مۇعالىمدەرگە دە جاتاقحانا بەرىلەدى
قالالىق ءبىلىم باسقارماسىندا مۇعالىمدەردى جاتاقحاناعا ورنالاستىرۋعا ارنايى قۇرىلعان كوميسسيانىڭ العاشقى وتىرىسى بولدى.
بۇگىندە شاھارداعى قوسشىعۇلوۆ كوشەسىنىڭ بويىنداعى №65 مەكتەپتىڭ اۋماعىنداعى جاتاقحانادان ەلوردالىق پەداگوگتارعا 250 ورىن ءبولىنىپ وتىر. بۇل عيمارات باستاپقىدا ستۋدەنتتەرگە ارناپ سالىنعان. ەندى وعان ۇستازدار قونىستانادى.
كوميسسيا وتىرىسىندا جاتاقحاناعا ورنالاساتىنداردى ىرىكتەۋ ماسەلەسى ءسوز بولدى. بۇل جەردە وتباسىلى, بالالى-شاعالى ۇستازدارعا ورىن بەرىلمەيدى.
ويتكەنى بولمەلەردىڭ شارشى مەترى سونشالىقتى كوپ ەمەس. ماسەلەن, ەكى ورىندىق بولمە 13 ش. م قۇراسا, ءۇش ورىندىق بولمە 19 ش. م قامتيدى. تاعى بۇعان تەك ۇيلەنبەگەن نەمەسە تۇرمىس قۇرماعان جالعىزباستى مۇعالىمدەر ورنالاسادى.
«ءبىز قازىر جاتاقحاناعا ورىن بەرۋ ءتارتىبى تۋرالى ەرەجەنى ازىرلەپ جاتىرمىز. ورىندار بەلگىلى ءبىر ولشەمدەر ارقىلى بولىنەدى. ماسەلەن, مۇگەدەكتىگى بار مۇعالىمدەرگە, اتا-اناسى جوق, جاس ۇستازدارعا, ەڭبەك ءوتىلى بار جانە وقۋ ورىندارىن قىزىل ديپلوممەن بىتىرگەن پەداگوگتارعا باسىمدىق بەرىپ وتىرمىز. ولاردى ارينە, اۋەلى مەكتەپ ىشىنەن قۇرىلعان كوميسسيا ساراپتايدى. وعان «نۇر وتان» پارتياسىنان, ۇكىمەتتىك ەمەس ۇيىمدارى مەن بۇقارالىق اقپارات قۇرالدارىنىڭ وكىلدەرى تارتىلعان. سودان كەيىن قۇجاتتار ءبىزدىڭ كوميسسياعا تۇسەدى. جاتاقحانا قۇنى قىمبات ەمەس, قولجەتىمدى. مۇعالىم وندا تۇرۋ ءۇشىن ءبىر جىل كەلىسىمشارتقا وتىرادى» دەدى ءبىلىم باسقارماسىنىڭ اكىمشىلىك-قۇقىقتىق ءبولىمىنىڭ باسشىسى جاڭىل قىلىشباەۆا.