مەملەكەت باسشىسى يزرايل مەملەكەتىنىڭ پرەمەر-ءمينيسترى بينيامين نەتانياحۋمەن وتكەن كەلىسسوزدەر قورىتىندىسى بويىنشا باق وكىلدەرى ءۇشىن ءباسپاسوز بريفينگىن وتكىزدى
ەلباسى كەلىسسوزدەردىڭ اشىق ءارى سىندارلى سيپاتتا وتكەنىن ايتتى.
– ءبىز ەكىجاقتى ءوزارا ءىس-قيمىلدىڭ كەشەندى ماسەلەلەرىن تالقىلاپ, حالىقارالىق وزەكتى پروبلەمالار جونىندە پىكىر الماستىق. كەزدەسۋ قورىتىندىسىنا سايكەس, قازاقستان مەن ءيزرايلدىڭ كوپتەگەن اۋقىمدى ماسەلەلەر جونىندە ءوزارا ءتيىمدى ءىس-قيمىل جاساي الاتىنىن تولىق سەنىممەن ايتۋعا بولادى, – دەدى قازاقستان پرەزيدەنتى.
نۇرسۇلتان نازارباەۆ پەن بينيامين نەتانياحۋ ساۋدا-ەكونوميكا ماسەلەلەرىنە ايرىقشا نازار اۋدارىپ, جاھاندىق نارىقتىڭ جالپى ساۋدا اينالىمىنداعى ءتيىمسىز احۋالدىڭ كەرى اسەرىن اتاپ ءوتتى. وسىعان بايلانىستى, تاراپتار ءوزارا ەكونوميكالىق ءىس-قيمىلدى جانداندىرۋ ءۇشىن قانداي مۇمكىندىكتەردى پايدالانۋ قاجەت ەكەنىن تالقىلادى.
– ەلدەرىمىز اراسىنداعى تىكەلەي اۋە قاتىناسىن قالىپقا كەلتىرۋ جانە ۆيزاسىز رەجىمدى ەنگىزۋ ماسەلەسىن پىسىقتاۋ جونىندەگى ۋاعدالاستىققا قول جەتكىزىلدى. مۇنداي شارالار بيزنەس سالاسىنداعى ەكىجاقتى بايلانىستار مەن تۋريزم سالاسىنداعى ىنتىماقتاستىقتى نىعايتۋعا سەپتىگىن تيگىزۋگە ءتيىس, – دەدى مەملەكەت باسشىسى.
قازاقستان پرەزيدەنتى ەۋرازيالىق ەكونوميكالىق وداق پەن يزرايل اراسىندا ەركىن ساۋدا ايماعىن قۇرۋ ەكى ەلدىڭ ىسكەرلىك بايلانىستارىن دامىتۋعا ەلەۋلى ىقپال ەتەتىنىن جانە قازىر بۇل جونىندە ناقتى كەلىسسوزدەر جۇرگىزىلىپ جاتقانىن اتاپ ءوتتى.
– بۇگىن حالىقارالىق جانە وڭىرلىك ماسەلەلەر جونىندە دە قىزۋ ءارى اشىق پىكىر الماستىق. بىرىككەن ۇلتتار ۇيىمى, ازياداعى ءوزارا ءىس-قيمىل جانە سەنىم شارالارى جونىندەگى كەڭەس جانە باسقا دا كوپتاراپتى ۇيىمدار مەن فورۋمدار ءوزارا ءىس-قيمىلىمىزدىڭ ماڭىزدى ورنى رەتىندە قاراستىرىلدى, – دەدى نۇرسۇلتان نازارباەۆ.
مەملەكەت باسشىسى كەزدەسۋ قورىتىندىسى بويىنشا تاراپتاردىڭ ساياسي ديالوگتى ۇدايى قولداۋ, بايلانىستاردى بارلىق دەڭگەيدە دامىتۋ, سونداي-اق سەرىكتەستىكتى جاڭا ساپالى دەڭگەيگە كوتەرۋ ءۇشىن بىرلەسە كۇش-جىگەر جۇمساۋ جونىندە كەلىسىمگە كەلگەنىن مالىمدەدى.
– ۋاعدالاستىقتاردىڭ قارقىندى تۇردە ىسكە اسۋى بۇگىن ءبىز تالقىلاعان بارلىق باعىت بويىنشا ەكىجاقتى ءوزارا ءىس-قيمىلدى ودان ءارى دامىتۋعا ىقپال ەتەدى دەپ سەنەمىن, – دەدى قازاقستان پرەزيدەنتى.
ءباسپاسوز بريفينگىنىڭ سوڭىندا نۇرسۇلتان نازارباەۆ دوستاس يزرايل حالقىن الداعى كەلە جاتقان حانۋكا مەرەكەسىمەن قۇتتىقتادى.
www.akorda.kz
