ەلوردا اكىمى التاي كولگىنوۆ قوعام قايراتكەرى ورازكۇل اسانعازىعا مەملەكەت باسشىسى قاسىم-جومارت توقاەۆتىڭ مەرەيتوي يەسىنە زور دەنساۋلىق, باياندى باقىت تىلەگەن قۇتتىقتاۋ حاتىن تابىستادى.
قالالىق ءماسليحات دەپۋتاتتارى دا كورنەكتى قوعام قايراتكەرى, قازاقتىڭ قايسار قىزى, بەلگىلى ءتىل جاناشىرى ورازكۇل اسانعازىقىزىن مەرەيلى جەتپىس جاسىمەن قۇتتىقتادى.
ورازكۇل اسانعازىقىزى – سانالى عۇمىرىن ەلگە قىزمەت ەتۋگە, ءتول رۋحانياتىمىز بەن انا ءتىلىمىزدىڭ جاعدايىن جاقسارتۋعا ارناعان ارداقتى ازامات.
الاش بالاسىنا سىيلى قايراتكەر, وتباسىنا ونەگەلى انا, وتاعاسىنا ادال جار بولا بىلگەن و.اسانعازىقىزى ەل استاناسى الماتىدان ارقا تورىنە كوشكەن كەزدە باس شاھارىمىزعا كەلىپ, كوپ جىلدار بويى جەمىستى ەڭبەك ەتتى. سارىارقا اۋدانى اكىمىنىڭ ورىنباسارى, تىلدەردى دامىتۋ باسقارماسىنىڭ باسشىسى, قازاقستان رەسپۋبليكاسى پارلامەنتى ءماجىلىسىنىڭ دەپۋتاتى سىندى لاۋازىمداردا ابىرويمەن قىزمەت اتقاردى.
شارا بارىسىندا ورازكۇل اسانعازىقىزىمەن ۇزاق جىلدار بىرگە قىزمەت ەتكەن اعا-اپالارى سۆەتلانا جالماعانبەتوۆا, نادەجدا پەتۋحوۆا, ءاسيما بيمەندينا, ءسابيلا مۇستافينا, ساپار احمەتوۆ, ايمان مۇساقوجاەۆا جانە ت. ب. ەستەلىك اڭگىمەلەرىن ايتىپ, مەرەيتوي يەسىنە جىلى لەبىزدەرىن ءبىلدىردى.
