استانا قالاسىنىڭ اكىمى التاي كولگىنوۆ ەلوردانى ارالاۋ بارىسىندا بىرقاتار مەكتەپتىڭ قۇرىلىسىمەن تانىستى.
– مەكتەپ سالۋ – وزەكتى ماسەلە. ەلوردا تۇرعىندارىنىڭ جىل سايىن ارتىپ كەلە جاتقانى ەسكەرىلىپ, وقۋ ورىندارى ورنالاساتىن جەر ۋچاسكەلەرىنىڭ دە سانىن كوبەيتتىك. قازىرگى ۋاقىتتا مەكتەپ سالىناتىن 102 جەر ۋچاسكەسىن بەلگىلەدىك. جەر ۋچاسكەلەرى الەۋمەتتىك نىسانداردىڭ قاجەتتىلىگىنە وراي قالانىڭ بارلىق اۋدانىندا ورنالاسقان. ماسەلەن, ەلوردا تۇرعىندارى كوبىرەك شوعىرلانعان جانە قارقىندى دامىپ كەلە جاتقان ەسىل اۋدانىندا مەكتەپ سالىناتىن – 49 ۋچاسكە, الماتى اۋدانىندا – 29 ۋچاسكە جانە ت. ب., – دەدى اكىم.
مەكتەپ پەن وزگە دە ماڭىزدى الەۋمەتتىك نىساندار سالۋ ءۇشىن بولىنگەن جەر ۋچاسكەلەرى قالانىڭ بارلىق اۋدانىندا ورنالاسقان. ولاردىڭ سانى جىل سايىن ارتادى. ءار اۋداندا جانە شاعىن اۋدانداردا وقۋ ورىندارى بولۋى ءۇشىن ەگجەي-تەگجەيلى جوسپارلاۋ جوباسىنا ارنايى باعىت بەكىتىلەتىنىن ايتا كەلە, ەلوردا اكىمى مەملەكەت باسشىسىنىڭ تاپسىرماسى بويىنشا «جايلى مەكتەپ» ۇلتتىق جوباسى اياسىندا جۇزەگە اسىرىلىپ جاتقان جۇمىستارعا توقتالدى.
– مەملەكەت باسشىسىنىڭ تاپسىرماسى بويىنشا «جايلى مەكتەپ» ۇلتتىق جوباسى اياسىندا 23 اسا ءىرى مەكتەپتىڭ جوباسىن جۇرگىزىپ جاتىرمىز. بۇل 23 مەكتەپ 2 اۋىسىمدا 84 مىڭنان استام وقۋشىنى قامتۋعا مۇمكىندىك بەرەدى. «جايلى مەكتەپ» جوباسى اياسىندا ءبىلىم وشاقتارىنىڭ قۇرىلىسىن كەلەسى جىلى باستايمىز. وسىلايشا, ءبىز اۋقىمدى مەكتەپتەر سالۋدى جالعاستىرامىز. وسىعان دەيىن استانادا 6 ءىرى مەكتەپ اشتىق, ولاردىڭ ارقايسىسى 4 مىڭ وقۋشى ورنىنا (6 مەكتەپتەگى وقۋشى ورىندارىنىڭ جالپى سانى – 2 اۋىسىمدا 24 مىڭ) ەسەپتەلگەن, – دەدى ا.كولگىنوۆ.
قالانى ارالاۋ بارىسىندا باس شاھار باسشىسى ۇلى دالا داڭعىلىندا, ۇلى دالا مەن ساۋران داڭعىلىنىڭ قيىلىسىندا, 187-كوشەدە جانە قاراساي باتىر كوشەسىندە ورنالاسقان بىرقاتار مەكتەپتىڭ قۇرىلىس بارىسىمەن تانىستى.
– ۇلى دالا داڭعىلىندا, ۇلى دالا مەن ساۋران داڭعىلىنىڭ قيىلىسىندا, 187-كوشەدە جانە قاراساي باتىر كوشەسىندە ورنالاسقان مەكتەپتەردى بيىلعى وقۋ جىلىندا اشۋدى جوسپارلاپ وتىرمىز. جالپى, ەلوردادا 2019 جىلدان باستاپ 93 مىڭ وقۋشى ورنىنا ارنالعان 2 اۋىسىمدى 45 مەكتەپ سالىندى. ونىڭ 9-ىن بيىلعى وقۋ جىلىندا اشامىز, – دەدى قالا باسشىسى.
