كەشە استانانىڭ الماتى قالاسىنداعى مادەني كۇندەرى باستالدى. ەلوردانىڭ ارتىستەرى مەن ونەر ۇجىمدارىنىڭ باس قالانىڭ 20 جىلدىعىنا ارنالعان ەل وڭىرلەرىندەگى بيىلعى گاسترولدىك تۋرى وسى قالادا تۇيىندەلەدى.
الماتىلىقتار ءبىر اپتا بويى تاۋەلسىزدىك سارايىنىڭ ۇجىمى دايىنداعان «اق تىلەكپەن, استانا!» كورمەسىن, استانالىق تەاترلار رەپەرتۋارىنداعى ۇزدىك قويىلىمداردى, شىعارماشىلىق ۇجىمدارىنىڭ كونتسەرتتەرىن تاماشالاي الادى.
اتاپ ايتساق, ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى م.اۋەزوۆتىڭ «قاراش-قاراش» الەۋمەتتىك دراماسىن, ۋ.شەكسپيردىڭ «وتەللو» تراگەدياسىن جانە ا.چەحوۆتىڭ «شيە» سپەكتاكلىن ۇسىنادى.
«جاستار» تەاترى م.لەۆيدىڭ «اسپان مەن جەر اراسىندا» مەلودراماسىن, ج.پ.پيلو مەن و.شۋلتەزدىڭ «موتسارت» ميۋزيكلىن قويادى. م.گوركي اتىنداعى مەملەكەتتىك اكادەميالىق ورىس دراما تەاترى ب.جانداربەكوۆتىڭ «توميريس – ساقتار پاتشايىمى» ەپيكالىق دراماسىن, ا.پۋشكيننىڭ «ەۆگەني ونەگين» قويىلىمدارىن كورسەتەدى. استانانىڭ قۋىرشاقتار تەاترى ر.مۇقانوۆانىڭ «ماڭگىلىك بالا بەينە», «بايقا جولدا, بالاقاي» سپەكتاكلدەرىن ۇسىنادى.
ع.جۇبانوۆا اتىنداعى مەملەكەتتىك ىشەكتى اسپاپتار كۆارتەتى «ۇلى دالا اۋەندەرى» باعدارلاماسىمەن ونەر كورسەتەدى. استانانىڭ مەملەكەتتىك اكادەميالىق فيلارمونياسىنىڭ قازاق وركەسترى «ەلوردادان ەلگە سالەم» اتتى كونتسەرت قويادى.
رەسپۋبليكا سارايىندا وتەتىن گالا-كونتسەرتتى اتالمىش وركەستر قۇرمانعازىنىڭ «سارىارقا» كۇيىمەن اشادى. وندا «شالقىما» حالىق ءبيى ءانسامبلى, ەسترادالىق بي ءانسامبلى, كلاسسيكالىق, فيلارمونيانىڭ ەسترادالىق ۆوكال جانە حالىق ءانى بولىمدەرى سوليستەرى ونەر كورسەتەدى. سونداي-اق, كەشكە سەكەن تۇرىسبەك, التىناي جوراباەۆا, تامارا اسار, مەدەت سالىقوۆ, كلارا تولەنباەۆا, الماس كىشكەنباەۆ, مارجان اراپباەۆا, تۇرسىنبەك قاباتوۆ, دوس, رينات مالتساگوۆ, «ارت دومبىرا» توبى, ت.ب. قاتىسادى.
تۇرسىنبەك قاباتوۆ «ءازىل الەمى» اتتى ساتيرا كەشىن دە وتكىزەدى. قايرات باەكەنوۆ پەن «فورمات» توبى اشىق اسپان استىندا كونتسەرت بەرەدى.
استانانىڭ الماتى قالاسىنداعى مادەني كۇندەرى 25 قىركۇيەككە دەيىن جالعاسادى.
