ەلورداداعى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جۋرناليستيكا فاكۋلتەتىنە بيىل تۇسكەن تۇلەكتەر «Elorda Aqparat» جشس قاراستى رەسپۋبليكالىق قوعامدىق-ساياسي «استانا اقشامى» گازەتىنىڭ ۇجىمىمەن كەزدەسىپ, تاعىلىمعا تولى اڭگىمە ءوربىتتى.
شارانى اتالعان وقۋ ورداسىنىڭ جۋرناليستيكا جانە ساياساتتانۋ فاكۋلتەتىنىڭ دەكانى, بەلگىلى عالىم قايرات ساق جۇرگىزىپ وتىردى. جۇزدەسۋ فورماتى سۇحبات تۇرىندە ءوربىدى. تاجىريبەلى جۋرناليستەر مەن بولاشاق جۋرناليستەر ەركىن وي ءبولىسىپ, پىكىر الىستى. بۇگىنگى مارتەبەلى ماماندىقتىڭ ۋاقىت تالابىنا ساي وزگەرىپ جاتقان دامۋ ۇردىسىنە توقتالدى.
الدىمەن ءسوز تىزگىنى «Elorda Aqparat» جشس ديرەكتورى قايسار جۇمابايۇلىنا ءتيدى. ول جەتەكشىلىك جاساپ وتىرعان ۇجىمنىڭ قىزمەتىنە توقتالدى.
– ءبىزدىڭ سەرىكتەستىك وتكەن جىلدىڭ اياعىندا قۇرىلىپ, وعان «استانا اقشامى» مەن «ۆەچەرنيايا استانا» اتتى ەكى گازەتتى قوسىپ, الداعى تاڭدا جاقسى ءبىر مەديا رەسۋرسقا اينالۋ ءۇشىن قازىر سايتتى قولعا الىپ جاتىرمىز. ودان بولەك, elorda.info دەگەن سايت جۇمىسىن باستادى. الدىمىزدا ءالى جۇزەگە اسىرساق دەيتىن جوسپارلارىمىز بار. ونى كەزى كەلگەندە سىزدەرگە ايتامىز. وسىنداي شارا ۇيىمداستىرعان جۋرناليستيكا فاكۋلتەتىنىڭ ۇجىمىنا العىسىمدى بىلدىرەمىن, – دەدى ول.
بۇگىندە باس قالاداعى اتى كوپكە تانىلعان ۋنيۆەرسيتەتتىڭ جۋرناليستيكا فاكۋلتەتىندە 600-گە جۋىق جاس وقيدى. وندا ءبىلىم الىپ جاتقان ستۋدەنتتەر ەسىمدەرى ەلگە بەلگىلى نامازالى وماشۇلى, عادىلبەك شالاحمەتوۆ, رابيعا امانجولوۆا, وڭايگۇل تۇرجان سەكىلدى ۇلاعاتتى ۇستازداردان ءتالىم الادى. بيىل 1-كۋرسقا 200-گە تارتا ستۋدەنت قابىلدانعان. ولاردىڭ ىشىندە 27 تۇلەك ورتا مەكتەپتى «التىن بەلگىمەن» بىتىرگەن.
«ءبىزدىڭ فاكۋلتەتىمىز ۋنيۆەرسيتەتتەگى ەڭ جاس سانالادى. سوعان قاراماستان, جۋرناليستيكا ماماندىعىنىڭ ءباسى جوعارى. بىرىنشىدەن, وسىندا مىقتى كادرلار شوعىرى قالىپتاستى. ەكىنشىدەن, رەسپۋبليكانىڭ بارلىق ايماعىنان كەلگەن تالانتتى جاستار جينالعان. بىلتىر بىزگە بولىنگەن گرانت سانى 90 بولسا, بيىل ول 75-كە ءتۇستى. سونىڭ اسەرىنەن كونكۋرس كۇشەيدى. از گرانتتى ۇتىپ الۋ ۇزدىكتەرگە عانا بۇيىرادى. ماتەريالدىق بازامىز دا مىعىم. ەكى تەلەستۋديا جۇمىس ىستەيدى. مۇنداي جۇزدەسۋلەردىڭ بەرەرى كوپ. ءبىز وسىلاي وستىك. ادامعا وي سالادى, شىعارماشىلىق تاجىريبە جيناقتايدى» دەدى فاكۋلتەت دەكانى.
«استانا اقشامى» گازەتىنىڭ باس رەداكتورى ەركىن قىدىر باسىلىم تاريحى مەن قوعامنىڭ دەرتىن تاپ باساتىن ماماندىقتىڭ قىر-سىرىن جاستارعا اڭگىمەلەپ بەردى.
– ءبىزدىڭ گازەتتىڭ جاسى سالىستىرمالى تۇردە العاندا ونشا كوپ ەمەس. الداعى ەكى-ءۇش جىلدا باسىلىمعا وتىز جىل تولادى. «اقمولا اقيقاتى» دەپ العاش تۇساۋىن كەسكەن گازەت قالا باس شاھارعا اينالعاننان كەيىن «استانا اقشامى» اتىن يەلەندى. مەن دە سىزدەر سەكىلدى جۋرناليستيكا فاكۋلتەتىن بىتىرگەنمىن. كەشەگى نومىردە قازاق ۇلتتىق ونەر ۋنيۆەرسيتەتىنىڭ 1-كۋرس ستۋدەنتى ەڭلىك ەگەۋباەۆانىڭ ءانشى قايرات نۇرتاس قارجىلاندىرعان «ارمان» اتتى ءفيلمى تۋرالى سىن ماقالاسى جارىق كوردى. سونى ءبىز ادەيى بەردىك. كينو جايىندا ايتقان جاستىڭ ءوز پىكىرى. ءبىز دە وسى مەكتەپتەن وتتىك. جۋرناليستيكا ماماندىعىن قالاعاننان كەيىن سىزدەر الداعى ءومىر جولدارىڭىزدى تاڭداپ تۇرسىزدار. ونىڭ ءبارى 1-كۋرستان باستاۋ الادى. ۇلكەن ءومىردىڭ العاشقى قادامى سودان كورىنەدى. ءبىز توپتى ورىس-قازاعى بار ەلۋ شاقتى بالا بىتىردىك. سول ءبىرىنشى كۋرستا رەداكتور بولامىن دەپ تالپىنعانداردىڭ كوپشىلىگى بىلىكتى رەداكتور بولدى. سوندىقتان الدارىڭىزعا ۇلكەن ماقسات قويساڭىزدار, الىنبايتىن قامال جوق. ەڭ الدىمەن جۋرناليست ويلانا ءبىلۋ كەرەك, تاقىرىپ تابا ءبىلۋ كەرەك, جازا ءبىلۋ كەرەك. جاقسى جۋرناليست گازەتتە دە, تەلەديداردا دا, سايتتا دا جاقسى كورىنەدى. ءوزىنىڭ ويى مەن ايتارى بار ادام ەشقاشان جەردە قالمايدى. العاشقى ىرگەتاس جازۋدان قالانادى. كىمنىڭ جازۋى جاقسى, سونىڭ شىعاتىن بيىگى دە جوعارى, – دەدى باس رەداكتور.
گازەت شولۋشىسى گۇلميرا ايماعانبەت تە باسىلىمعا تاجىريبەدەن وتۋگە كەلەتىن ستۋدەنتتەر مەن كەيىنگى كەزدەرى جۇزەگە اسىپ جاتقان باسىلىمداعى ىرگەلى وزگەرىستەر تۋرالى ايتتى. گازەتكە جازىلۋ تۋرالى دا ءسوز قوزعالدى. ماسەلەن, كافەدرا مەڭگەرۋشىسى ا.ەسداۋلەتوۆ جاتاقحاناداعى ءبىر بولمەدە تۇراتىن 3-4 بالا بىرىگىپ, باسىلىمعا جازىلۋدى قولعا الۋعا بولادى دەگەن وي تاستادى.
قىسقاسى, كەزدەسۋ بارىسىندا ستۋدەنتتەر بۇگىنگى جۋرناليستەردى تولعاندىراتىن ءتۇرلى تاقىرىپتا سۇراقتار قويىپ, وزدەرىن مازالاعان ماسەلەلەرگە كەلگەن قوناقتاردان تياناقتى جاۋاپ الدى.
ازامات ەسەنجول
