16-18 ماۋسىم كۇندەرى «سەزىم ساپارى» اتتى سپەكتاكل-تۋرى اياسىندا استانادا ع.مۇسىرەپوۆ اتىنداعى مەملەكەتتىك اكادەميالىق بالالار مەن جاسوسپىرىمدەر تەاترىنىڭ گاسترولى وتەدى.
ونەر وشاعى وسى ءۇش كۇن بويى «جاستار» تەاترى ساحناسىندا كۇنىنە ەكى رەت قازاقستاننىڭ حالىق جازۋشىسى, مەملەكەتتىك سىيلىقتىڭ لاۋرەاتى ءازىلحان نۇرشايىقوۆتىڭ ايگىلى رومانى جەلىسىمەن «ماحاببات, قىزىق مول جىلدار» سپەكتاكلىن ۇسىنادى.
وسىدان تۋرا ەكى جىل بۇرىن پرەمەراسى وتكەن سپەكتاكلدىڭ قويۋشى رەجيسسەرى فارحاد مولداعالي قويىلىمدى زاماناۋي نۇسقادا ۇسىنىپ, وسى زامانعا جاقىنداتتى. بۇل, ءبىر جاعىنان, زامان اعىمىنان قالماۋدىڭ امالى بولسا, ەكىنشىدەن, قازىرگى جاستاردى قىزىقتىرۋ ءۇشىن جاسالدى. بىراق شىعارما ارقاۋى سول – ەربول مەن مەڭتايدىڭ ماحابباتى. جازىلعانىنا جارتى عاسىردان اسقان تۋىندى حح عاسىردا ەڭ وقىلىمدى شىعارمالاردىڭ ءبىرى بولدى. «ماحاببات قىزىق مول جىلدار» – ءححى عاسىردا دا سۇرانىسقا يە رومانداردىڭ ءبىرى. وعان «فوليانت» باسپاسىنىڭ كىتاپتى قايتا باسىپ شىعارۋى, تۋىندىنىڭ ەكراندالۋى دالەل. ال ساحنالىق قويىلىمدا تانىمال تەاتر جانە كينو ارتىستەرى دارحان سۇلەيمەنوۆ, گۇلباhرام بايبوسىنوۆا, ماقسات ءسابيتوۆ, ەردەن جاقسىبەكوۆ, تولقىن نۇربەكوۆا, ت.ب. اكتەرلەر كەيىپكەرلەردى سومدايدى. سپەكتاكل «جاستار» تەاترىندا ءار كۇن سايىن ساعات 14.00 جانە 18.30-دا باستالادى.
