بۇگىنگى كۇنى قالالىق №3 كوپبەيىندى قالالىق بالالار اۋرۋحاناسىندا «مەنينگيت» دياگنوزى بار 59 پاتسيەنت ەم الۋدا. ناۋقاستاردىڭ جاعدايى بىرقالىپتى, الاڭداۋعا نەگىز جوق, – دەپ مالىمدەدى نۇر-سۇلتان قالاسىنىڭ قوعامدىق دەنساۋلىق ساقتاۋ باسقارماسى رەسمي وكىلدەرى.
باسقارما باسشىسىنىڭ انا مەن بالانى قورعاۋ ماسەلەلەرى جونىندەگى ورىنباسارى ماعريپا ەمبەرگەنوۆا, قر دسم شتاتتان تىس باس انەستەزيولوگ-رەانيماتولوگى, استانا مەديتسينا ۋنيۆەرسيتەتىنىڭ بالالار انەستەزيولوگياسى جانە رەانيماتسياسى كافەدراسىنىڭ مەڭگەرۋشىسى, پروفەسسور نۇريلا مالتاباروۆا اۋرۋدىڭ بەلگىلەرى, ساقتانۋ جانە الدىن الۋ جولدارى جايىندا ارنايى وتكىزىلگەن بريفينگتە اڭگىمەلەپ بەردى.
باسقارما باسشىسىنىڭ ورىنباسارى بارلىق قالالىق ەمحانالاردا مەنينگيت اۋرۋىمەن اۋىراتىن ناۋقاستاردى دەر كەزىندە انىقتاۋ جانە مەديتسينالىق كومەك كورسەتۋدە, باس اۋرۋى بار بالالاردى تەكسەرىپ-قاراۋدى جۇرگىزەتىن پاتروناج قىزمەتى بەلسەندى جۇمىس ىستەپ جاتقانىن اتاپ ءوتتى.
– ەنتەروۆيرۋستىق ينفەكتسيالاردىڭ 85 پايىزعا جۋىعى سيمپتومسىز وتەدى. الايدا 3-10 جاستاعى بالالاردىڭ اعزاسىنا تۇسكەندە ۆيرۋس ءىزسىز كەتپەيدى. اۋرۋ جرۆي, سونداي-اق ءجىي سياقتى ءوتىپ, دەنە قىزۋىنىڭ ۇزاق مەرزىمگە كوتەرىلۋى وسى اۋرۋدىڭ بەلگىسى بولىپ تابىلادى. جۇقپالى اۋرۋلار ماۋسىمدىق بولىپ كەلەدى, جاز جانە كۇزدىڭ باستاپقى كەزەڭى ەنتەروۆيرۋستى ينفەكتسيانىڭ مەزگىلى بولىپ سانالادى. سول سەبەپتى الاڭداۋعا نەگىز جوق, – دەدى قر دسم شتاتتان تىس باس ينفەكتسيونيستى, استانا مەديتسينا ۋنيۆەرسيتەتىنىڭ بالالار جۇقپالى اۋرۋلارى كافەدراسىنىڭ مەڭگەرۋشىسى, مەديتسينا عىلىمدارىنىڭ دوكتورى, پروفەسسور دينارا باەشەۆا.
بالانىڭ باسى قاتتى اۋرىرىپ, بويىن السىزدىك جايلاپ, جۇرەگى اينىپ قۇسۋى, بۇلشىق ەتتەردىڭ سىرەسۋى وسى دەرتتىڭ بەلگىلەرىنەن ەكەن. مۇنداي جاعدايدا ەمحاناعا قارالىپ, كەرەك بولسا جەدەل جاردەم قىزمەتىنە جۇگىنگەن ءجون.
