رەسەي استاناسىنىڭ تۇرعىندارى وزدەرىنىڭ وي-ورىستەرى مەن تانىم كوكجيەكتەرىن كەڭەيتە بەرۋ ءۇشىن ودان ۋاقىتىن دا, قارجىسىندا ايامايدى. بۇل جولى ولار پۋشكين مۋزەيىنە كىرۋ ءۇشىن ۇزىن-شۇباق كەزەككە تۇردى.
گاپ مىنادا, كرەملدى قالادا قاراشانىڭ 4-ىنەن 5-نە قاراعان ءتۇنى ءداستۇرلى «ونەر كەشى» ۇيىمداستىرىلدى. جىل سايىن وسى مەزگىلدە وتكىزىلىپ تۇراتىن بۇل شارانىڭ اياسىندا شاھار تۇرعىندارى مەن قوناقتارى ەڭ ساۋلەتتى دە كورنەكتى ونەر وردالارىن ءتۇنى بويى تەگىن ارالاپ شىعادى. ال ءسوز بولىپ وتىرعان پۋشكين مۋزەيى كەش باعدارلاماسىنا ەنگىزىلگەن. ول اتاقتى ترەتياكوۆ گالەرەياسى سياقتى سونداي ورىنداردىڭ بىرىنەن سانالادى. سوندىقتان بولار, كوپشىلىك جەكسەنبى كۇنى تۇندە ورىستىڭ ۇلى اقىنىنىڭ ءومىرى مەن شىعارماشىلىعى جونىنەن قىزعىلىقتى دەرەكتەر مەن ماعلۇماتتار بەرەتىن مەكەندە بولۋعا ايرىقشا ىنتا تانىتتى.
مۇنداي كەزەك بۇل ءتۇنى مانەجدەگى «رەسەي مۋزەيلەرىنىڭ قازىناسى» دەپ اتالاتىن كورمە الدىندا دا كورىندى. ول رەسەي حالىقتارىنىڭ بىرلىگى كۇنىنە ارنالدى. مۇندا كەلۋشىلەرگە ەلدەگى 50 مۋزەيدەن اكەلىنگەن كەرەمەت ەسپوناتتار ۇسىنىلدى. كورمەگە قويىلعان شەدەۆرلەر سانى 300-دەن استى.
بۇلاردان بولەك, كەلۋشىلەردى ريگا جانە كيەۆ ۆوكزالدارىندا, سونداي-اق زارياديا كونتسەرت زالىندا, ماسكەۋ پلانەتارياسى مەن وستانكينو تەلەمۇناراسىندا ايرىقشا مازمۇندى باعدارلامالار كۇتىپ تۇردى. تىلەك بىلدىرۋشىلەر ءبىرىنشى رەت مۇنارادا تۇندە بولۋ قۇرمەتىنە قول جەتكىزدى. زارياديادا جاڭا يەرۋساليم ءموناستىرىنىڭ حورى ونەر كورسەتتى. ول حالىق اندەرى مەن سوعىس جىلدارىنداعى اۋەندەردى شىرقادى.
بۇل ءتۇنى ماسكەۋلىكتەر مەن قالا قوناقتارى كوپتەگەن مۋزەيلەر مەن گالەرەياداعى سيرەك كەزدەسەتىن ەكسپوناتتارمەن تەگىن تانىسىپ قانا قويعان جوق, سونىمەن قاتار ولاردا وتكىزىلگەن كۆەستتەر مەن شەبەرلىك سىنىپتارىنا قاتىسۋ مۇمكىندىكتەرىن دە الدى. مۇنداي اكتسيالاردىڭ تاقىرىپتارى «ۇرپاقتار قارىم-قاتىناسى» دەپ اتالدى. ول جاسى ۇلعايعان كىسىلەردى ۇلىقتاۋعا باعىتتالدى.
تۇرلەنگەن تۇنگى تاشكەنت
سوڭعى ايدا تاشكەنت قالاسىنىڭ ورتالىعى قاتتى وزگەرىپ كەتتى. وندا وزىندىك ورنەكتەرى بار مۇسىندەر, شىراعداندار پايدا بولدى. تۇنگى باقتار مەن كوشەلەر جيەكتەرىندە باسقاشا رەڭك-ساۋلە شاشاتىن شامدار قاتارعا قوسىلدى. ال عيماراتتاردا جاڭا يلليۋميناتسيا كورىنىس تاپتى.
وزبەكستان استاناسىنداعى بۇل كورىنىستەر ونى, اسىرەسە, ءتۇن مەزگىلىندە ەرەكشە كوركەم ەتىپ كورسەتە تۇسەدى. بۇرىن كوكجيەككە كۇن باتىپ كەتكەننەن كەيىن جۇرت كوشەلەردىڭ بويلارىنداعى ءالسىز جارىقتاردىڭ اياسىمەن ءجۇرىپ كەلە جاتۋشى ەدى. قازىر سول ساتتەن باستاپ اۋماق بىردەن سۇلۋلانىپ سالا بەرەدى.
تۇنگى تاشكەنتتىڭ پاركتەرى مەن باقتارى اراسىندا سەرۋەن قۇرۋدىڭ ءوزى جاندى راحات سەزىمگە بولەيدى. مۇنى مىنا سۋرەتتەر توپتاماسى دا ايقىن اڭعارتار ەدى.
اپپاق بولۋ ادالدىققا شاقىرادى
ءسىز ينتەرەرى تۇگەل اق تۇستەن تۇراتىن جيھازدار مەن زاتتاردان قۇرالعان پاتەر كوردىڭىز بە؟ تاياۋدا لاتۆيا استاناسى – ريگا قالاسىندا سونداي ءبىر ءۇي پايدا بولدى. ونى «Karla» بالالار كيىمدەرى برەندىنىڭ نەگىزىن قالاۋشى ەلەنا بلاتە-دەكسنا ومىرگە ەنگىزدى.
شەبەرحانا ينتەرەرىن ەلەنا بۇدان بەس جىل بۇرىن «Karla» برەندىن جاساعان كەزدە-اق ويلاپ تاپقان ەكەن. بۇرىن وعان قارا جانە قىزىل تۇستەر ۇناعان كورىنەدى. لەنا اق تۇسكە بەرتىندە نازار اۋدارا باستاپتى. ول ءوزىنىڭ ەكىنشى بوپەسىن كۇتىپ جۇرگەن كەزىندە اشىق, جارقىن, جۇمساق تۇستەرگە كوبىرەك كوڭىل بولۋگە كىرىسىپتى.
بيىلعى جازدا ەلەنا شەبەرحانا ينتەرەرىن تولىقتىرىپ, وعان قارا تۇستەن اكتسەنت بەرىپ كورۋدى ويلاستىرادى. ءسويتىپ, قارا ديۆان مەن كىلەم ساتىپ الادى. ايتكەنمەن, ارادا ءبىر اپتا وتكەننەن كەيىن بۇلايشا الاشۇبار ەتۋدىڭ كەرەگى جوق ەكەنىن تۇسىنەدى. وسىلايشا بىرىڭعاي اق تۇسكە كوشەدى.
بۇل وتباسىنىڭ جالعا الىپ تۇرىپ كەلە جاتقان اۋماعى 112 شارشى مەترلىك پاتەرلەرىندە تەك شەبەرحانا مەن قوناق بولمەسى عانا اق تۇسپەن تۇگەل كومكەرىلىپ تۇر. بىراق جاقىن كۇندەرى ەلەنا ءاسۇيدى دە اق تۇسكە اينالدىرۋدى كوزدەپ وتىر ەكەن. ونىڭ بۇل شەشىمىنە كۇيەۋى دە, بالالارى دا قارسى ەمەس.
بەيجىڭدى بۇعى بيلەيدى
2022 جىلى قىتايدىڭ استاناسى – بەيجىڭدە وتەتىن قىسقى وليمپيالىق ويىنداردىڭ بويتۇمارى انىقتالدى. وعان ءداۋىتتىڭ بۇعىسى تاڭداپ الىندى.
بويتۇماردى جاساۋمەن شۇعىلدانعان بەيجىڭ ديزاين مەكتەبىنىڭ قىزمەتكەرلەرى ءداۋىتتىڭ بۇعىسى قىسقى ويىنداردىڭ سيمۆولى بولۋعا تاپتىرمايتىنىن ايتادى. ول – عالامات سپورتشى. تەك جاقسى جۇگىرىپ قانا قويمايدى, سونىمەن بىرگە كەرەمەت جۇزەدى, قالىڭ قاردىڭ قانارىن قاق جارىپ ءوتىپ, جىلتىراپ جاتقان مۇزدىڭ بەتىمەن زاۋلاي جونەلەدى. بۇعان قوسا, حانسۋ تىلىندە «بۇعى» دەگەن ءسوز «لۋ» دەگەن لەكسەمامەن بەرىلسە, ەكىنشى جاعىنان ول «گۇلدەنۋ» ءسوزىنىڭ ءومونيمى ەكەن.
ەندى بەيجىڭدە وتەتىن قىسقى وليمپيالىق ويىندار ءۇشىن ۇسىنىلاتىن بويتۇماردى انىقتاۋعا ارنالعان كونكۋرستىڭ جەڭىمپازى 2019 جىلدىڭ ەكىنشى جارتىسىندا جاريالاناتىن بولىپ وتىر.
ەسكە سالا كەتەيىك, بۇل ويىندار 2022 جىلعى 4-20 اقپان كۇندەرى بەيجىڭ مەن وعان كورشى چجانتسزياكوۋ قالاسىندا وتەدى. وسىلايشا قىتاي استاناسى الەمدەگى جازعى دا, قىسقى دا وليمپيادانى وتكىزگەن ءبىرىنشى قالا بولعالى تۇر.
