مەيىرىمدى قالا
كوكتەم كەلىپ, كۇن ازداپ جىلىنعانىمەن, قالا قىستىڭ سىزىنان ءالى ارىلعان جوق. قىستى تەزىرەك شىعارىپ سالۋعا اسىققان استانالىقتار سۋ باسۋ قاۋپىن سەيىلتۋ ءۇشىن اپتا سوڭىندا ەكى قولعا ءبىر كۇرەك ۇستاپ, جاپپاي سەنبىلىككە شىقتى.
بيىل ەلورداعا بۇرىن-سوڭدى جاۋماعان قار ءتۇسىپ, سۋ باسۋ قاۋپىن كۇشەيتە ءتۇستى. سەنبىلىككە شىققان استانالىقتار, نەگىزىنەن, اۋلالاردىڭ, شاعىن اۋدانداردىڭ جانە تۇرعىن الاپتاردىڭ قارىنىڭ كۇرەلۋىنە كۇش سالدى. سولاردىڭ ىشىندە بەلسەندى جاستار ارداگەرلەردىڭ, جالعىزىلىكتى تۇرعىنداردىڭ, مۇمكىندىگى شەكتەۋلى ادامداردىڭ ۇيلەرىنە بارىپ, اۋلالارىن قاردان تازارتۋعا قولعابىس ەتتى.
– بۇل سەنبىلىكتى استانا اكىمى اسەت يسەكەشەۆتىڭ باستاماسىمەن قولعا الىنعان «مەيىرىمدى قالا» جوباسىنىڭ ماقساتتى جالعاسى دەۋگە دە بولادى. ويتكەنى قالانىڭ بەلسەندى جاستارى اۋلالارىنىڭ قارىن تازالاۋعا مۇمكىندىگى جوق وسىنداي تۇرعىنداردىڭ ۇيلەرىنە كەلىپ, كومەك قولىن سوزۋدا. ءۇش اۋدان بويىنشا 1000-نان اسا جاس ەكى قولعا ءبىر كۇرەك ۇستادى. جاستاردىڭ ىشىندە ەكسپو كورمەسىنە ءتىل ۇيرەنىپ, تىڭعىلىقتى دايىندالىپ جۇرگەن ەرىكتىلەر دە بار, – دەدى استانا قالاسىنىڭ جاستار ساياساتى ماسەلەلەرى باسقارماسىنىڭ باسشىسى اسحات ورالوۆ.
ونىڭ ايتۋىنشا, «كوكتەمگى استانا» سەنبىلىگىنىڭ اياسىندا بەلسەندى جاستار 100-دەن استام ۇيلەردىڭ اۋلالارىن تازالادى. ولار مۇنداي شارۋانى ەكى اپتا بۇرىن باستاپ كەتىپتى: بۇرناعى اپتادا 35 ءۇيدىڭ, وتكەن اپتادا 50 شاقتى ءۇيدىڭ قارىن تازالاعان.
سارىارقا اۋدانىندا مەدەۋ كوشەسىنىڭ قارت تۇرعىنى كۇلاش دونباەۆا ءبىر ۇيدە جالعىز ءوزى تۇراتىنىن, سوندىقتان اۋلاداعى ءبىراز شارۋاعا شاماسى كەلمەيتىنىن ايتىپ, سول قيۋى كەلمەي تۇرعان تىرلىك جاستاردىڭ كۇشىمەن ءبىر-اق كۇندە تۇگەسىلگەنىنە ءدان ريزا ەكەنىن جەتكىزدى.
سونىمەن قاتار, ءبىر توپ ستۋدەنتتەر قالاداعى الەۋمەتتىك نىسانداردىڭ دا قارىن كۇرەۋگە كىرىسىپ كەتتى. مىسالى, قازاق ەكونوميكا, قارجى جانە حالىقارالىق ساۋدا ۋنيۆەرسيتەتىنىڭ 50 شاقتى ستۋدەنتى ەكىگە ءبولىنىپ, الماتى اۋدانىنداعى بالالار ءۇيى مەن الەۋمەتتىك قىزمەت كورسەتۋ ورتالىعىنىڭ اينالاسىن تازالادى.
– ءبىز بۇگىن قىستان بەرى جينالىپ قالعان قاردىڭ ەرىپ, ءبىراز ابىگەرگە تۇسىرمەس ءۇشىن بالالار ءۇيىنىڭ اۋلاسىن تازالاۋعا كەلدىك. ءبىزدىڭ ۋنيۆەرسيتەت ستۋدەنتتەرىنىڭ كوبى بۇل شارادان قالىس قالماي, وسىنداي الەۋمەتتىك نىسانداردىڭ ماڭىنان تابىلدى. وسى ىسىمىزبەن كوپكە ۇلگى بولامىز دەپ ويلايمىز. ءبارىمىز بىرىگىپ جۇمىس ىستەسەك, ءبىرتالاي ءىستى ءبىتىرىپ تاستايدى ەكەنبىز. «كوز – قورقاق, قول – باتىر» دەگەن وسى عوي, – دەدى اتالمىش وقۋ ورنىنىڭ ستۋدەنتى باۋىرجان سارباسوۆ.
ەكى كۇنگە جالعاسقان سەنبىلىك كەزىندە الماتى اۋدانىندا 44 555 تەكشە مەتر قار جينالدى. وسى اۋداننىڭ وندىرىستىك-تەحنيكالىق ءبولىمىنىڭ باسشىسى ماقسات ساماتۇلىنىڭ ايتۋىنشا, قاردى جيناۋعا 116 تەحنيكا تارتىلسا, قالانىڭ شەتىنە تاسۋعا 361 جۇك كولىگى جۇمىلدىرىلدى. ال بۇل ىسكە 10 256 ادامنىڭ كۇشى جۇمسالدى. تازالىق جۇمىستارى, نەگىزىنەن, وڭتۇستىك-شىعىس, جۋكوۆكا, بازار اۋماقتارىندا جۇرگىزىلدى. جالپى, «الماتىدا» قاشىقتىعى 28 شاقىرىمدى قۇرايتىن 53 كوشە مەن تۇيىق كوشە تازالاندى. بۇل شارۋاعا 210 كاسىپورىن مەن مەكەمە اتسالىستى.
ەسىل اۋدانىندا 1736 ادام سەنبىلىككە شىعىپ, 361 ارناۋلى تەحنيكا جۇمىس ىستەدى. جالپى شىعارىلعان قاردىڭ اۋقىمى – 45 201 تەكشە مەتر. اۋداندا شىعىس يلينكا مەن ۇركەر تۇرعىن الاپتارىنا باسا كوڭىل ءبولىندى.
– بۇل جالپى قالالىق سەنبىلىكتە, ەڭ الدىمەن, جەر ۇيلەر ورنالاسقان اۋداندار مەن شەت ايماقتاردىڭ قارىنىڭ تازالانۋىنا باسا ءمان بەرىلۋدە. سۋ تاسقىنىنا قارسى شارا بولعاندىقتان, قازىر ۇركەر تۇرعىن الابىندا جۇمىس قىزۋ ءجۇرىپ جاتىر. اتالمىش ايماققا بۇگىن 174 قار شىعاراتىن تەحنيكا تارتىلدى. سونىڭ 136-سى قار شىعارۋعا ارنالسا, 34-ءى – تيەگىش. جالپى, 11 ۋچاسكەنىڭ قارى كۇرەلۋدە. سونداي-اق, ستۋدەنتتەر كەلىپ, 10 تىل ارداگەرىنىڭ ۇيىنە بارىپ, كومەك كورسەتتى, – دەدى اۋدان اپپاراتىنىڭ باس ينسپەكتورى الكەباتىر سەرىكۇلى.
ال سارىارقا اۋدانىندا ورتاق ىسكە 516 ارناۋلى تەحنيكا جۇمىلدىرىلدى. بۇل اۋداندا جۇمىستىڭ كورىگى كوكتال تۇرعىن الاپتارىندا قىزدى. جالپى, ءبىر كۇندە ونداعان قارت تۇرعىنداردىڭ ۇيلەرىنىڭ قارى كۇرەلدى. اۋدان اكىمىنىڭ ورىنباسارى ريشات تۇردىبەكوۆتىڭ ايتۋىنشا, سەنبىلىك بارىسىندا 3000-نان استام ۇيىم مەن كاسىپورىن, مەكتەپ, بالاباقشا ارەكەتتەندى. بۇل اۋداندا كوكتال-1 جانە كوكتال-2, ءوندىرىس, اگروقالاشىق تۇرعىن الاپتارى, كەرەي-جانىبەك ەسكەرتكىشىنىڭ ماڭىنداعى گۇلباقتار, مەدەۋ, بوكەەۆ, جالىن كوشەلەرى تازالاندى. وعان قوسا, بەيبىتشىلىك, اۋەزوۆ كوشەلەرى مەن رەسپۋبليكا, بوگەنباي باتىر داڭعىلدارىنىڭ ورامىشىلىك ايماقتارىندا قار كۇرەلدى.
جالپى سەنبىلىك كەزىندە قالا بويىنشا قار پوليگوندارىنا 87 672 تەكشە مەتر قار شىعارىلدى.
ەكى كۇنگە سوزىلعان «كوكتەمگى استانا» سەنبىلىگىندە قار پوليگوندارىنا 87 672 تەكشە مەتر قار شىعارىلدى. ۇش اۋدان بويىنشا 1000-نان اسا جاس ەكى قولعا ءبىر كۇرەك ۇستادى.
ورىنبەك وتەمۇرات