مەملەكەت باسشىسى قاسىم-جومارت توقاەۆ اسا ۇزدىك جەتىستىكتەرى جانە قازاقستان رەسپۋبليكاسىنا سىڭىرگەن ايرىقشا ەڭبەگى ءۇشىن مۇعالىمگە جاڭادان تاعايىندالعان «قازاقستاننىڭ ەڭبەك سىڭىرگەن ۇستازى» قۇرمەتتى اتاعىن بەردى. جوعارى ماراپاتقا استانا قالاسىنداعى رايىمبەك باتىر اتىنداعى №50 «قازعارىش» مەكتەپ-ليتسەيىنىڭ مۇعالىمى ايگۇل ەرجانوۆا دا يە بولدى.
ايگۇل تۇرعامبايقىزى – مەكتەپتىڭ باستاۋىش سىنىپ پەداگوگى, زەرتتەۋشى-پەداگوگ, تاجىريبەلى مۇعالىم. ۇستازدىق ءوتىلى 28 جىلدان اسادى, اتالعان ۇجىمدا 10 جىلدان بەرى ەڭبەك ەتىپ كەلەدى. قالالىق, رەسپۋبليكالىق جارىستار مەن وليمپيادالاردىڭ جەڭىمپازى. ءىس-تاجىريبەسىن قالا, رەسپۋبليكا كولەمىندە تاراتىپ, رەسپۋبليكالىق فورۋمدا مودەراتور, سپيكەر بولعان پەداگوگ. سالاۋاتتى ءومىر سالتىن ۇستاناتىن ايگۇل تۇرعامبايقىزى شتانگا كوتەرۋمەن اينالىساتىن سپورتشى دا.
– جۋىردا پەداگوگتار اراسىندا وتەتىن بايقاۋعا قاتىسۋعا دايىندالىپ ءجۇر. بويى سەرگەكتىڭ ويى سەرگەك. ءتىپتى قىستا ايەلمىن دەمەي, مەكتەپ اۋلاسىنداعى قاردى دا تازالاپ, ناعىز ەڭبەك ادامىنىڭ ۇلگىسىن كورسەتىپ ءجۇر, – دەپ مەكتەپ ديرەكتورى جانار جۇمابەكوۆا ارىپتەسى تۋرالى تولعانا اڭگىمەلەدى.
بالاعا العاشقى ءبىلىمدى بەرەتىن مۇعالىمنىڭ ومىردە دە, جۇمىستا دا وسىلاي جيناقى ءجۇرۋى ءوز ناتيجەسىن بەردى, بيىك مارتەبەگە لايىقتى دەپ تانىلدى. سەبەبى باستاۋىش سىنىپ پەداگوگى عىلىم نەگىزىن وقىتاتىن ءپان مۇعالىمىنەن الدەقايدا ارتىق. ول ءبىلىم بەرۋ, جيناقتاۋ عانا ەمەس, بالانىڭ بۇكىل ومىرىنە باعىت بەرە الاتىنداي ءبىرتالاي ءبىلىم مەن داعدىنى يگەرۋى ءتيىس, شىعارماشىل, بەلسەندى, سونداي-اق بالالاردى جاقسى كورۋى كەرەك. بۇل قاسيەتتەردىڭ بارلىعى دا ايگۇل ەرجانوۆانىڭ بويىنان تابىلدى. مەكتەپ ۇجىمىنىڭ عانا ەمەس, ەلىمىزدىڭ ءبىلىم سالاسىنىڭ ماقتانىشى بولىپ وتىر. مۇعالىم ماماندىق بولسا, ۇستازدىق – ادام بويىنداعى ۇلى قاسيەت. ۇستاز مارتەبەسىنىڭ ارتۋى ەڭ الدىمەن ۇستاز دەگەن ەسىمگە قانشالىقتى لايىق بولۋىنا بايلانىستى. ماراپاتتاۋدان سوڭ اسەرىمەن ول بىزبەن بىلاي ءبولىستى.
– بۇل ماراپات, شىنىمدى ايتسام, كۇتپەگەن جەردەن توسىنسىي بولدى. توبەم كوككە جەتكەندەي سەزىنىپ تۇرمىن. مەملەكەت باسشىسىنىڭ مۇعالىمدەردىڭ مارتەبەسىن كوتەرۋى بىزگە كوپ مىندەت جۇكتەيدى, سەنىم ۇيالاتادى. مۇعالىمنىڭ قوعامداعى ورنى ايقىندالىپ, مارتەبەسى, شىن مانىندە, كوتەرىلدى. ءبىلىمىمىزدى جەتىلدىرىپ, ءارى قاراي ىزدەنۋگە زور مۇمكىندىك بەرىپ وتىرعانىن ايتۋىمىز قاجەت, – دەيدى قازاقستاننىڭ ەڭبەك سىڭىرگەن ۇستازى ايگۇل ەرجانوۆا.
مەكتەپ تۋرالى قىسقاشا ايتىپ وتسەك, وقۋ ورداسىنىڭ ىرگەتاسى 2004 جىلى قالانعان. 2012 جانە 2016 جىلدارى ءبىلىم وشاعى «ۇزدىك مەكتەپ» اتانىپ, استانا اكىمىنىڭ كۋبوگىنا يە بولدى. مەكتەپ نازارباەۆ زياتكەرلىك مەكتەپتەرىنىڭ تىرەك مەكتەبى رەتىندە قالاداعى ون ۇزدىك وقۋ ورداسى قاتارىندا. مۇندا 1926 وقۋشى ءبىلىم السا, 127 مۇعالىم ەڭبەك ەتەدى. ۇزدىك مۇعالىم – ول كەز كەلگەن ءبىلىم بەرۋ مەكەمەسىنىڭ تىرەگى. 3 مۇعالىم «قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى» مەدالىنىڭ, 3 ۇستاز «ىبىراي التىنسارين» توسبەلگىسىنىڭ جانە 1 مۇعالىم «ەرەن ەڭبەگى ءۇشىن» توسبەلگىسىنىڭ يەسى.
