سارسەنبى كۇنى ءماجىلىستىڭ جالپى وتىرىسىندا ءبىر توپ دەپۋتات ۇكىمەت باسشىسى باقىتجان ساعىنتاەۆتىڭ اتىنا ساۋال جولداپ, مۇعالىمدەردى ۇبت-نى ۇيىمداستىرۋ جۇمىسىنان بوساتۋدى سۇرادى.
حالىق قالاۋلىلارىنىڭ پىكىرىنشە, ءبىلىم جانە عىلىم مينيسترلىگى مۇعالىمدەردى ءىس جۇزىندە مىندەتتەلمەگەن جۇمىستارعا جەگىپ وتىر.
ۇبت-نىڭ قازىرگى فورماتىندا جوعارى وقۋ ورىندارىنا تۇسەر كەزدە ابيتۋريەنتتەردىڭ ءبىلىم ساپاسىن ەرىكتى باعالاۋدىڭ جاڭا ءتارتىبى ۇسىنىلعان. سوعان قاراماستان, ءوتىنىش بەرۋگە, قاجەتتى قۇجاتتاردى جيناۋعا, ونى ۇبت وتەتىن جەرگە تاپسىرۋعا, سونداي-اق ابيتۋريەنتتىڭ ەمتيحانعا كەلۋىنە مەكتەپ مۇعالىمدەرى جاۋاپتى. «15 ماۋسىمدا بارلىق مەكتەپتەردە قورىتىندى اتتەستاتتاۋ اياقتالادى, تۇلەكتەر اتتەستاتىن الادى. سول ساتتەن باستاپ ابيتۋريەنت ۇبت-عا قاتىسۋ ءۇشىن جيناعان قۇجاتتارىن مەكتەپتە ەمەس, ۇبت وتەتىن جەرگە اپارۋعا ءتيىستى. مۇعالىمدەر ەمتيحان تاپسىراتىن جەرگە ابيتۋريەنتتەردى ەرتىپ اپارۋعا مىندەتتى ەمەس» دەلىنگەن دەپۋتاتتىق ساۋالدا.
ماجىلىسشىلەر ءبىلىم جانە عىلىم ءمينيسترى ەرلان ساعاديەۆتىڭ مۇعالىمدەردى وزىنە مىندەتتەلمەگەن جۇمىستان بوساتۋ تۋرالى بىرنەشە رەت مالىمدەمە جاساعانىمەن, ءوز بۇيرىعىمەن وعان قارسى كەلەتىنىن جەتكىزدى. وسىعان وراي, ولار باقىتجان ساعىنتاەۆتان ماسەلەگە تىكەلەي ارالاسىپ, ۇلتتىق بىرىڭعاي تەستىلەۋ جانە كەشەندى تەستىلەۋدى وتكىزۋ ەرەجەلەرىنىڭ 1 تارماعىن الىپ تاستاۋدى ۇسىندى.
