نۇر-سۇلتان قالاسىندا «قۇقىقتىق ءتارتىپ» جەدەل-الدىن الۋ شاراسى بارىسىندا ەلوردا جولدارىندا جول-كولىك وقيعالارىن انىقتاۋ جانە جول قوزعالىسى ەرەجەلەرىن بۇزۋدىڭ جولىن كەسۋ ماقساتىندا رەيد وتكىزىلدى.
كۇماندى كولىك جۇرگىزۋشىلەردىڭ ماس كۇيىن انىقتاۋ ءۇشىن مەديتسينالىق كۋالاندىرۋدان وتكىزۋ ءۇشىن ناركولوگيا ورتالىعىنا 29 جۇرگىزۋشى جەتكىزىلگەن. ولاردىڭ ءبىرى بۇرىن كولىك قۇرالىن باسقارۋ قۇقىعىنان ايىرىلعان بولىپ شىقتى. كۋالاندىرۋ ناتيجەسىنە سايكەس جەتكىزىلگەندەردىڭ بارلىعى ماساڭ كۇيدە بولعان. ءتارتىپ بۇزۋشىلاردىڭ اۆتوكولىكتەرى كوممۋنالدىق تۇراققا قويىلدى.
جەدەل الدىن الۋ ءىس-شاراسىن وتكىزۋدىڭ كەزەكتى رەيدى كەزىندە ءتارتىپ ساقشىلارى ساعات تاڭعى 06.00-دە قابانباي باتىر داڭعىلى بويىندا «تويوتا كامري» كولىگىن توقتاتقان. كولىك تىزگىنىندەگى تەمىرتاۋ قالاسىنىڭ 26 جاستاعى تۇرعىنىنان الكوگولدىڭ وتكىر ءيىسى شىققان. جۇرگىزۋشى مەديتسينالىق كۋالاندىرۋعا جەتكىزىلدى, دارىگەردىڭ قورىتىندىسىنا سايكەس ول ورتاشا اۋىر ماس حالىندە بولعان.
ماس جۇرگىزۋشىلەرگە قاتىستى قر اقبك 608-بابىنىڭ 1-بولىگى بويىنشا اكىمشىلىك ءىس قوزعالدى. مۇنىڭ جازاسى 15 تاۋلىككە قاماققا الۋدان باستاپ 7 جىل مەرزىمگە كولىك قۇرالىن باسقارۋ قۇقىعىنان ايىرۋعا دەيىن اكەپ سوعادى.
ەلوردالىق پوليتسيا قىزمەتكەرلەرى وسىنداي سيپاتتاعى شارالاردى وتكىزۋ ۋاقىتىندا ماس كۇيدە كولىك ايداۋعا بايلانىستى قۇقىق بۇزۋشىلىقتاردى انىقتاۋعا جانە ولاردى بولدىرماۋعا ەرەكشە نازار اۋدارادى. قابىلدانعان شارالارعا قاراماستان كەيبىر ازاماتتار الكوگول پايدالانىپ, رولگە وتىرۋدان تايىنار ەمەس. وسىلايشا ولار ءوز ومىرلەرىنە, سونداي-اق جول قوزعالىسىنىڭ وزگە دە قاتىسۋشىلارىنىڭ ومىرىنە قاۋىپ ءتوندىرۋدى جالعاستىرىپ كەلەدى.
اتالعان شارامەن قوسا قالالىق پوليتسيا قىزمەتكەرلەرى اۆتوپارك پەن قوعامدىق كولىكتەردىڭ تەحنيكالىق كۇيىن تەكسەرىپ جاتىر. اقپان ايىنىڭ 21 جۇلدىزىنان 2 ناۋرىزعا دەيىن جالعاساتىن «اۆتوبۋس» جەدەل-الدىن الۋ ءىس-شاراسى باستاۋ الماق.
شارا بارىسىندا كولىكتىك باقىلاۋ ينسپەكتسياسىنىڭ, كولىك جانە كولىك ينفراقۇرىلىمىن دامىتۋ باسقارماسىنىڭ اۋماقتىق بولىمشەلەرىمەن, سونداي-اق قوعامدىق باقىلاۋ وكىلدەرىمەن تىزە قوسىپ, قالالىق جانە مەكتەپ اۆتوبۋستارىنىڭ جولعا شىعار الدىندا ولاردىڭ تەحنيكالىق جاي-كۇيىن تەكسەرۋ بويىنشا ارەكەتتەر جۇرگىزىلەتىن بولادى.
