ەلوردادا «Astana Piano Passion» حالىقارالىق كلاسسيكالىق مۋزىكا فەستيۆالى مەن جاس پيانيستەر بايقاۋى باستالدى. وسىمەن ەكىنشى رەت وتكىزىلىپ وتىرعان سايىس بيىل 6 كۇنگە سوزىلادى. وعان قازاقستان, رەسەي, قىتاي, سەربيا, جاپونيا, يتاليا مەملەكەتتەرىنىڭ ەڭ ۇزدىك جاس مۋزىكانتتارى ىرىكتەلىپ الىندى.
اشىلۋ سالتاناتىندا استانا قالاسىنىڭ اكىمى يمانعالي تاسماعامبەتوۆ: «Astana Piano Passion» ەكىنشى حالىقارالىق كلاسسيكالىق مۋزىكا فەستيۆالى جانە جاس پيانيستەر بايقاۋىندا سىزدەردى كورىپ وتىرعانىما قۋانىشتىمىن. وتكەن جىلى بۇل بايقاۋ تاڭ قالدىرارلىق دارەجەدە قاتىسۋشىلار جيناپ, كلاسسيكالىق مۋزىكاعا بەيجاي قارامايتىن الەمنىڭ بارلىق ونەرلى ورەندەرىن شاقىردى. «Astana Piano Passion» ونەر كەڭىستىگىندە جاستاردىڭ جۇلدىزىن جاعىپ, ولار ون شاقتى كونتسەرت بەرىپ, الەمنىڭ ءتۇرلى ساحنالارىندا ونەر كورسەتىپ ۇلگەرگەندىگى كوڭىل قۋانتادى. مىنەكەي, سول ۋاقىتتان بەرى ءبىز جاس ورەندەردىڭ ونەرلەرىن تاماشالاپ, قازاقتىڭ جانە الەم كلاسسيكتەرىنىڭ شىعارمالارىن تىڭداۋدامىز, بۇل – ونەرلى جاستاردىڭ تالانتتارىن شىڭداپ, كەڭىنەن قانات قاقتىرۋعا ۇلكەن مۇمكىندىك دەپ بىلەمىن», – دەپ اتاپ وتكەن بولاتىن.
ەلىمىزدە «Astana Piano Passion» بايقاۋى بىلتىر كورەرمەن اراسىندا زور قولداۋعا يە بولدى. بۇكىل مۋزىكا الەمى ءۇشىن ايتۋلى وقيعاعا اينالدى. ونى 3 قۇرلىقتان 100 مىڭنان استام ادام تاماشالادى. ال, بيىل وعان قاتىسۋعا 23 ەلدەن 120 ۇسىنىس كەلىپ ءتۇسىپتى. اراسىنان 30 ۇزدىك, ەڭ ونەرلىلەرى ىرىكتەلىپ الىندى. بۇگىندە ولار الەمنىڭ 11 ەلىنەن قاتىسىپ جاتىر.
سونداي-اق, دارىندىلاردى دارالاۋ ءۇشىن قازاقستان, رەسەي, فرانتسيا جانە وڭتۇستىك كورەيا ەلدەرىنىڭ ۇزدىك پيانيستەرى شاقىرىلدى. ولاردىڭ اراسىندا قر حالىق ءارتىسى, قۇرمانعازى اتىنداعى قازاق ۇلتتىق كونسەرۆاتورياسىنىڭ رەكتورى ءجانيا اۋباكىروۆا, «استانا-وپەرا» وپەرا جانە بالەت تەاترىنىڭ باس ديرەكتورى تولەگەن مۇحامەدجانوۆ, رف پرەزيدەنتى جانىنداعى مادەنيەت جانە ونەر جونىندەگى كەڭەستىڭ مۇشەسى ەكاتەرينا مەچەتينا, سەۋلدەگى ۇلتتىق ۋنيۆەرسيتەتتىڭ پروفەسسورى حيۋنگ-دجۋن چانگ, ۇزدىك كۇيتاباق گران-ءپريىنىڭ بەس مارتە يەگەرى, پاريج كونسەرۆاتورياسىنىڭ مۇعالىمى ميشەل بەروفف, رەسەيدىڭ ەڭبەك سىڭىرگەن ءارتىسى, پ.ي.چايكوۆسكي اتىنداعى رەسەي مەملەكەتتىك كونسەرۆاتورياسىنىڭ رەكتورى ۆالەري پياسەتسكي جانە قازىلار القاسىنىڭ قۇرمەتتى مۇشەسى دەنيس ماتسۋەۆ بار.
«ايتۋلى ونەر سايىسىندا تالانتتى جاس پيانيستەردىڭ شەبەرلىگى عانا سىنالىپ قويماي, ءتۇرلى رۋحاني شارالار دا ۇيىمداستىرىلۋدا. باستى ماقساتىمىز – تالانتتى بالالاردى قولداپ, قازاقستاننىڭ ۇلتتىق فورتەپيانو مەكتەبى ءداستۇرىن نىعايتۋ. سونىمەن قاتار, حالىقارالىق دەڭگەيدە تاجىريبە الماسۋ. ەڭ الدىمەن, بۇل قازاقستاندا كاسىبي مۋزىكالىق ءبىلىم دەڭگەيىن كوتەرۋگە وڭ ىقپال ەتەدى» دەيدى رەسەيدىڭ حالىق ءارتىسى دەنيس ماتسۋەۆ.
سونداي-اق, ماەسترو بايقاۋعا قاتىسۋشى بالالاردىڭ ورىنداۋىنداعى قازاق اۆتورلارىنىڭ شىعارمالارى وزىنە ۇنايتىنىن اتاپ ءوتتى. ولاردىڭ ءبىرىن ءوز رەپەرتۋارىنا قوسۋ مۇمكىندىگىن جوققا شىعارمايدى.
ال, قازىلار القاسىنىڭ مۇشەسى ءجانيا اۋباكىروۆا: «قاتىسۋشىلاردىڭ دەڭگەيى وتە جوعارى, اسىرەسە, ورتا توپتىڭ. مەنىڭ ويىمشا, وتكەن جىلعى بايقاۋدان ايتارلىقتاي ايىرماشىلىعى جوق. بيىل دا لايىقتى ۇمىتكەرلەردى ىرىكتەۋ قيىن بولماق», – دەيدى.
ايتپاقشى, قاتىسۋشىلاردىڭ ونەرىنە تەك قانا قازىلار القاسى ەمەس, سونداي-اق, كەزكەلگەن ادام ونلاين رەجيمىندە داۋىس بەرە الادى. بۇل جارىستىڭ ادىلەتتى وتەتىنىنە كەپىلدىك بەرەدى دەيدى ماماندار.
جاس مۋزىكانتتاردىڭ شىعارماشىلىق تۇرعىدان قالىپتاسۋىنا جول اشاتىن بايقاۋدىڭ جۇلدە قورى – 60 مىڭ اقش دوللارى. ۇيىمداستىرۋشىلاردىڭ ايتۋىنشا, ەشكىم سىيلىقسىز قالمايدى. ارينە, ولار ءۇشىن ەڭ باستى سىي – وسى جارىس ارقىلى ونەر الەمىنە جولداما الۋ.
10 جاستاعى ءسانجارالى كوپباەۆ بۇل ونەر دوداسىنا ءبىر ەمەس, ەكىنشى رەت قاتىسىپ وتىر. بىلتىر ول ەكىنشى ورىن الىپ, لاۋرەات اتاندى. بيىل ءبىرىنشى ورىننان دامەلى. «مەن وسى كونكۋرسقا قاتىسقانىما وتە قۋانىشتىمىن. بيىل جەڭۋگە تىرىسامىن», – دەيدى ۇكىلى ءۇمىت يەسى.
بۇل فەستيۆال مادەنيەت سالاسىنداعى حالىقارالىق بايلانىستاردى جاقسارتىپ, جاس تالانتتاردى قولداپ قانا قويماي, سونىمەن قاتار, قازاق كومپوزيتورلارىنىڭ مۋزىكاسىن ناسيحاتتاۋعا ۇلكەن مۇمكىنشىلىك بەرەدى. ويتكەنى, ولاردىڭ شىعارمالارى بايقاۋ قاتىسۋشىلارىنىڭ باعدارلاماسىنا ەنۋگە مىندەتتەلگەن. وعان قوسا, وسى فەستيۆال اياسىندا ءار كۇنى ءتۇرلى ءىس-شارالار وتكىزىلىپ وتىرادى. ماسەلەن, 10 مامىر كۇنى «Astana Piano Passion-2013» لاۋرەاتتارىنىڭ كونتسەرتى بولسا, كەشە ماسكەۋ فيلارمونياسىنىڭ ءانشىسى ەكاتەرينا مەچەتينانىڭ كەشى ۇيىمداستىرىلدى. الداعى ۋاقىتتا دەنيس ماتسۋەۆتىڭ جانە جارتىلاي فينالعا جولداما العان ونەرپازداردىڭ كەشى وتەدى. بۇدان بولەك, جاس دارىندار مەن ولاردىڭ وقىتۋشىلارىنا شەبەرلىك سىنىبى جۇرگىزىلەدى. ونى Grand Prix du Disque سىيلىعىنىڭ بەس دۇركىن يەگەرى ميشەل بەروفف جانە سەۋلدەگى ۇلتتىق ۋنيۆەرسيتەتتىڭ پروفەسسورى حيۋنگ-دجۋن چانگ وتكىزەدى.
ەركەجان ساتىمبەك
