تاۋەلسىزدىك كۇنى مەرەكەسى قارساڭىندا قازاقستان رەسپۋبليكاسى پرەزيدەنتىنىڭ جارلىعىمەن مەملەكەتىمىزدىڭ الەۋمەتتىك- ەكونوميكالىق جانە مادەني دامۋىنا, حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى, بەلسەندى قوعامدىق قىزمەتى ءۇشىن ەل ازاماتتارىنىڭ ۇلكەن ءبىر توبى مەملەكەتتىك ناگرادالارمەن ماراپاتتالدى.
ولاردىڭ قاتارىندا ءوندىرىس, بيزنەس, ءبىلىم بەرۋ, دەنساۋلىق ساقتاۋ سالالارىنىڭ كورنەكتى وكىلدەرى, اسكەري قىزمەتشىلەر, قۇقىق قورعاۋ ورگاندارىنىڭ قىزمەتكەرلەرى, سپورتشىلار, سوعىس جانە ەڭبەك ارداگەرلەرى, مادەنيەت جانە عىلىم قايراتكەرلەرى بار.
قاسىم-جومارت توقاەۆ سالتاناتتى راسىمگە قاتىسۋشىلاردى تاۋەلسىزدىك كۇنىمەن قۇتتىقتاپ, ەگەمەندىك ەلىمىزدىڭ باعا جەتپەس بايلىعى ەكەنىن ايتتى. قازاقستان پرەزيدەنتى سالتاناتتى راسىمدە سويلەگەن سوزىندە مەملەكەتتىك ناگرادا العان ازاماتتاردىڭ سىڭىرگەن ەڭبەگىن جوعارى باعالادى.
– بايراقتى بابالارىمىز بىزگە ۇلان-بايتاق جەردى مۇرا ەتىپ قالدىردى. ولاردىڭ اماناتىنا ادال بولۋ – بارشامىزدىڭ كيەلى پارىزىمىز. ازاتتىق ءۇشىن الىسىپ, ەل ءۇشىن جانىن پيدا ەتكەن باتىرلاردىڭ ەرلىگى ەشقاشان ۇمىتىلمايدى, – دەدى قازاقستان پرەزيدەنتى.
قاسىم-جومارت كەمەلۇلى «قازاقستاننىڭ ەڭبەك ەرى» اتاعى ۇلتتىق مادەنيەتتى دامىتۋعا قوسقان ايرىقشا ۇلەسى, ءان ونەرىن ناسيحاتتاۋداعى ەرەكشە ەڭبەگى ءۇشىن روزا رىمباەۆاعا تابىس ەتتى. ۇلىق ماراپات وندىرىستىك قىزمەتتەگى ەرەكشە ەڭبەگى ءۇشىن «قازاقمىس كورپوراتسياسى» جشس فيليالى – «جەزقازعانتۇستىمەت» ءوب كەن وندىرىستىك كەشەنىنىڭ ۇڭعىلاۋشىسى تۇرسىنبەك ماكيشەۆكە دە بەرىلدى.
قازاقستاننىڭ تانىمال جازۋشى-عالىمدارىنىڭ دا ەل تاۋەلسىزدىگىنە قوسقان ۇلەسى ماراپاتتالدى. ولاردىڭ قاتارىندا بەلگىلى سازگەر-جازۋشى ي.جاقانوۆ, ت.ابدىكۇلى, س.ابدراحمانوۆ, عالىم جانە قوعام قايراتكەرى ا.احمەتوۆ, ەلورداداعى ساكەن سەيفۋلليننىڭ مۇراجايىنىڭ ديرەكتورى ن.ايتۇلى, اقىن م.ايتحوجا, تاعى باسقا ازاماتتار بار. جوعارى ماراپاتقا عالىمداردان ابايتانۋشى م.مىرزاحمەتۇلى, تاريحشى م.قويگەلديەۆ, ق.سالعاراۇلى, ا.جۇمادىلداەۆ يە بولدى.
«قازاقستاننىڭ ەڭبەك سىڭىرگەن قايراتكەرى» قۇرمەتتى اتاعى عىلىم جانە مادەنيەت سالاسىنىڭ 36 كورنەكتى وكىلىنە بەرىلدى, ولاردىڭ ىشىندە بەلگىلى تالانتتى ءانشى ديماش قۇدايبەرگەن بار.
ونەركاسىپ, كولىك, قۇرىلىس, اۋىل شارۋاشىلىعى جانە باسقا ماتەريالدىق ءوندىرىس سالالارىنىڭ 72 جۇمىسشىسى مەن ەڭبەككەرى ءىىى دارەجەلى «ەڭبەك داڭقى» وردەنىنىڭ يەگەرلەرى اتاندى.
اسكەري جانە قىزمەتتىك بورىشىن ۇلگىلى اتقارعانى, زاڭدىلىق پەن قۇقىقتىق ءتارتىپتى قامتاماسىز ەتۋدە كورسەتكەن ەرلىگى مەن جانقيارلىعى, ەلدىڭ ۇلتتىق قاۋىپسىزدىگى مەن قورعانىس قابىلەتىن نىعايتۋعا قوسقان ۇلەسى ءۇشىن اسكەري قىزمەتشىلەر مەن قۇقىق قورعاۋ ورگاندارى وكىلدەرىنىڭ ءبىر توبى ءى جانە ءىى دارەجەلى «داڭق», سونداي-اق ءى, ءىى, ءىىى دارەجەلى «ايبىن» وردەندەرىمەن, «ەرلىگى ءۇشىن» جانە «جاۋىنگەرلىك ەرلىگى ءۇشىن» مەدالدارىمەن ماراپاتتالدى.
