ۇلتتىق مۋزەيدە ءداستۇرلى «مۋزەيدەگى ءتۇن» شاراسى ءوتىپ, وعان 37 مىڭنان استام ادام قاتىستى. بۇل كۇنى مۇراجايعا قاراي اعىلعان جۇرتشىلىق تاريحى تاسقا, شەجىرەسى قۇمعا سىڭگەن قاسيەتتى ولكەمىزدىڭ مادەني قۇندىلىعى قۇنتتاعان كەرەمەت كەشتىڭ كۋاسى بولدى.
شارانىڭ اشىلۋ سالتاناتىندا ءسوز العان ۇلتتىق مۋزەي ديرەكتورىنىڭ مىندەتىن اتقارۋشى اباي ساتۋبالدين: «بيىل ءۇشىنشى مارتە «مۋزەي ءتۇنى» ءوتىپ وتىر. العاشقى جىلى بۇل شاراعا كەلۋشىلەردىڭ سانى 23 مىڭدى قۇراسا, بىلتىر 30 مىڭداي ادام قۇرمەتتى قوناقتارىمىز بولدى. ال بيىل ودان دا كوبەيدى. مۇنداي شارالاردى وتكىزۋ ارقىلى حالىقتىڭ ءتول مادەنيەتىمىزگە دەگەن سۇيىسپەنشىلىگىن ارتتىرىپ, ۇلتتىق قۇندىلىقتارىمىزعا دەگەن قۇرمەتىن مولايتا الامىز» دەدى.
كەشكە كەلگەندەر تانىمدىق باعىتتاعى ءتۇرلى تاقىرىپتىق ەكسكۋرسيالاردى كورىپ, «اسىق اتۋ», «ارقان تارتىس», «قول كۇرەس», «توعىزقۇمالاق» سىندى سپورتتىق ويىندارعا قاتىستى. ءتىپتى, «قىمىزمۇرىندىق» راسىمىنەن كەرەمەت كورىنىستەر كورسەتىلگەندە, جۇرتشىلىق وزدەرىن العاشقى قىمىز ءىشۋ تويىندا جۇرگەندەي سەزىندى. قوناقجايلىقتى, جومارتتىق پەن مارتتىكتى, بىرلىكتى مەڭزەيتىن كورىنىستە العاشقى قىمىز ادامدارعا سالتاناتپەن ۇسىنىلىپ, «كوپكە بۇيىرسىن» دەگەن تىلەكپەن تاراتىلدى. اقتان اۋىز تيگەن اعايىن مۋزەي اتريۋمىندا زەرگەرلىك بۇيىمدار مەن كادەسىيلار ساتىلىمعا قويىلعان جارمەڭكەنى دە ۇلكەن قىزىعۋشىلىقپەن ارالادى.
بيىلعى مەرەكەنىڭ باستى جاڭالىعى, قازاق تاعامتانۋ اكادەمياسى ازىرلەگەن بيە سۇتىنەن دايىندالعان شوكولادتىڭ تانىستىرىلىمى بولدى. «وسىعان دەيىن بيە سۇتىنەن يوگۋرت, بالمۇزداق جاسالدى. بىراق جاڭا جاڭالىق بارىنەن مىقتى بوپ تۇر. شوكولادىمىزدىڭ قۇرامىندا قانت جوق. ءبىر قيىنى, بيە ءسۇتىن قايناتۋعا, تازارتۋعا بولمايدى. ونىڭ قۇنارى شيكى سۇتتە تازا ساقتالادى. سول بيە سۇتىندە بار قۇندى زاتتى ەش جەردەن الا المايمىز. ەڭبەكتەنىپ, جاڭا ءتاسىلدى پايدالانىپ, شوكولاد جاسالدى. ول قانت ديابەتى, قاتەرلى ىسىكتىڭ الدىن الادى» دەيدى اكادەميا توراعاسى تورەگەلدى شارمانوۆ.
«مۋزەيدەگى تۇنگە» گۇلنۇر ورازىمبەتوۆا, رينات مالتساگوۆ باستاعان استانالىق ونەر جۇلدىزدارى قاتىسىپ, ونەرلەرىن كورسەتتى. الەمدىك دەڭگەيدە اتالىپ وتەتىن بۇل اكتسيانىڭ ۇلتتىق مۋزەيدە دە ۇيىمداستىرىلۋى ءبىزدى ەرەكشە قۋانتتى دەيدى قوناقتار. تۇرعىنداردىڭ قىزىعۋشىلىعىن تۋدىرعان زالداردىڭ قاتارىندا التىن زالى مەن زاماناۋي ونەر زالى جانە استانا زالى بولدى.
«مۇراجاي – تەرەڭ تاريحتىڭ قويناۋىنا سۇڭگiتiپ, سول ارقىلى جان دۇنيەڭدi بايىتاتىن ورىن. ول – حالىقتىڭ وتكەنi جايلى كوپتەگەن مالiمەتتەرمەن جاستارىمىزدىڭ بويىنا رۋحاني ازىق بەرەدi. مۇراجايعا بالالارىمىزدى اكەلىپ, كوپپەن بىرگە تاماشالادىق. ۇلتتىق ويىندارىمىزعا دەگەن قىزىعۋشىلىقتىڭ باسىم ەكەنىنە كوزىمىز جەتىپ, كوڭىلىمىز بىرلەپ قالدى. ۇلتتىق قۇندىلىقتارىمىزدى كەيiنگi جاستارعا ناسيحاتتاۋ, ۇلگi-ونەگە ەتiپ كورسەتۋ – بارشانىڭ مiندەتi دەپ بiلەمiن» دەيدى حالىقارالىق دارەجەدەگى سپورت شەبەرى ماقسات شوتاەۆ.
تاريحىمىزدى جاڭعىرتىپ, ونەرىمىزدى دامىتۋعا ارنالعان وسىناۋ شارا ۇرپاعى امان, ۇلتى ازات قازىرگىدەي بەيبىت زاماندا ءدال وسىلاي تويلانسا قالاي ماقتانساق تا جاراسادى.
گۇلجان راحمان
