استانا – باس قالا. ونىڭ ۇستىنە تەك رەسمي تىركەلگەن 391 مىڭ اۆتوكولىگى بار ەلىمىزدەگى ءىرى مەگاپوليس. ارينە, كولىك مىنگەن جاقسى. ۋاقىت ۇنەمدەيسىز, شارۋاڭىز تەز بىتەدى. سوندىقتان بۇگىندە اۆتوموبيل حالىق اراسىندا بايلىق ەمەس, قاجەتتى قوزعالىس قۇرالى رەتىندە قابىلدانادى. وسىنداي ءبىر ميلليوننان استام تۇرعىنى بار قالادا ءومىر ءسۇرىپ, جۇمىسىڭىزعا بارۋعا, بالاڭىزدى بالاباقشاعا نەمەسە مەكتەپكە اپارۋعا كولىگىڭىز بولماسا, قالاي قيىندىق كورەر ەدىڭىز…
قۇدايعا شۇكىر, ءسىزدىڭ تۇرمىستىق قاجەتىڭىزگە كەرەك ماشيناڭىز بار ەكەن. ەندى ونىمەن قالا كوشەلەرىندە جۇرگەندە, جول ءجۇرۋ ەرەجەسىنىڭ بارلىق تالاپتارىن ساقتايسىز با؟ اسىقساڭىز, جول ءجۇرۋ ەرەجەلەرىن بۇزساڭىز, وندا ءسىز باسقا ادامداردىڭ ومىرىنە دە قاۋىپ توندىرەسىز. وسىنى مىقتاپ قاپەرىڭىزگە ساقتاڭىز.
ماسەلەن, استانا قالاسىندا تەك ماۋسىم ايىندا عانا 72 جول كولىك وقيعاسى تىركەلىپ, 27 ادام ماس كۇيىندە ماشينا جۇرگىزگەنى ءۇشىن جازالانىپتى. ايتا كەتەيىك, قازاقستان رەسپۋبليكاسىنىڭ قىلمىستىق كودەكسىندە (345-باپ) ماس كۇيىندە كولىك جۇرگىزگەنى ءۇشىن قىلمىستىق جاۋاپكەرشىلىك قاراستىرىلعان. اراق ءىشىپ نەمەسە ەسىرتكى قولدانىپ, جول كولىك وقيعاسىن جاساسىڭىز, ءسويتىپ ادام دەنساۋلىعىنا ورتاشا دارەجەدە زاقىم كەلتىرسەڭىز, 40 كۇنگە قاماۋعا الىنىپ, ەكى جىلعا دەيىن كولىك جۇرگىزۋ قۇقىنان ايىرىلاسىز.
ەگەر ءسىزدىڭ كىناڭىزدەن بولعان جول كولىك وقيعاسىندا ادام دەنساۋلىعىنا اۋىر زارداپ كەلسە, جۇرگىزۋشى ەكى جىل باس بوساندىعىنان ايىرىلادى. ال كىسى ءولىمى بولسا, بەس جىلدان ون جىلعا دەيىن تۇرمەگە قامالىپ, جەتى جىل كولىك جۇرگىزۋ قۇقىنان ايىرىلادى.
ماس كۇيىندە جول كولىك وقيعاسىن جاساۋ جۇرگىزۋشىنىڭ كىناسىن ارتتىرا تۇسەدى. قازاقستان رەسپۋبليكاسى قىلمىستىق كودەكسىنىڭ 345-بابى 1-تارماعى, 347-بابى بويىنشا كولىك رۋلىنە الكوگولدى ىشىمدىك ءىشىپ وتىرۋ, ءسويتىپ ادام دەنساۋلىعىنا ورتاشا دارەجەدە زيان كەلتىرۋ – ءبىر جىلعا دەيىن باس بوستاندىعىنان ايىرىپ, كولىك قۇرالدارىن ون جىل بويى باسقارۋعا تىيىم سالادى. ال جول كولىك وقيعاسى ورنىن ءوز بەتىنشە تاستاپ, قاشىپ كەتسە, جۇرگىزۋشى ەكى جىلعا تۇرمەگە جابىلىپ, ءۇش جىل كولىك جۇرگىزە المايدى. ال ەگەر جۇرگىزۋشىلىك كۋالىگىنەن ايىرىلعان جۇرگىزۋشى ماس بولىپ, كولىك جۇرگىزسە, (قر قك 346-بابى) بەس جىلعا باس بوستاندىعىنان ايىرىلىپ, ءومىر بويى كولىك جۇرگىزۋگە تىيىم سالىنادى.
استانا قالاسىندا جىل باسىنان بەرى اراق ءىشىپ كولىك جۇرگىزگەن 28 جۇرگىزۋشى ءىستى بولدى. ءبىر وكىنىشتىسى, ولاردىڭ اراسىندا ايەل ادامدار دا بار.
ءبىر عانا مىسال كەلتىرسەك, وتكەن مامىر ايىندا ەلورداداعى سارايشىق كوشەسىنىڭ بويىنداعى كوپىردە ن. اتتى ازامات اراققا تويىپ الىپ «BMW X1» ماركالى ماشيناسىمەن جىلدامدىقتى شامادان تىس اسىرىپ, باسقارا الماي جولدىڭ قارسى بەتىنە شىعىپ كەتكەن. سالدارىندا قارسى باعىتتا كەلە جاتقان «Toyota Camry 70» ماركالى كولىگىنە سوقتىعىسقان. ءارى تاعى ءبىر «Ravon Nexia» ماركالى اۆتوكولىگىن دە سوققان. العان جاراقاتتان ەكى كولىكتىڭ دە جۇرگىزۋشىسى وقيعا ورنىندا كوز جۇمدى. ەسىل اۋدانىنىڭ №2 اۋداندىق سوتىنىڭ ۇكىمىمەن جۇرگىزۋشى قر قك 345-بابى 4-تارماعى جانە 347-بابى بويىنشا سەگىز جىلعا سوتتالىپ, جەتى جىلعا كولىك جۇرگىزۋ قۇقىنان ايىرىلدى.
ماس جۇرگىزۋشى – قىلمىسكەر ەكەنىن ۇمىتپايىق.
ەلدار نۇرماحانوۆ,
استانا قالاسى
پروكۋراتۋراسى
2-ءشى باسقارماسىنىڭ باستىعى, زاڭ كەڭەسشىسى
