استانا اكىمى اسەت يسەكەشەۆ بۇرىن-سوڭدى جەكە عيماراتى بولماعان مەكتەپتەرگە عيمارات ءبولۋ تۋرالى شەشىم قابىلدادى.
سوڭعى 7 جىلدا ەلوردادا ورتا ءبىلىم بەرۋ وردالارىندا وقيتىندار سانى 2 ەسەگە ءوسىپ, وقۋشىلاردىڭ سانى 143 مىڭنان اسىپ جىعىلدى. جىل سايىنعى كوشى-قون مەن تۋ ەسەبىنەن بالالاردىڭ ءوسىمى ورتاشا ەسەپپەن 15-18 مىڭعا جەتتى.
وسى رەتتە اكىمدىك قالا ينفراقۇرىلىمىنىڭ قارقىندى دامىپ جاتقانىن ەسەپكە الا وتىرىپ, مەكتەپتەرگە تۇسەتىن جۇكتەمەنى ازايتۋ ماقساتىندا بىرقاتار جۇمىستار اتقارىپ جاتىر.
ماسەلەن, بيىلدىڭ وزىندە 7 مىڭعا شاقتالعان 6 مەكتەپ پايدالانۋعا بەرىلەدى. الدا تاعى 24 مەكتەپ پەن مەكتەپتەرگە جاپسارلاس 10 عيماراتتىڭ قۇرىلىسى جوسپارلانعان.
جاڭا وقۋ جىلى قارساڭىندا «اشىق اكىمدىك» جوباسى قاعيداسىن ىسكە اسىرا وتىرىپ, قالا باسشىسى مەكتەپتەرگە عيماراتتاردى ءبولۋ مەن ولارعا تۇسەتىن جۇكتەمەنى تومەندەتۋگە قاتىستى پروبلەمانى كوتەرگەن اتا-انالار توبىمەن كەزدەسىپ, شەشىمى تابىلماي كەلگەن ماسەلەنىڭ انىق-قانىعىن سۇرادى.
وسىدان 10 جىل بۇرىن ەلباسى ن.نازارباەۆتىڭ ءوزى اشقان №60 مەكتەپ-ليتسەيدىڭ جۇكتەمەسىنە قاتىستى ماسەلە العاش رەت كوتەرىلىپ وتىرعان جوق. مەكتەپتىڭ كورسەتكىشى وتە جوعارى, الايدا ونداعى نەگىزگى تۇيتكىل – اۋىسىمنىڭ كوپتىگى. وتكەن جىلى بۇل مەكتەپتە 3558 ادام وقىسا, بيىل وقۋعا 300 بالا قۇجات تاپسىرىپتى. بۇل مۇنىمەن شەكتەلمەيدى.
اكىمنىڭ قاتىسۋىمەن وتكەن كەزدەسۋ بارىسىندا كۇمىسبەكوۆ كوشەسى مەن اباي داڭعىلىنىڭ قيىلىسىندا ورنالاسقان جاڭا مەكتەپتىڭ عيماراتىنا قاتىستى ءبىلىم باسقارماسىنىڭ شەشىمى قايتا قارالدى. ەندى 1200 ورىنعا لايىقتالعان وقۋ ورنى №60 مەكتەپ-ليتسەيگە تيەسىلى بولماق. وسىلايشا, ەلوردادا №60 مەكتەپتىڭ عانا ەمەس, سول اۋداندا ورنالاسقان №1 جانە №35 مەكتەپتەردىڭ جۇكتەمەسىن تومەندەتۋگە سەپتىگىن تيگىزىپ, بىرنەشە عيماراتتى بىرىكتىرەتىن العاشقى مەكتەپ كلاستەرى قۇرىلماق. شەشىم شىعارۋدا اتالمىش مەكتەپتىڭ قالاداعى ۇزدىك مەكتەپتەردىڭ وندىعىنا كىرەتىنى ەسكەرىلدى. اتا-انالاردىڭ كوبى بالالارىن وسى مەكتەپكە بەرۋگە تىرىسادى. بۇعان قوسا, №60 مەكتەپتە ءبىلىم بەرەتىن بىلىكتىلىگى جوعارى مۇعالىمدەر قۇرامىن جاڭا كاسىپقويلار تولتىرماق. بۇل ءوز كەزەگىندە مۇعالىمدەردىڭ جۇكتەمەسىن بىركەلكى جوسپارلاۋعا مۇمكىندىك بەرەدى.
ءبىلىم كۇنى قارساڭىندا دارىندى قىزدارعا ارنالعان «ءبىلىم-يننوۆاتسيا» ليتسەيىنىڭ وقۋشىلارىنا دا جاعىمدى جاڭالىق جەتكىزدى. وقۋ ورنىنىڭ اشىلعانىنا 15 جىل بولسا دا, وعان جەكە عيمارات بولىنبەگەن ەدى. اتا-انالاردىڭ ارىزىنا قۇلاق اسقان اكىم 188-كوشەدە جاقىندا عانا بوي كوتەرگەن مەكتەپتى دارىندى قىزدارعا ارنالعان «ءبىلىم-يننوۆاتسيا» ليتسەيىنە بەرۋدى ۇيعاردى. الداعى ۋاقىتتا ليتسەي 5-سىنىپتان باستاپ وقىتۋ ءۇشىن قوسىمشا بالالار جينايدى. بۇل ءوز كەزەگىندە بولاشاقتا جۇكتەمەنى ازايتۋعا كومەكتەسەدى.
«ءبىلىم-يننوۆاتسيا» ليتسەيىنىڭ وقۋشىلارى قالالىق, رەسپۋبليكالىق, حالىقارالىق ءپان وليمپيادالارىندا جۇلدەلى ورىنداردى يەلەنىپ كەلەدى. بۇل ءبىلىم ورداسىنا وقۋعا ءتۇسۋ ءۇشىن وتكىزىلەتىن كونكۋرستىڭ جوعارى ەكەندىگىن كورسەتەدى. دالىرەك ايتقاندا, ءبىر ورىنعا 20 ادامنان كەلەدى.
سونىمەن قاتار, قالا باسشىسى ورىنباسارى قوسمان ايتمۇحامەتوۆكە مەكتەپتى كىرمە جولمەن قامتاماسىز ەتۋ, 187-كوشەدە جول قۇرىلىسى جۇمىستارىن جەدەلدەتۋدى تاپسىردى. مەكتەپكە اپاراتىن بۇل جولدار بالالارعا مەملەكەتتىك باعدارلاما بويىنشا سالىنعان ۇيلەردىڭ اۋلالارىنا كىرۋگە مۇمكىندىك بەرەدى. ءبىلىم وشاقتارىنىڭ اۋلاسىن اباتتاندىرۋ جۇمىستارى 25 تامىزعا دەيىن اياقتالادى دەپ جوسپارلانۋدا.
قازىرگى كەزدە جاڭا مەكتەپتىڭ ۋچاسكەسىندە ەكى مەردىگەر ۇيىم جۇمىس ىستەپ جاتىر. جولداردى توسەپ, كىرەبەرىس جولدار سالىنۋدا. اۋماقتى اباتتاندىرۋ جۇمىستارى 20 تامىزعا دەيىن اياقتالماق.
كەزدەسۋ سوڭىندا اسەت يسەكەشەۆ ءبىلىم باسقارماسىنا سارىارقا اۋدانى اكىمدىگىمەن بىرلەسىپ, شەشىمدى تەز ارادا جۇزەگە اسىرۋدى تاپسىردى. سونداي-اق, مەكتەپكە عيماراتتى بولۋدە تۇرعىنداردىڭ پىكىرىن ەسكەرىپ, قاۋىپسىزدىك ماسەلەسىنە ءجىتى نازار اۋدارىپ, مەكتەپتەردەگى جۇكتەمەنى ازايتۋدى نۇسقادى.
