استاناداعى م.گوركي اتىنداعى مەملەكەتتىك اكادەميالىق ورىس دراما تەاترى مەرەيتويلىق 115-ءشى ماۋسىمىن سالتاناتتى شارامەن اياقتادى.
عاسىردان استام تاريحى بار تەاتردىڭ ەلوردا رۋحانياتىنداعى ورنى بولەك. مەرەيتويلىق ماۋسىم تەاتر ءۇشىن دە تابىستى كەزەڭ بولدى. جاڭا ماۋسىم بەلگىلى جازۋشى, دراماتۋرگ بولات جانداربەكوۆتىڭ «ساق پاتشايىمى – توميريس» اتتى سپەكتاكلىمەن اشىلعان ەدى. وعان مەملەكەتتىك حاتشى گۇلشارا ابدىقالىقوۆا قاتىسىپ, جوعارى باعا بەرگەن بولاتىن. ودان كەيىن دە ونەر ۇجىمى سانكت-پەتەربۋرگ قالاسى مەن الماتىدا وتكەن حالىقارالىق تەاتر فەستيۆالىنە قاتىسىپ, جۇلدەلى ورىنعا قول جەتكىزدى. ال تاياۋدا عانا باس قالادا بولعان «ساحنادان سالەم» اتتى IV تەاتر فەستيۆالىن دا شەتەلدەن كەلگەن ماماندار تەاتر ارتىستەرىنىڭ ونەرىن جوعارى باعالادى.
ء–بىزدىڭ ونەر ۇجىمى ەلىمىزدەگى تاريحى تەرەڭ تەاترلاردىڭ ءبىرى سانالادى. وسى مەرەيتويلىق ماۋسىمدى جاقسى جەتىستىكتەرمەن اياقتاپ وتىرمىز. ءتۇرلى حالىقارالىق تەاتر فەستيۆالدەرىنە قاتىستىق. ارىستەرىمىزدىڭ ونەرى جوعارى باعالاندى. ماسەلەن, توميريس ءرولىن سومداعان تالانتتى اكتريسا اناستاسيا ۆورونتسوۆا مادەنيەت سالاسىنداعى پرەزيدەنت ستيپەندياسىنىڭ يەگەرى اتاندى. جەتەكشى اكتەرىمىز رومان چەحونادسكي قازاقستاننىڭ ەڭبەك سىڭىرگەن قايراتكەرى بولدى. دەنيس اننيكوۆ «ەرەن ەڭبەگى ءۇشىن» مەدالىمەن ماراپاتتالدى. تاعى ءبىراز ونەرپازدار پاتەرمەن قامتاماسىز ەتىلدى. ءبىر جىل ىشىندە وسىنداي يگى جۇمىستار اتقارىلدى, – دەيدى اتالعان تەاتردىڭ ديرەكتورى, قازاقستاننىڭ ەڭبەك سىڭىرگەن قايراتكەرى ەركىن قاسەنوۆ.
سالتاناتتى شارادا تەاتر ارتىستەرى بۇرىن وسى ۇجىمدا ەڭبەك ەتىپ, ومىردەن وزعان تالانتتى تۇلعالاردى ەسكە الىپ, ولاردىڭ رۋحىنا تاعزىم ەتىپ, كورەرمەندەرگە ماۋسىمداعى ۇزدىك قويىلىمداردان ۇزىندىلەر كورسەتىپ, شۋاقتى سەزىم سىيلادى.
ازامات ەسەنجول
