«ومىرلىك قيىن جاعدايدا قالعان ادامداردى الەۋمەتكە قوسۋ ورتالىعى» كوممۋنالدىق مەملەكەتتىك مەكەمەسىندە ون جىلدان بەرى قىزمەت اتقارىپ كەلە جاتقان كادرلار ءبولىمىنىڭ اعا ينسپەكتورى اينۇر نۇرداۋلەتقىزى اركەنوۆا جايلى جازۋ كوپتەن بەرى مەنىڭ ويىمنان تۇسپەي جۇرگەن ەدى. تاياۋدا سونىڭ ءساتى ءتۇسىپ, كادرلار ءبولىمىنىڭ باسشىسىمەن اڭگىمەلەسۋدىڭ رەتى كەلدى.
انا ءتىلىنىڭ قادىر-قاسيەتىن بويىنا ءسىڭىرىپ وسكەن اينۇردىڭ مەكتەپ بىتىرگەن ساتتەگى ماماندىق تاڭداۋى دا كەزەك كۇتتىرمەدى. ول ە.ا. بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ «قازاق ءتىلى جانە ادەبيەتى» فاكۋلتەتىنە وقۋعا ءتۇسىپ, ونى 2007 جىلى ويداعىداي ءتامامدادى. وسى سالانىڭ مامانى بولۋىنا وراي, سول جىلى نۇرا اۋدانىنداعى اۋداندىق «نۇرا» گازەتىنىڭ مەنشىكتى ءتىلشىسى بولىپ قىزمەت ەتە باستايدى. تىلشىلىك قىزمەتىن وقۋمەن ۇشتاستىرا ءجۇرىپ, تالاپتى جاس «قازتۇتىنۋ وداعى» قاراعاندى ەكونوميكالىق ۋنيۆەرسيتەتىنىڭ زاڭ فاكۋلتەتىنە سىرتتاي وقۋعا ءتۇسىپ, ونى 2009 جىلى اياقتاپ, زاڭگەر ماماندىعىنا دا قول جەتكىزەدى.
نۇر-سۇلتان قالاسى اكىمدىگىنە قاراستى ورتالىققا الەۋمەتتىك قىزمەتكەر بولىپ ورنالاسادى. وسى تۇستا ونىڭ ومىرىندە وزگەرىستەر ورىن الىپ, اسىلبەك دەگەن ازاماتقا تۇرمىسقا شىعىپ, وتباسىن قۇرادى. دۇنيەگە كەلگەن ارايلىم ەسىمدى سۇيكىمدى قىزدارى ومىرلەرىنىڭ قۋانىشىنا اينالادى. اينۇر نۇرداۋلەتقىزى, بالا كۇتىمى بويىنشا دەمالىسقا شىعىپ كەلگەننەن كەيىن ورتالىقتاعى جۇمىسىن جالعاستىرا بەرەدى. ۋاقىت وتە كەلە, ياعني 2012 جىلدىڭ 19 قاراشاسىندا مەكەمە ديرەكتورىنىڭ الەۋمەتتىك ماسەلەلەر بويىنشا ورىنباسارى, ال 2013 جىلدىڭ 22 ساۋىرىنەن باستاپ كادرلار ءبولىمىنىڭ باسشىسى بولىپ تاعايىندالادى. ول ءوز مىندەتىنە كىرەتىن كادرلىق ءىس جۇرگىزۋ, جۇمىسقا قابىلداۋ, جۇمىستان بوساتۋ, قىسقارتۋ, اۋىستىرۋ جانە سول سياقتى باسقا دا اۋقىمدى جۇمىستاردى ءاردايىم ۋاقىتىندا جانە مۇقيات ورىنداۋعا دەن قويعان. سول سياقتى قوعامدىق جۇمىستارعا دا بەلسەنە ارالاسىپ, كوپتەگەن مەرەكەلىك شارالاردى ۇيىمداستىرۋعا بەلسەنە ات سالىسادى جانە ءوزى دە قاتىسادى. اتاپ ايتساق, تاياۋدا عانا ول قالا كۇنى مەرەكەسىنە وراي وتكەن مەرەكەلىك كونتسەرتتە اۋەزدى ءان ايتىپ, كوپشىلىكتىڭ قوشەمەتىنە بولەندى. سونىمەن قاتار اينۇر نۇرداۋلەتقىزى اركەنوۆا مەكەمەدەگى قازاق ءتىلىنىڭ ايتۋلى جاناشىرى.
«ارينە, ارمانسىز ادام بولمايدى. مىسالى, مەن الەۋمەتتىك سالانىڭ ءمينيسترى بولعىم كەلەدى, جالعىز قىزىما سەرىك بولاتىن ەر بالا تۋدى ارماندايمىن» دەيدى اينۇر نۇرداۋلەتقىزى كۇلىمسىرەپ.
…نەسى بار, ءبىلىمدى, ادال, مەيىرىمدى, اقىلدى زامانداسىمىزدىڭ اسقاق ارمانى ورىندالىپ جاتسا نۇر ۇستىنە نۇر بولارى حاق.
نۇربەك جاقانوۆ,
جۋرناليست
