مۇعالىم مەرەيى وسكەن كۇن
بەيبىتشىلىك جانە كەلىسىم سارايىندا ۇستازدار كۇنىنە ارنالعان سالتاناتتى شارا ءوتتى. وعان ەلوردا اكىمىنىڭ ورىنباسارى ەرمەك امانشاەۆ قاتىسىپ, استانا قالاسىنىڭ اكىمى اسەت يسەكەشەۆ اتىنان التى مۇعالىمگە پاتەر كىلتىن تابىس ەتتى. اسىرەسە, وسى ءبىر اتاۋلى كۇندى ۇستازدار قاۋىمى اسىعا كۇتەدى. ويتكەنى وندا قوعامنىڭ اۋىر جۇگىن ارقالاپ جۇرگەن ارداقتى ماماندىق يەلەرىنىڭ ەڭبەكتەرى سارالانىپ, ماراپاتقا قول جەتكىزەدى. قۇشاقتارى گۇلگە تولىپ, شاتتىققا بولەنەدى.
سالتاناتتى شارانىڭ شىمىلدىعىن استانا قالاسى اكىمىنىڭ ورىنباسارى ەرمەك امانشاەۆ اشىپ, ۇلاعاتتى ۇستازدىق تۋرالى تاعىلىمدى ءسوز سويلەدى.
– بۇگىن – ەرەكشە كۇن دەپ ايتۋعا بولادى. ويتكەنى الدىمىزدا – مۇعالىمدەر كۇنى. مۇعالىم بولۋ اركىمنىڭ قولىنان كەلە بەرمەيدى. بۇل ماماندىقتىڭ قۋانىشى مەن قيىندىعى قاتار جۇرەدى. سىزدەر وسى كاسىپكە بارلىق ومىرلەرىڭىزدى ارناپ, كەلەشەك ۇرپاقتى تاربيەلەپ, وقىتىپ كەلەسىزدەر. جىل سايىن استانالىق وقۋشىلار جوعارى جەتىستىكتەرگە قول جەتكىزۋدە. وسى ءۇشىن بارلىقتارىڭىزعا العىسىمدى بىلدىرەمىن, – دەدى ەرمەك ءامىرحانۇلى.
ماعىنالى جيىندا بىرنەشە اتالىم بويىنشا جەڭىمپازدار انىقتالدى. بيىلعى «جىل مۇعالىمى-2016» قالالىق بايقاۋىنىڭ باس جۇلدەسىن ەلوردالىق ۇستازدار اراسىنان ءوزىنىڭ بىلىگى مەن ءبىلىمىنىڭ ارقاسىندا توپ جارعان دارىندى بالالارعا ارنالعان №9 «زەردە» مەكتەبىنىڭ بيولوگيا ءپانى مۇعالىمى ءلازىم قاسىموۆا جەڭىپ الدى. ال مەكتەپكە دايارلىق ءبىلىم بەرۋ ۇيىمدارى اراسىنان №26 «ءۇمىت» بالاباقشاسى ۇزدىك اتاندى. مەكتەپتەر اراسىنان رايىمبەك باتىر اتىنداعى №50 «قازعارىش» مەكتەپ-ليتسەيىنىڭ تۋى جەلبىرەدى. «قوسىمشا ءبىلىم بەرەتىن ۇزدىك ۇيىم» اتالىمىندا م. وتەمىسوۆ اتىنداعى وقۋشىلار سارايىنىڭ باعى جاندى. استاناداعى كولىك جانە كوممۋنيكاتسيا كوللەدجى «تەحنيكالىق جانە كاسىپتىك ءبىلىم بەرۋدىڭ» نوميناتسياسىن يەلەندى. ارنايى مامانداندىرىلعان ۇيىمداردىڭ ىشىندە №3 پسيحولوگيالىق-مەديتسينالىق پەداگوگيكالىق كونسۋلتاتسيا ۇجىمى وزىق كەلسە, قالاداعى №17 مەكتەپ-گيمنازياسى «يننوۆاتسيالىق مەكتەپ» كوشباسشىسى بولدى.
ارينە, ماراپاتتان مۇعالىمدەر دە تىس قالعان جوق. استاناداعى №66 مەكتەپ-ليتسەيىنىڭ باستاۋىش سىنىپ مۇعالىمى مايا جۇبانىشقاليەۆا مەن ورىس ءتىلى جانە ادەبيەتىنىڭ ۇستازى قانيپا سابيتوۆاعا «قر ءبىلىم بەرۋ ءىسىنىڭ قۇرمەتتى قىزمەتكەرى» توسبەلگىسى بەرىلدى. سونداي-اق, تاعى ءبىر توپ مۇعالىمگە قر ءبىلىم جانە عىلىم مينيسترلىگىنىڭ العىس حاتى مەن ۇلى اعارتۋشى «ىبىراي التىنسارين» توسبەلگىسى تابىستالدى.
شارا سوڭى وتاندىق ونەر شەبەرلەرىنىڭ دۋماندى كونتسەرتىنە ۇلاستى.
ازامات ەسەنجول