قازاقستاندا بالالاردىڭ قاۋىپسىزدىگىن قامتاماسىز ەتۋ ماقساتىندا مەكتەپتەردى تاۋلىك بويى ارنايى كۇزەت قىزمەتىنىڭ قاداعالاۋىنا بەرۋ ماسەلەسى قارالىپ جاتىر. بۇل تۋرالى قر ءبىلىم جانە عىلىم مينيسترلىگىنىڭ بالالار قۇقىقتارىن قورعاۋ كوميتەتى توراعاسىنىڭ ورىنباسارى دۋلات جەكەباەۆ ءمالىم ەتتى.
«قازان, پەرمدە بولعان جاعداي بىزگە دە كەز كەلگەن قاۋىپكە دايار بولۋدىڭ قاجەتتىگىن كورسەتتى. بالالار قاۋىپسىزدىگىن قامتاماسىز ەتۋدە مەكتەپ كۇزەتىنە قويىلاتىن تالاپ جوعارى. كۇزەت قىزمەتى توتەنشە جاعدايعا ءاردايىم دايىن بولىپ, شۇعىل شەشىم قابىلداي ءبىلۋى ءتيىس. بۇل دەگەنىمىز – بەينەباقىلاۋ كامەراسىنىڭ ورناتىلىپ, ونىڭ تالاپ پەن ستاندارتقا سايكەس جۇمىس ىستەۋى. وسى ورايدا ءبىز حالىقارالىق تاجىريبە مەن وزگە ەلدەردە بولىپ جاتقان توتەنشە جاعدايلارعا تالداۋ جۇرگىزۋدەمىز» دەدى دۋلات جەكەباەۆ.
ونىڭ ايتۋىنشا, كەيبىر مەكتەپتەردەگى بەينەباقىلاۋ كامەراسى ءتيىستى تالاپ پەن ستاندارتقا سايكەس كەلمەيدى. ءبىلىم جانە عىلىم مينيسترلىگى قۇزىرلى ورگاندارمەن بىرلەسىپ, مەكتەپ قاۋىپسىزدىگىن تاۋلىك بويى قاداعالايتىن ارنايى كۇزەت قىزمەتىمەن قامتۋ ماسەلەسى قارالىپ جاتىر. سونىمەن قاتار بارلىق ءبىلىم بەرۋ مەكەمەلەرىندە «دابىل باتىرماسىن» ورناتۋ دا كۇن تارتىبىندە. اتالعان شارالار بيۋدجەتتەن قوسىمشا 2 ملرد تەڭگە قارجىنى تالاپ ەتەدى.
