قالالىق اكىمدىكتىڭ كەڭەيتىلگەن جينالىسىندا ەلوردا باسشىسى ادىلبەك جاقسىبەكوۆ پەن «استانا ەكسپو-2017» ۇك توراعاسى احمەتجان ەسىموۆ ەلىمىز ءۇشىن ۇلكەن سىن بولعالى تۇرعان الداعى حالىقارالىق مامانداندىرىلعان كورمەگە دايىندىقتىڭ جاي-كۇيىن جانە ونى وتكىزۋگە بايلانىستى تۋىندايتىن ماسەلەلەردى تالقىلادى.
باسقوسۋ بارىسىندا ايتۋلى شاراعا قاتىستى اتقارىلىپ جاتقان شارۋالار تۋرالى ءتيىستى ۆەدومستۆو وكىلدەرىنىڭ ەسەپتەرى تىڭدالدى. اتاپ كورسەتەرلىك ءبىر جايت, جوعارىدا اتالعان تاراپتار اراسىندا ۇزىن-سانى 50 ءىس-شارا ەنگىزىلگەن جۇمىس جوسپارى ازىرلەنگەن. سونىمەن قاتار, باس شاھاردىڭ بارلىق قىزمەتتەرى مەن ۇلتتىق كومپانيانىڭ بىرلەسە ارەكەت ەتۋىنە نەگىز بولىپ وتىرعان ارىپتەستىك مەموراندۋمى شارتتارى ويداعىداي ورىندالۋدا.
«ءبىزدى ۇلكەن دە جاۋاپكەرشىلىكتى جۇمىس كۇتىپ تۇر. وسى ورايدا ۇلتتىق كومپانيا مەن قالالىق اكىمدىككە قاراستى مەكەمەلەر ءوز ماقساتتارىن ءبىر ارناعا توعىستىرۋى قاجەت. ويتكەنى, الدىمىزدا جۇمىلا اتقارىلۋعا ءتيىس ورتاق مىندەتتەر تۇر» دەدى ەلوردا اكىمى.
قۇرىلىس جۇمىستارىن جۇرگىزۋ كەستەسىنە سايكەس ەكسپو نىساندارى 2016 جىلى سالىنىپ ءبىتۋى كەرەك. بۇگىندە استانا اكىمدىگى كورمەگە ازىرلىك اياسىندا قالانىڭ ينفراقۇرىلىمى مەن ەلوردالىق سەرۆيس ساپاسىن جاقسارتۋ, سونداي-اق, اقپاراتتىق ناسيحات پەن شەت ەلدەردەن تۋريستەردى تارتۋ باعىتىندا اۋقىمدى جۇمىستار اتقارۋدا. ەكسپو كەزىندە جۇزەگە اسىرىلاتىن شارالار لەگىنە ەرەكشە كوڭىل بولىنۋدە. كورمە بولىپ جاتقاندا الەم استانالارى كۇنىن, ءارتۇرلى فەستيۆالدەر, كونتسەرتتىك باعدارلامالار, حالىقارالىق كونكۋرستار, سپورتتىق جارىستار مەن بيزنەس-فورۋمدار ۇيىمداستىرۋ جوسپارلانعان. قاۋىپسىزدىكتى قامتاماسىز ەتۋ جاعى دا نازاردان تىس قالماق ەمەس.
لوگيستيكا ماسەلەسى دە ايرىقشا ماڭىزعا يە. سوندىقتان قازىرگى ۋاقىتتا حالىقارالىق اۋەجاي تەرمينالىن كەڭەيتۋ, تەمىر جول ۆوكزالى مەن جەڭىل رەلستى كولىك جولاقتارىن سالۋ سەكىلدى بىرقاتار ءىرى جوبالار ىسكە قوسىلۋدا. بۇل رەتتە ەلوردا مەيماندارىن قابىلداعانعا دەيىن ناۆيگاتسيا جۇيەسى دە جاقسارتىلادى.
قازاننىڭ 31-ءى كۇنى ميلاندا ەكسپو-2015 ءوز جۇمىسىن اياقتاپ, استانادا ەكسپو-2017 تۋىن سالتاناتتى تۇردە تابىستاۋ ءراسىمى وتەدى. «سول مەزەتتەن باستاپ بۇكىل نازار ءبىزدىڭ كورمەگە اۋادى. اسا اۋقىمدى «ەكسپو-2017» كورمەسىن وتكىزۋگە بارلىق مەملەكەتتىك ورگاندار مەن وبلىستار اتسالىساتىنىنا قاراماستان, نەگىزگى اۋىرتپالىق ۇلتتىق كومپانيا مەن ەلوردا اكىمدىگىنىڭ موينىنا تۇسەدى. كورمەنى دۇرىس وتكىزۋ ءۇشىن ءبىزدىڭ ارامىزدا ءوزارا تۇسىنىستىك پەن سەنىمدى سەرىكتەستىكتىڭ بولۋى وتە ماڭىزدى» دەدى جيىندا ءسوز سويلەگەن احمەتجان ەسىموۆ.
