كەشە نۇر-سۇلتان قالاسى بويىنشا «رۋحاني جاڭعىرۋ» جوبالىق كەڭسەسى ەلوردادا جاڭادان اشىلعان №90 مەكتەپ-گيمنازياسىنا كىتاپ سىيلادى. شارا «رۋحاني جاڭعىرۋ» باعدارلاماسىنىڭ «تۋعان جەر» جوباسى مەن «30 يگى ءىس» شاراسى اياسىندا ءوتتى.
– بۇعان دەيىن مەكتەپ ديرەكتورى ەربول ىرگەبايدىڭ ۇسىنىسىمەن وسى مەكتەپتىڭ كىتاپحاناسىندا
«رۋحاني جاڭعىرۋ» بۇرىشىن اشقان ەدىك. بالالاردىڭ كىتاپقا دەگەن قىزىعۋشىلىعىن وياتۋعا مەكتەپ كىتاپحاناسىنىڭ قوسار ۇلەسى زور. سول سەبەپتى جاڭا مەكتەپتە جاڭا كىتاپتار كوبىنەن بولسىن دەپ ءۇش تىلدە جازىلعان 30 كىتاپ سىيلاپ وتىرمىز. الداعى ۋاقىتتا بۇل يگى ءىس ءوز جالعاسىن تابادى دەگەن سەنىمدەمىن, – دەدى «رۋحاني جاڭعىرۋ» جوبالىق كەڭسەسى ديرەكتورىنىڭ ورىنباسارى جازيرا بولتاەۆا.
كىتاپتاردىڭ بارلىعى «رۋحاني جاڭعىرۋ» جوباسى اياسىندا تۋعان ولكەمىزدىڭ تاريحي جانە مادەني مۇراسىن كەڭىنەن تانىستىرۋ ءۇشىن شىعارىلعان. سونىڭ ىشىندە «قاسيەتتى قازاقستان» كىتابىنا ەلىمىزدىڭ كيەلى جەرلەرى, قاسيەتتى ورىندارى مەن ۇلتتىق كۇندى مادەني مۇرالارى ەنگىزىلگەن.
– كىتاپحانامىز زاماناۋي ۇلگىدە جابدىقتالعان. «وقۋعا قۇشتار مەكتەپ», «وقۋعا قۇشتار ۇلت» جوباسى اياسىندا قازىر مەكتەبىمىزدە «كىتاپحاناعا كىتاپ سىيلا» شاراسىن ۇيىمداستىردىق. مەكتەپ ديرەكتورى ەربول ىرگەباي جەكە كىتاپحاناسىنان 250 كىتاپ, كورنەكتى قالامگەر تۇرسىن جۇرتباي 18 كىتاپ سىيعا تارتتى. سونداي-اق ۇلتتىق ۋنيۆەرسيتەتتەردەن جالپى 300-دەي كىتاپ كەلىپ ءتۇستى. «رۋحاني جاڭعىرۋ» جوبالىق كەڭسەسىنىڭ سىيعا تارتقان كىتاپتارى وقۋشىلارعا رۋحاني ازىق بولارى ءسوزسىز, – دەدى مەكتەپ كىتاپحاناشىسى گۇلنار امانجولوۆا.
