وسىدان جەتى جىل بۇرىن 4 شىلدە كۇنى ەلوردا تۇرعىندارىنىڭ سانى ايتۋلى مەجەگە جەتىپ, استانا ميلليونەر-قالاعا اينالعان ەدى. ال ميلليونىنشى تۇرعىن اتانۋ باقىتى سايدا مۇحامەديار ەسىمدى كىشكەنتاي بۇلدىرشىنگە بۇيىردى.
ميلليونىنشى تۇرعىن اتانۋ باقىتى بۇيىرعان كىشكەنتاي سابيگە اتاسى مەن اجەسى سايدا دەپ ات قويعان. سايدا مۇحامەديار – ءبىرى قوستانايدان, ءبىرى پاۆلوداردان ارمان ارقالاپ استاناعا كەلىپ, تاعدىر توعىستىرعان ارايلىم مەن ولجاستىڭ تۇڭعىشى, ءارى اتا-اجەسىنىڭ دە تۇڭعىش نەمەرەسى. 2016 جىلى №1 پەريناتالدىق ورتالىقتا ساعات 01.00-دە دۇنيە ەسىگىن اشقان قىز سالماعى – 3150 گرامم, ال بويى 52 سانتيمەتر بولىپ تۋدى.
دەموگرافيالىق كورسەتكىشكە ەلەۋلى وزگەرىس اكەلگەنى ءۇشىن ءسابيدىڭ اتا-اناسىنا قالالىق اكىمدىك ەكى بولمەلى پاتەردىڭ كىلتىن تابىستاپ, وسىلايشا جاس وتباسى ۇلكەن شاتتىققا كەنەلگەن ەدى. نەسىبەسى تاسىپ تۋعان سايدا, مىنە, بيىل جەتى جاسقا تولماق. ول وسكەن سايىن قالا تۇرعىندارىنىڭ سانى دا قالماي ارتىپ كەلەدى. اناسى ارايلىمنىڭ ايتۋىنشا, قازاقتىڭ دارحان پەيىلى بۇل بالاعا دا دارىماي قالماعان سياقتى. ول ەشكىمدى جاتىرقامايدى, كەز كەلگەن جەردە اينالاسىنداعىلارمەن ويناپ, ءتاتتى قىلىقتارىمەن ءۇيىرىپ الا جونەلەدى. وزىندىك مىنەزى دە جوق ەمەس. قالاعان دۇنيەسىنە ۇمتىلسا, سوڭىنا دەيىن قول جەتكىزبەي قويمايدى.
«سايدا ەسىمى اراب تىلىنەن اۋدارعاندا «باقىتتى» نەمەسە «جولى بولعىش» دەگەن ماعىنانى بىلدىرەدى. قىزىمىز دۇنيەگە كەلگەندە, تۇڭعىشىمىز بولعان سوڭ با, قاتتى قۋاندىق. بۇل قۋانىشىمىز ۇزاققا سوزىلىپ, قالا اكىمدىگىنەن 2 بولمەلى پاتەر العاندا, شاڭىراعىمىزعا سابيمەن بىرگە شۋاق كىرگەندەي بولدى» دەيدى ولجاس مۇحامەديار.
جان-جاقتى قىز ءتۇرلى ۇيىرمەلەرگە بارعاندى ۇناتادى. كەيدە سايدا اياعىنىڭ ۇشىمەن ءجۇرىپ, بالەرينالار سەكىلدى بيلەيدى. ارمانى – مىڭ بۇرالعان ءبيشى اتانۋ. ول سپورتتان دا كەندە ەمەس. قازىردىڭ وزىندە «جاستار» كلۋبىنىڭ اتىنان تاەكۆوندودان ءوتىپ جۇرگەن قالالىق سايىستاردىڭ جۇلدەگەرى اتانىپ, اتا-اناسىن قۋانتىپ ءجۇر. جاسامپازدىق پەن شىعارماشىلىق ونەردىڭ بيىك دەڭگەيىندە سالىنىپ, بوي تۇزەپ كەلە جاتقان قالامىزدىڭ ميلليونىنشى تۇرعىنى كەيىن ميلليونداردى اۋزىنا قاراتقان ونەر يەسى بولار.
«جولداسىم ەكەۋمىز ستۋدەنت شاقتا تانىستىق. 4 جىل كەزدەسكەننەن كەيىن وتباسىن قۇردىق. بيىل ۇيلەنگەنىمىزگە 8 جىل تولدى. سايدانىڭ ءامينا, رامينا ەسىمدى ەكى ءسىڭلىسى بار. استانا تۇرعىنى بولعانىمىزعا جيىرما جىلداي بولدى» دەيدى ارايلىم.
بۇگىندە ولجاس ءوزىن-ءوزى جۇمىسپەن قامتىعان. ال ارايلىم دەكرەتتىك دەمالىستا. باقىتتى وتباسى بىرلىگىمەن كوپكە ۇلگى.
