ەل تاۋەلسىزدىگىنىڭ 30 جىلدىق مەرەيتويىنا وراي الماتى اۋدانى اكىمىنىڭ اپپاراتى №63 مەكتەپ-گيمنازياسىمەن بىرگە «مەملەكەتتىلىك – ەڭ الدىمەن تاۋەلسىزدىك, پاتريوتيزم جانە حالىقتىڭ رۋحى» اتتى عىلىمي-پراكتيكالىق كونفەرەنتسيا ۇيىمداستىردى.
القالى جيىنعا مەملەكەتتىك ەلتاڭبانىڭ اۆتورى جانداربەك مالىبەكۇلى, الماتى اۋدانىنىڭ اكىمى ەرلان بەكمىرزاەۆ, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ تاريح فاكۋلتەتىنىڭ دەكانى, تاريح عىلىمدارىنىڭ دوكتورى, پروفەسسور تىلەگەن سادىقوۆ, «م.س.نارىكباەۆ اتىنداعى كازگيۋ ۋنيۆەرسيتەتى» اق باسقارما توراعاسىنىڭ ورىنباسارى ەربولات مۇحامەدجان, ەلوردا مەكتەپتەرىنىڭ باسشىلارى قاتىستى.
كونفەرەنتسيانىڭ نەگىزگى ماقساتى – جاستارعا ءبىلىمدى, عىلىمدى جانە پاتريوتتىق تاربيەنى بەرۋدىڭ وزەكتى ماسەلەلەرىن شەشۋدە عىلىمي كوزقاراستى قالىپتاستىرۋعا ىقپال ەتۋ بولدى. شارا اياسىندا استانالىق مەكتەپتەر كوماندالارى اراسىندا روبوتوتەحنيكا بويىنشا سايىستار وتكىزىلدى. سايىس قورىتىندىسىندا ءۇش اتالىم بويىنشا جەڭىمپاز كوماندالار ديپلوممەن ماراپاتتالىپ, باس جۇلدەگە يە بولعان №63 مەكتەپ-گيمنازياسىنىڭ كومانداسى اۋدان اكىمىنىڭ اتىنان ءبىرىنشى دارەجەدەگى ديپلوم مەن باعالى سىيلىققا يە بولدى.
