مەرەكەلىك كوڭىل-كۇيدە ەلوردا
سامارقاننىڭ كوك تاسىن ەرىتكەن ۇلىستىڭ ۇلى كۇنى – ءاز-ناۋرىز مەرەكەسى جاقىنداپ قالدى. وسىعان وراي ەلوردادا بىرنەشە كۇن بويى اشىق اسپان استىندا دا, مادەني وشاقتاردا دا مەرەكەلىك شارالار وتەدى.
استانالىقتار مەن ەلوردا قوناقتارى 21-23 ناۋرىز كۇندەرى قالاداعى بىرنەشە الاڭدا ۇيىمداستىرىلاتىن شارالاردى قىزىقتاي الادى.
اتاپ ايتساق, 21 ناۋرىز كۇنى «سارىارقا» ۆەلوترەگىندە مەرەكەلىك كونتسەرت وتەدى. ال سول كۇننەن 23 ناۋرىزعا دەيىن «حان شاتىر» ساۋدا-ويىن- ساۋىق ورتالىعى ماڭىندا ەتنواۋىل قانات جايادى.
سونداي-اق, 21-22 ناۋرىز كۇندەرى «قازاق ەلى» مونۋمەنتىنىڭ الدىنداعى الاڭ مەن قالانىڭ ورتالىق الاڭىندا, «ستۋدەنتتەر» ساياباعىندا, 22 ناۋرىزدا «جاستار» تەاترىنىڭ اۋماعىندا كيىز ۇيلەر تىگىلىپ, التىباقاندار ورناتىلادى. بۇل جەرلەردە كونتسەرتتىك باعدارلامالار, سپورتتىق جارىستار ۇيىمداستىرىلىپ, ۇلتتىق تاعامدار ۇسىنىلادى.
قۋىرشاقتار تەاترى 18 ناۋرىز كۇنى كىشكەنتاي كورەرمەندەرگە ارناپ ا.سالاەۆانىڭ «ناۋرىز تۋرالى اڭىز» ەرتەگىسىن ۇسىنادى. كانيكۋل كەزدەرىندە دە «قاڭباق شال», «ناۋرىزبەكتىڭ حيكايالارى» ەرتەگىلەرىمەن بالدىرعانداردى قۋانتادى.
19 ناۋرىزدان باستاپ «استانا» كونتسەرت زالىنىڭ دالىزىندە «ناۋرىز-2017» كورمەسى ۇيىمداستىرىلادى. وسى جەردە 20 ناۋرىزدا قازاقستاننىڭ ەڭبەك ءسىڭىرگەن قايراتكەرى ازامات جىلتىركوزوۆتىڭ كونتسەرتىن تاماشالاي الاسىزدار.
ناۋرىزدىڭ 18-ىنەن 22-سىنە دەيىن كۇيگەنجار, ميچۋرينو, پرومىشلەننىي, ينتەرناتسيونالنىي, جەلەزنودوروجنىي, پريگورودنىي, ۇركەر, كوكتال-1, ءوندىرىس تۇرعىن الاپتارىندا دا ناۋرىز مەيرامىنا وراي حالىقتىق سەرۋەندەر وتەدى. ءبىر سوزبەن ايتقاندا, بىرنەشە كۇن دەمالاتىن جۇرتتىڭ مەرەكە كۇندەرى باراتىن جەرلەرى, كورەتىن قىزىقتارى كوپ بولماق.
امانعالي قالجانوۆ