كەشە ەلوردا اكىمدىگىندە استانا قالاسىنىڭ قوعامدىق دەنساۋلىق ساقتاۋ باسقارماسى مەن ينچحون (وڭتۇستىك كورەيا) قالالىق اكىمشىلىگى دەنساۋلىق ساقتاۋ دەپارتامەنتى اراسىندا مەديتسينالىق ىنتىماقتاستىق جونىندەگى مەموراندۋمعا قول قويىلدى. كەزدەسۋگە ينچحون قالالىق اكىمشىلىگىنىڭ حالىقارالىق مەديتسينالىق ءبولىمىنىڭ باستىعى سو گي حو مىرزا باستاعان دەلەگاتسيا وكىلدەرى, استانا قالاسىنداعى دارىگەرلىك ۇيىمداردىڭ جەتەكشىلەرى قاتىستى.
كەزدەسۋ بارىسىندا تاراپتار ءبىر-بىرىمەن قالالاردىڭ حالقى, دەنساۋلىق ساقتاۋ مەكەمەلەرى, ۇزدىك تاجىريبەلەر توڭىرەگىندە اقپارات الماستى. شەتەلدىك قوناقتار ەلورداداعى مەديتسينالىق مەكەمەلەردى جەكەمەنشىك باسقارۋعا بەرۋ تاجىريبەسىنە قىزىعۋشىلىق تانىتتى. استانا قالاسى قوعامدىق دەنساۋلىق ساقتاۋ باسقارماسىنىڭ جەتەكشىسى كامالجان نادىروۆ وڭتۇستىك كورەيالىق ارىپتەستەرىمەن تىعىز قارىم-قاتىناس ورناتۋعا مۇددەلى ەكەنىن مالىمدەدى.
مەموراندۋمنىڭ ماقساتى – ءوزارا ءتيىمدى جانە تەڭ دارەجەدە ەكى قالانىڭ ۇيىمدارى اراسىنداعى ىنتىماقتاستىق قارىم-قاتىناستاردى قالىپتاستىرۋ. مەموراندۋم شەڭبەرىندە بىرلەسكەن ءىس-شارالار مىناداي فورمادا جۇزەگە اسىرىلادى: بىرىنشىدەن, ينچحون مەن استانانىڭ مەديتسينالىق مەكەمەلەرى اراسىنداعى ءبىلىم بەرۋ باعدارلاماسىمەن الماسۋ. ەكىنشىدەن, ەكى جاقتى قاتىناستاردى جانداندىرۋ جانە ماركەتينگ قىزمەتىن جەتىلدىرۋ سالاسىنداعى ۇزدىك تەحنولوگيالارمەن, ىنتىماقتاستىقپەن الماسۋ. ۇشىنشىدەن, تاراپتار ەكى قالا اراسىنداعى مەديتسينالىق قىزمەت سالاسىنداعى اقپاراتتارمەن بولىسەدى.
