مەرەكەدە 81 ءسابي دۇنيەگە كەلدى
1 جەلتوقسان – قر تۇڭعىش پرەزيدەنتى كۇنى استانا قالاسىنىڭ ءۇش پەريناتالدىق ورتالىعىندا 81 ءسابي دۇنيەگە كەلدى, ونىڭ 38-ءى – ۇل, 43-ءى – قىز. وسىناۋ كۇنى ەلوردادا ءومىر ەسىگىن اشقان العاشقى بالانىڭ ەسىمىن اتا-اناسى نۇرسۇلتان دەپ قويدى.
استانانىڭ ەڭ كىشكەنتاي تۇرعىندارىنا قۇرمەت كورسەتىلىپ, ولاردىڭ اتا-انالارىنا قالا اكىمىنىڭ اتىنان سىي-سياپات تاپسىرىلدى.
بۇل كۇنى تاۋلىكتىڭ ءبىرىنشى جارتىسىندا ەسىل اۋدانىنىڭ اكىمى ەرماعامبەت بولەكباەۆ پەن دەنساۋلىق ساقتاۋ باسقارماسىنىڭ باسشىسى كامالجان نادىروۆ جانە وليمپيادا چەمپيونى, قر پارلامەنتى ءماجىلىسىنىڭ دەپۋتاتى ولگا شيشيگينا, تەلەجۇرگىزۋشى ايسۇلۋ رىسپانوۆا №1 پەريناتالدىق ورتالىعىندا بولىپ, بوسانعان جاس انالاردى قۇتتىقتادى. اتالمىش ورتالىقتا وسى كۇنى تۇسكە دەيىن 11 ءسابي دۇنيەگە كەلسە, كۇن سوڭىنا دەيىن ومىرگە كەلگەن نارەستەلەردىڭ سانى 41-گە (17 ۇل, 24 قىز) جەتكەن.
ەلباسىنىڭ اتىن ەنشىلەگەن كىشكەنتاي نۇرسۇلتان وسى №1 پەريناتالدىق ورتالىقتا 30 قاراشادان 1 جەلتوقسانعا قاراعان ءتۇنى ساعات 00.30-دا تۋعان جاندوس ەرجانۇلى مەن نۇرگۇل ايتۋعاننىڭ تۇڭعىشتارى نۇرسۇلتاننىڭ تۋعان كەزدەگى سالماعى 3 كەلى 400 گرامم, بويى 54 سم
بولىپتى. ۇلدارىن مەملەكەت باسشىسى سياقتى ساليقالى ازامات بولىپ وسسە دەپ ىرىمدايتىندارىن ايتادى اتا-اناسى. ال تاڭەرتەڭگىلىك ساعات 7.45-تە تۋعان ءاليما – دارحان بەرىكۇلى مەن الميرا دۇيسەكەەۆانىڭ ءۇشىنشى بالاسى. قوس مەرەكەمەن قۇتتىقتاپ كەلگەن رەسمي تۇلعالارعا ورتالىقتاعى ءسابيلى بولعان اتا-انالار زور ريزاشىلىقتارىن ءبىلدىردى.
– بۇگىندە قالادا ءۇش پەريناتالدىق ورتالىق بار. ولاردىڭ بارلىعى جوعارى ماتەريالدى-تەحنيكالىق بازا مەن ءۇشىنشى دەڭگەيگە يە. اتالعان دەڭگەيگە يە پەرزەنتحانالار اۋىر جاعدايداعى جۇكتى ايەلگە وتا جاساپ, بوساندىرا الادى. جالپى, استانادا تاۋلىگىنە ورتا ەسەپپەن 70 بالا دۇنيەگە كەلەدى. ستاتيستيكاعا سۇيەنسەك, ەلوردادا جانە جالپى العاندا ەلىمىزدە جىل سايىن بالا تۋ كورسەتكىشى كوبەيىپ, ءولىم-ءجىتىم كورسەتكىشى ازايۋدا. ناقتى تسيفرلارعا سۇيەنەتىن بولساق, بيىل تۋعان سابيلەر سانى وتكەن جىلى تۋعانداردان 900 بالاعا ارتىق, – دەيدى دەنساۋلىق ساقتاۋ باسقارماسىنىڭ باسشىسى كامالجان نادىروۆ تىلشىلەرگە بەرگەن سۇحباتىندا.
نۇرداۋلەت كاكىشەۆ