نۇر-سۇلتان قالاسىنىڭ اكىمى التاي كولگىنوۆ سپورتشىلارعا ارنالعان مەديتسينالىق ورتالىقتىڭ اشىلۋ سالتاناتىنا قاتىسىپ, سپورت سالاسىنىڭ ارداگەرلەرى مەن جاتتىقتىرۋشىلارىمەن كەزدەستى.
«ەلوردادا سپورتشىلارعا ارنالعان العاشقى مەديتسينالىق ورتالىق اشىلدى. جاتتىقتىرۋشىلار مەن سپورتشىلارعا ارنالعان جەكە مەديتسينالىق مەكەمە اشۋ ماسەلەسى كەزدەسۋلەرىمىزدىڭ بىرىندە تالقىلانعان بولاتىن. ماسەلەن, وسىعان دەيىن سپورتشىلارىمىز №5 قالالىق ەمحانا بازاسىندا كاسىبي تەكسەرىستەن ءوتىپ, ەم الدى. بۇل تەكسەرۋلەر وزگە ناۋقاستارمەن بىرگە, جالپى كەزەك بويىنشا جۇرگىزىلدى. ال بۇل بەلگىلى ءبىر دەڭگەيدە ىڭعايسىزدىق تۋعىزىپ, سپورتشىلاردىڭ ساپالى دايىندىعى مەن ساۋىقتىرۋ پروتسەسىنە كەرى اسەر ەتتى. سپورتشىلار مەن ولاردىڭ جاتتىقتىرۋشىلارى ايتقانداي, بۇل جاعدايدا ارنايى تۇردە سپورت دارىگەرلەرى بولۋى كەرەك» دەدى قالا باسشىسى.
ساۋىقتىرۋ كەشەنى ا-82 كوشەسىندەگى «نۇرلى جول» تەمىرجول ۆوكزالىنىڭ جانىندا ورنالاسقان. بۇل ورتالىق سپورتشىلاردىڭ مەديتسينالىق تەكسەرۋدەن ەمىن-ەركىن وتۋىنە, دەنساۋلىعىن وڭالتىپ, قالپىنا كەلتىرۋىنە, ءتىپتى فيزيكالىق مۇمكىندىگىن تەكسەرىپ, جاراقاتتىڭ الدىن الۋعا مۇمكىندىك بەرەدى.
بۇگىندە سپورت سالاسى قارقىندى دامىپ, باسەكەلەستىك ارتىپ كەلەدى. سپورتشىلار الەمدىك جانە وليمپيادالىق رەكوردتاردى جاڭارتىپ, بيىك شىڭداردى باعىندىرۋدا. مەديتسينالىق ماماندارسىز ۇلكەن سپورتتا جەڭىسكە جەتۋ مۇمكىن ەمەس. ولاي بولسا جاڭادان اشىلعان مەديتسينالىق ورتالىق ەلوردالىق جانە ەل نامىسىن قورعايتىن بارشا سپورتشىلار ءۇشىن اسا ماڭىزدى ساۋىقتىرۋ كەشەنىنە اينالادى. يگىلىكتى ءىس-شاراعا قاتىسقان سپورت سالاسىنىڭ ماماندارى وسىنداي باعا بەرىپ, ءبىر-بىرىنەن ءسۇيىنشى سۇرادى.
