العىس ايتۋ كۇنىن استانالىقتار اسقان بەلسەندىلىكپەن تويلادى.
مەرەكە بارىسىندا ەلوردالىق وقۋشىلار مەن ەتنومادەني بىرلەستىك مۇشەلەرى ۇلتتىق مۋزەيدە باس قوستى. «ءبىر شاڭىراق استىندا» دەگەن اتپەن ۇيىمداستىرىلعان فەستيۆال كۇللى قاۋىمدى قىزىققا كەنەلتىپ, مارە-سارە قىلدى. وسى شارا شەڭبەرىندە قولدان جاسالعان بۇيىمداردىڭ جارمەڭكەسى ءوتتى. ىشىندە نە جوق دەيسىز؟! توقىما باس كيىم, سومكە, اشەكەيدىڭ الۋان ءتۇرى, كوزدىڭ جاۋىن الاتىن كارتينا – ءبارى بار. «ۆوزروجدەنيە» نەمىس قوعامىنا قاراستى قولونەر ۇيىرمەسىنىڭ جەتەكشىسى تاتيانا گۋساكتىڭ ايتۋىنشا, مۇنىڭ ءبارىن ورتالىققا كەلىپ جۇرەتىن بالالار مەن اجەلەر جاساپتى. ولاردىڭ ارقايسىسى ءبىر ۇلتتىڭ تانىم-تۇسىنىگىنەن حابار بەرىپ, ەرەكشەلىگىن تانىتادى. مىسالى, بيسەرمەن, كەستەمەن كومكەرىلگەن دۇنيەلەر, كوبىنەسە, نەمىس مادەنيەتىنە ءتان. سونداي-اق, جيىن بارىسىندا قازاق كۇيلەرى ورىندالىپ, ورىس اندەرى شىرقالدى. ارميان ءبيى جۇرتشىلىقتىڭ دەلەبەسىن قوزدىرىپ, مەرەكەنىڭ ءسانىن كىرگىزدى.
مەيرامدى باس قالانىڭ ءتارتىپ ساقشىلارى دا ەلەۋسىز قالدىرمادى. بۇل كۇنى يۋۆەنالدى پوليتسيا ينسپەكتورلارى انا مەن بالا ۇلتتىق عىلىمي ورتالىعىنا بارىپ, ونكولوگيالىق اۋرۋلارمەن ناۋقاستاناتىن بۇلدىرشىندەردىڭ كوڭىلىن سەرپىلتتى. بالدىرعاندارعا كوركەم ادەبي كىتاپتار مەن ەنتسيكلوپەديالاردى سىيعا تارتىپ, كادەسىيلار ۇلەستىردى. مۇنىمەن قوسا, قۇقىق قورعاۋشىلار تۇرمىسى تومەن وتباسىدان شىققان 60 بالانى ماكسيم گوركي اتىنداعى مەملەكەتتىك اكادەميالىق ورىس دراما تەاترىنا شاقىردى. جاقسىلىق جاساۋ يدەياسى قوعامدا تەز تاراسىن دەگەن نيەتپەن پوليتسەيلەر جاندارىنا كىشكەنتاي كومەكشىلەر ەرتىپ, شاھاردىڭ ادام كوپ جينالاتىن جەرلەرىن ارالادى. بالالار جولاي كەزدەسكەن قارت كىسىلەرگە ءوز قولدارىنان شىققان ادەمى زاتتاردى سىيلاپ, قاريالاردىڭ باتاسىن الدى.
ب. ماراتقىزى, astana-akshamy.kz
