تاۋەلسىزدىگىمىزدىڭ جيىرما بەس جىلدىق مەرەكەسىنە وراي كەشە رەسەيدىڭ باس قالاسى ماسكەۋدە استانانىڭ مادەني كۇندەرى باستالدى. وندا قالا تۇرعىندارى ەكى كۇن بويى حالقىمىزدىڭ باي مۇراسىمەن تانىسىپ, ۇلتتىق ونەردىڭ تۇنىعىنان سۋسىندايدى. سالتاناتتى شاراعا استانا اكىمى اسەت يسەكەشەۆ باستاعان لاۋازىمدى تۇلعالار مەن ەلىمىزدىڭ ابىرويىن اسىرىپ جۇرگەن ونەر ساڭلاقتارى كەلدى.
ەڭ الدىمەن استانا كۇندەرى رەسمي كەزدەسۋدەن باستالدى. ەلوردا اكىمى اسەت يسەكەشەۆ پەن ماسكەۋ مەرى سەرگەي سوبيانين ەكى قالا اراسىنداعى بايلانىس تۋرالى كەلەلى اڭگىمە ءوربىتتى.
– ءبىز ءۇشىن ماسكەۋدىڭ مەگاپوليستى دامىتۋ بويىنشا باي تاجىريبەسى وتە ماڭىزدى. قازىر ءبىز استانانىڭ دامۋ تۇعىرناماسىن قايتا قاراۋدامىز. ماقساتىمىز – «اقىلدى قالا جوباسى» اياسىندا دامىتۋ, قالادا ءومىر ءسۇرۋدىڭ قولايلى جاعدايلارىن جاساۋ, جاڭا تەحنولوگيالاردى ەنگىزۋ. وسى رەتتە ماسكەۋدىڭ قالالىق شارۋاشىلىقتى باسقارۋ, كولىك جۇيەسىن باسقارۋداعى ءتاجىريبەسىمەن, قالا قۇرىلىسى سالاسىنداعى جەتىستىكتەرمەن جانە ونىڭ «اقىلدى قالا» رەتىندە دامىتۋ شارالارىمەن تانىسۋعا نيەتتىمىز, – دەدى استانا اكىمى اسەت يسەكەشەۆ.
جالپى, ەكى ەلدىڭ باس قالاسى اراسىنداعى بايلانىس وسى عاسىردان باسىنان باستاۋ الادى. سودان بەرى ەكى ەلوردانىڭ دوستىعىنا ەشقاشان قىلاۋ تۇسكەن جوق. قايتا جىل وتكەن سايىن تامىرى تەرەڭدەپ, كەرەگەسى كەڭەيىپ كەلەدى. ودان كەيىن استانا اكىمى اسەت يسەكەشەۆ پەن ماسكەۋ قالاسىنىڭ سىرتقى ەكونوميكالىق جانە حالىقارالىق بايلانىستار دەپارتامەنتىنىڭ جەتەكشىسى سەرگەي چەرەمين ماسكەۋدىڭ ورتالىق ءىرى كورمە الاڭىندا ەجەلگى كوشپەندىلەر ءداۋىرىنىڭ بولمىسى مەن كەلبەتىن كوركەمدەگەن قازاق اۋىلىن ارالادى.
