وتكەن سەنبى كۇنى «الاۋ» مۇز ايدىندى سپورت سارايىنىڭ جاڭا ماۋسىمى اشىلدى. كونكي تەبۋگە قۇمارتقان استانالىقتار كۇنى بويى بوي سەرگىتىپ, دەنەلەرىن شىنىقتىردى.
«الاۋ» اكىمشىلىگى قالا تۇرعىندارى ءۇشىن تەك قانا جاپپاي سىرعاناۋ ۇيىمداستىرىپ قويماي, كوڭىل كۇي كوتەرەتىن ويىندار وتكىزىپ, بەلسەندى كونكيشىلەرگە سىيلىقتار دا بەردى. ەندى جازداي دەمالىستا بولعان قىسقى سپورت اۋەسقويلارى ءۇشىن «الاۋ» ەسىگى ايقارا اشىق بولماق. ول ءۇشىن ساراي اكىمشىلىگى تۇرعىندارعا قولايلى بولاتىنداي كەستە جاساپ قويعان. اركىم وزىنە ىڭعايلى ۋاقىتتا وتباسىمەن, دوستارىمەن نەمەسە ارىپتەستەرىمەن وسىندا كەلىپ دەمالۋعا نەمەسە سپورتپەن شۇعىلدانۋىنا مۇمكىندىك الاتىن بولادى. بۇل رەتتە, اسىرەسە, جاستاردىڭ مۇز ايدىنعا كوپ كەلەتىنى بەلگىلى بولىپ وتىر. بۇل دەگەنىمىز سالاۋاتتى ءومىر سالتىن ۇستاناتىندار قاتارى كوبەيىپ كەلە جاتقانىن بىلدىرسە كەرەك.
مۇز ايدىنىنىڭ ءبىر جاعىندا كونكيمەن جۇگىرۋشىلەر جۇرسە, ەكىنشى جاعىندا مانەرلەپ سىرعاناۋشىلار شەبەرلىگىن شىڭداي الادى.
«الاۋدىڭ» جاڭا ماۋسىمىنىڭ اشىلۋىنا جينالعان ادامدار شىن مانىندە كەرەمەت كوڭىل كۇيگە بولەندى دەسە بولادى, ويتكەنى مۇندا ەسترادا جۇلدىزدارى, بي انسامبلدەرى قاتىسقان شوۋ-باعدارلاما قويىلدى. سول دۋماننىڭ ىشىندە ەڭ قىزىعى, ارينە, سىيلىقتاردىڭ ويناتىلۋى بولدى. قىزىعى سول, سىيلىقتارعا جىل بويعى ابونەمەنتتەرمەن قوسا, «استانا» فۋتبول كومانداسى مەن «مانچەستەر يۋنايتەد» اراسىنداعى ماتچقا بيلەتتەر دە ۇسىنىلدى. سونىمەن قاتار كوپتەگەن كەلۋشىلەر وسىنداعى فيتنەس زالعا تەگىن كىرۋ مۇمكىندىگىنە يە بولدى.
تۇيىندەپ ايتقاندا, «الاۋ» مۇز ايدىنى قالا تۇرعىندارى ءۇشىن جاڭا جاپپاي سىرعاناۋ ماۋسىمىن اشتى. ولاي بولسا دەمالىس كۇندەرىڭىزدە مۇز ايدىنىندا كونكيمەن سىرعاناۋعا ۋاقىت تاۋىپ كورىڭىزدەر, وكىنبەيسىزدەر, دەنەڭىزدى سەرگىتىپ, قىزىققا كەنەلەسىزدەر!
