قازاقستان رەسپۋبليكاسى تۇڭعىش پرەزيدەنتى كۇنى مەرەكەسىمەن باستالاتىن جەلتوقسان ايىندا اتاۋلى كۇندەر دە, مەرەكەلەر دە جەتكىلىكتى. استانانىڭ ارقاعا كوشىپ كەلۋى دە, بارشامىزعا قاستەرلى تاۋەلسىزدىك كۇنى مەرەكەسى دە قىستىڭ وسى العاشقى ايىنا تيەسىلى. سوعان سايكەس حالىقتىڭ دەمالاتىن كۇندەرى كوپ. ماسەلەن, سەنبى-جەكسەنبى كۇندەرىن قوسقاندا, جەلتوقساندا ون ءۇش كۇن دەمالىس ەكەن. استانا قالاسى مادەنيەت جانە سپورت باسقارماسى بۇل ايعا جانە جالپى قىس ماۋسىمىنا اۋقىمدى باعدارلاما دايىنداپ قويدى.
1 جەلتوقساندا «ەنەرگيا حولى» كونتسەرت زالىندا تۇڭعىش پرەزيدەنت كۇنىنە ارنالعان «جاڭا ءداۋىر جارقىن بولاشاق» اتتى مەرەكەلىك كەش, ال استانانىڭ كوشكەن كۇنىنە وراي «استانا» كونتسەرت زالىندا «استانا ارمانى» كونتسەرتى وتەدى. 16 جەلتوقساندا قالالىق اكىمدىك الدىنداعى الاڭدا تاۋەلسىزدىك كۇنى قۇرمەتىنە ەلوردانىڭ جەتەكشى شىعارماشىلىق ۇجىمدارى جانە قازاقستاندىق ەسترادا انشىلەرىنىڭ قاتىسۋىمەن گالا-كونتسەرت ۇيىمداستىرىلادى.
سونداي-اق تاۋەلسىزدىك كۇنى مەرەكەسى قارساڭىندا, دالىرەك ايتقاندا 15 جەلتوقساندا «العاشقى قار» ءىس-شاراسىمەن شاڭعى تەبۋ ماۋسىمى اشىلادى. مادەنيەت جانە سپورت باسقارماسى باسشىسىنىڭ ورىنباسارى ناريما مۇحامبەتالينانىڭ ايتۋىنشا, بيىل مۇز قالاشىقتارى قالانىڭ ءۇش اۋماعىندا اشىلادى. ولار «حان شاتىر», استانا اكىمدىگى الدىندا جانە بوتانيكالىق باق اۋماعىندا ورنالاسادى. بۇل جەرلەردە ءار دەمالىس سايىن جارمەڭكەلەر, كونتسەرتتەر, تەاترلاندىرىلعان قويىلىمدار جانە وتباسىلىق-سپورتتىق «كوڭىلدى قىس» فورماتىنداعى قىزىقتى ويىندار ۇيىمداستىرىلادى.
بۇعان قوسا كونكي تەبۋدى, شانامەن سىرعاناۋدى جاقسى كورەتىندەر ءۇشىن سىرعاناقتار جانە مۇز توبەشىكتەرى سالىنادى. سونىڭ ىشىندە «شابىت» شىعارماشىلىق سارايىنىڭ الدىنداعى تاۋەلسىزدىك الاڭىندا قالاداعى ەڭ ۇلكەن مۇز ايدىنى اشىلادى. پرەزيدەنتتىك ساياباقتا بيىكتىگى 16 مەتر بولاتىن مۇز سىرعاناق پايدا بولادى. بوتانيكالىق باقتا, «مۇستافا كەمال اتاتۇرىك» ساياباعىندا جانە ەسىل وزەنىنىڭ جاعالاۋىندا ەلوردا تۇرعىندارى مەن قوناقتارى بۇعى جەككەن شانامەن قىدىرا الادى.
تۇرعىن الاپتارى تۇرعىندارى دا قىس قىزىعىنان تىس قالمايدى. مۇز ايدىندارى مەن سىرعاناق الاڭدارى «ۇركەر», «كوكتال-1», «كيرپيچنىي», «ءوندىرىس» تۇرعىن الابى, №10 ەمحانا اۋدانىندا, «جاعالاۋ» تۇرعىن-ءۇي كەشەنى جانە ن.تىلەنديەۆ داڭعىلى بويىنداعى «راحمەت» ساۋدا ءۇيى اۋماعىندا ورنالاسادى.
