استانا قالاسى اكىمدىگىندە 10 قاراشا كۇنى مەديتسينا سالاسىنىڭ قىزمەتكەرلەرى باس قوسقان بولاتىن. القالى جيىنعا پرەمەر-ءمينيستردىڭ ورىنباسارى داريعا نازارباەۆا, استانا قالاسىنىڭ اكىمى ادىلبەك جاقسىبەكوۆ, دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا قاتىستى. الدىمەن ءسوز العان پرەمەر-ءمينيستردىڭ ورىنباسارى داريعا نازارباەۆا وتاندىق دەنساۋلىق ساقتاۋ جۇيەسىنىڭ جەتىستىكتەرى مەن كەمشىلىكتەرىنە قاتىستى پىكىرىن ءبىلدىردى.
بۇل سالاعا سوڭعى جىلدا بولىنگەن قارجىنىڭ كولەمى ارتا تۇسكەنىمەن, وڭتايلى شەشىلۋىن كۇتەتىن وزەكتى ماسەلەلەر بار ەكەنىن ايتىپ ءوتتى.
– بۇگىندە ءبارى قارجى ۇنەمدەۋگە تىرىسىپ جاتىر. بۇعان بەيىمدەلۋگە تۋرا كەلەدى. دەگەنمەن دەنساۋلىق ساقتاۋ, الەۋمەتتىك دامۋ, قورعانىس, ءبىلىم سياقتى سالالاردا بيۋدجەتتىڭ قىسقارۋىنا جول بەرمەۋگە ءتيىسپىز. مۇنى ەلباسى قاتاڭ ەسكەرتتى. ەلباسىنىڭ «ءجۇز مەكتەپ, ءجۇز اۋرۋحانا» باعدارلاماسى بويىنشا سالىنعان كوپتەگەن دەنساۋلىق ساقتاۋ نىساندارى حالىققا قىزمەت كورسەتۋدە. قازىرگى زامانعا ساي جاڭا تەحنيكالار مەن قۇرال-جابدىقتار ساتىپ الىندى. ياعني, مەديتسينالىق قىزمەت كورسەتۋ ساپاسىن كوتەرۋگە ءبىزدىڭ زور مۇمكىندىكتەرىمىز بار, – دەدى داريعا نۇرسۇلتانقىزى.
بۇدان سوڭ تامارا دۇيسەنوۆا جينالعانداردى «سالاماتتى قازاقستان!» مەملەكەتتىك باعدارلاماسىنىڭ قورىتىندىسىمەن تانىستىردى. الداعى 2016-2019 جىلدارعا ارنالعان «دەنساۋلىق» مەملەكەتتىك باعدارلاماسى تۋرالى باياندادى. بۇل باعدارلامانىڭ باستى مىندەتى – 2020 جىلعا قاراي ەل ازاماتتارىنىڭ ءومىر ءسۇرۋ ۇزاقتىعىن 73 جاسقا دەيىن ۇزارتۋ. جاڭا باعدارلامانى ماماندار جان-جاقتى تالقىلادى.
كەلەلى كەڭەستى ۇكىمەت باسشىسىنىڭ ورىنباسارى بىلايشا قورىتىندىلادى «بىزدە مەديتسينالىق قىزمەتكە قاتىستى شاعىمدار ءجيى ايتىلادى. شەتەلدىڭ مەديتسينا قىزمەتىنە جۇگىنەتىندەر سانى دا سول سەبەپتەن جىلدان جىلعا ارتىپ كەلەدى. ءبىز وسىنداي ولقىلىقتاردى جويۋىمىز قاجەت. وسى ورايدا مىندەتتى مەديتسينالىق ساقتاندىرۋ قورى دارىگەرلەردىڭ رەيتينگىن كوتەرۋگە, حالىقارالىق اككرەديتاتسيا الۋعا, جالپى مەديتسينالىق قىزمەتتىڭ ساپاسى ارتۋىنا سەپتەسەدى دەپ ويلايمىن. ەڭ ءبىرىنشى – دەنساۋلىق ساقتاۋ مەكەمەلەرىندەگى پسيحولوگيالىق احۋالدى جاقسارتقانىمىز ابزال».
ءيا, كەيدە ادام جانىنا جىلى ءسوز دە ەم. سوندىقتان پسيحولوگيالىق احۋالدى جاقسارتۋ باسا ءمان بەرەتىن جاعداي. پرەمەر-ءمينيستردىڭ ورىنباسارى سالاداعى كەمشىلىكتەردى تۇزەتۋدى ەڭ قاراپايىم نارسەلەردەن باستاۋعا كەڭەس بەردى.
