگيا سالاسى عالىمدارىنىڭ كوزقاراسىمەن ايتقاندا, ولار سترەستىڭ نە ەكەنىن مۇلدەم بىلمەگەندەي. سەبەبى العاشقى ادامداردىڭ بويىن قورقىنىش بيلەپ, ادەتتەگى تىرلىگىنە كۇيزەلىپ جۇيكەسى جۇقارسا, ولاردىڭ ۇرپاعى بىزدەر, بۇگىنگى كۇنگە جەتپەس ەدىك قوي. قيسىندى. وندا زامان العا وزعان سايىن, وسى سترەستىڭ ادامنىڭ ەڭ ءالسىز تۇسىنا اينالۋى نە سەبەپتەن؟ كوبىمىز وسى ىندەتتىڭ الدىندا ءالسىز سەزىنىپ, دارىحاناعا جۇگىرەمىز, ودان قالدى ەمحانانى جاعالاپ, اۋرۋىمىز اسقىنا تۇسسە, اۋرۋحانادان ءبىر-اق شىعىپ جاتامىز.
ىشتەگى ۇرەيدى جەڭۋ دەگەن نە؟ ءبىر عانا مىسالدىڭ توڭىرەگىنە تۇسىندىرۋگە تىرىسايىن. تاس ءداۋىردىڭ ادامدارى جابايى جانۋاردان, مىسالى ءۇشىن مامونتتى الايىق, باس ساۋعالاپ قاشىپ, قاۋىپسىز جەرگە جەتكەندە ەنتىگىن باسىپ دۇرىس تىنىستايدى. سول تىنىس الۋى ارقىلى قورقىنىشتى باسىپ, تۇك بولماعانداي اڭشىلىق جولىنا قايتا شىققان. ياعني, بۇگىنگى كۇندە ۇمىتىلا باستاعان قوزعالىس, كەڭ تىنىستاپ جۇگىرىپ, سەرپىلۋ ارقىلى ەرتەڭگى كۇنگە كۇش جيناعان.
ودان بەرى زامان وزگەردى. ادامنىڭ تۇرمىسى جاقساردى. جاراتىلىسى دا وزگەردى. ەندى ولاردىڭ ءبىر كەزدەرى «مامونتقا» قارسى تۇراتىن كۇش-قايراتى قايدا كەتتى دەپ تاڭ قالاسىز. قازىرگى سترەسس «مامونتتان» كەم ەمەس, ءتۇرى جامان, ءمۇيىزى ايقاسقان, ءجۇنى جالبىراعان ءبىر ۇرەي يەسى. ونى سەزىنىپ تە, ودان قاشۋدىڭ دا جولىن ءبىلۋ كەرەك. ونى ىشىڭىزدە بۇكپەي, ۋايىمىڭىزبەن ءبولىسىپ, مۇنى تىرشىلىك ەتۋدىڭ ءبىر امالىنىڭ سالدارى دەپ ۇعىنا ءبىلۋ كەرەك».
ءسوزىمىزدىڭ باسىندا, جاپوندىق باسشىلار تۋرالى بەكەر ايتقان جوقپىز. ەگەر ادامنىڭ جامان ويى الىستاعى ادامنىڭ باسىن جۇتسا, وندا وسى ويدى جاقسىلىققا اۋدارىپ, جاقسى ويلاپ, جۇرەكتەگى اشۋ-ىزانى تەك جىلى ءسوز, جارقىن ويمەن الماستىرساق, ونىڭ دا كۇشى ۇشان-تەڭىز. جاماننىڭ دا جاعىمدى جاعىن كورە ءبىلۋ دە كەڭدىككە جاتادى. ونىڭ اسەرى ءوزىڭىزدى دە تازارتادى. سترەسس ەپيدەمياسىنا بىردەن-ءبىر داۋا – جاقسى ويلاپ, جانىڭىزدى تازا ۇستاۋ. قازاق «جاقسى ءسوز جارىم ىرىس» دەپ بەكەر ايتپاعان.
پسيحولوگتىڭ قوزعالىسقا قاتىستى سوزىنە ەشكىم قارسى ەمەس شىعار. ەلوردالىقتاردىڭ ورتا جاستان اسقاندارىنىڭ دەنى, جاستارىمىزدىڭ باسىم كوپشىلىگى از قوزعالىپ, كوپ ويلايتىن قىزمەتتە ءجۇر. قوزعالىستىڭ قادىرىن بىلەتىندەر كەشكىسىن فيتنەس زالدارىن تولتىرادى. سالاماتتى ءومىر سالتىن تاڭداعانداردىڭ دا سانى ارتىپ كەلەدى. دەگەنمەن, ءالى دە بولسا, جانى ساۋدىڭ دەنى ساۋ دەگەن ۇعىمدى ناسيحاتتاۋدىڭ ارتىعى جوق. ءار ادامنىڭ دەنساۋلىعى مەن ومىرگە كوزقاراسىن تۇزەتىپ, قوعامىمىزدى ىزگى ادامداردىڭ مەكەنىنە اينالدىرۋعا تالاپتانعان ءجون.
ءبىز كوپ ەمەسپىز. ارقايسىمىزعا ارنالعان جاعىمدى وي, جاقسى تىلەك جاڭعىرىپ كەلىپ, ءوزىمىزدىڭ جولىمىزدى اشاتىنىن تۇسىنەيىك.
