مۇزدى مۇنارا
جىلدان-جىلعا حالقى كوبەيگەن استانادا بۇقارالىق سپورتقا باسا كوڭىل بولىنگەن. بۇل ەلوردا اكىمدىگىنىڭ «20 ناقتى باستاما» جوباسىنىڭ ەڭ ءبىرىنشى قادامىندا دا ناقتىلاندى. جۇرتتىڭ دەنە شىنىقتىرۋعا دەن قويۋىنا باستايتىن ءىستىڭ باسى – سپورت ينفراقۇرىلىمدارىن دامىتۋ. مىسالى, شاھارداعى «الاۋ» مۇز ايدىنى سارايى ارقاسىندا كونكيمەن سىرعاناۋدى اۋەس كورەتىن تۇرعىنداردىڭ قاتارى كوبەيىپ كەلەدى.
التى جاسار «الاۋ»
اشىلعانىنا جاقىندا عانا التى جىل تولعان «الاۋ» بۇل كۇندە ەلوردالىقتاردىڭ قولدارى قالت ەتسە, جينالا قالاتىن قالاۋلى ورىنداردىڭ بىرىنە اينالدى. الەمدىك ستاندارتتارعا ساي جابدىقتالعان مۇز سارايىنىڭ بۇگىنگى تىنىس-ءتىرشىلىگى تۋرالى بىزگە اتالمىش سپورت كەشەنىنىڭ ديرەكتورى ساۋىرباي ەسجانوۆ ەگجەي-تەگجەيلى اڭگىمەلەپ بەردى.
– سوڭعى جىلدارى حالىق اراسىندا قىسقى سپورت تۇرلەرىنە دەگەن قىزىعۋشىلىقتىڭ ارتىپ كەلە جاتقانى بايقالادى. وعان, ارينە, ءبىزدىڭ مۇز سارايىنىڭ ىقپالى مول دەسەم, قاتەلەسپەيتىن شىعارمىن. بۇل ءسوزىمدى ناقتى دەرەكتەرمەن دە ايعاقتاي الامىن. ماسەلەن, وسىدان ءۇش-اق اي بۇرىن, جەلتوقسان ايىندا «الاۋدىڭ» التى جىلدىعىن اتاپ وتتىك. وسىناۋ جىلدار ارالىعىندا سپورت كەشەنىنە كەلۋشىلەردىڭ سانى جارتى ميلليوننان اسىپ كەتتى. ەڭ العاش كەشەن پايدالانۋعا بەرىلگەندە ءبىر ايدىڭ ىشىندە 7 543 ادام مۇز ايدىندا سىرعانادى. بۇدان كەيىن بۇل كورسەتكىش ەسەلەنە ءتۇستى. كەلەسى جىلى جالپى 42 201 ادام «الاۋعا» ات باسىن بۇرسا, ءبىر جىلدان كەيىن, دالىرەك ايتسام, 2013 جىلى 90 041 ادام كەلگەن. ال 2014 جىلى كەلۋشىلەر سانى, ءتىپتى, 151 441-گە جەتتى, – دەدى ساۋىرباي كولىبايۇلى.
سپورت كەشەنىن بۇقارالىق ورتاعا اينالدىرۋ ءۇشىن جەڭىلدىكتەر دە قاراستىرىلعان. «الاۋ» جەتى جاسقا دەيىنگى بالالاردى, كوپ بالالى وتباسى مەن بالالار ءۇيىنىڭ تاربيەلەنۋشىلەرىن جانە ءبىرىنشى, ەكىنشى توپتاعى مۇگەدەكتەردى تەگىن قابىلداۋعا ءاردايىم دايىن. سونداي-اق, زەينەتكەرلەر, ستۋدەنتتەر جانە ءۇشىنشى توپتاعى مۇگەدەكتەر 50 پايىزدىق جەڭىلدىكپەن مۇز ايدىنىنا باس سۇعا الادى.
سونىمەن قاتار, بىلتىر جالپى بيلەتتەردىڭ باعاسى 500 تەڭگەگە ارزانداتىلعان. بۇل كەلۋ-ءشىلەردىڭ كوبەيۋىنە ايتارلىقتاي اسەرىن تيگىزىپتى. دالىرەگى, ايدىنداعى اعايىننىڭ قاراسى 2000-3000 ادامعا ارتقان.
ورتالىق باسشىسىنىڭ ايتۋىنشا, قازىر مۇز سارايىنا قاي اۋداننىڭ تۇرعىندارى از كەلەتىنى انىقتالىپ, سول بويىنشا جۇمىستار جاسالىپ جاتىر ەكەن. جۇرگىزىلگەن ساراپتامالار ناتيجەسىندە كەلۋشىلەردىڭ 68 پايىزى ەسىل اۋدانىنىڭ تۇرعىندارى ەكەنى بەلگىلى بولدى. بۇل تۇرعىدا قالعان اۋدانداردىڭ جۇرتى بەلسەندى بولماي تۇر: الماتى اۋدانى – 12%, سارىارقا اۋدانى – 10%. ەندى وسى اۋدانداردىڭ تۇرعىندارىن كوپتەپ تارتۋ جاعى قولعا الىنىپ جاتىر. وعان قوسا, كەلۋشىلەردىڭ 2%-ىن قۇراعان شالعاي ايماقتاردىڭ حالقىنا دا ءمان بەرىلمەك.
«ەكسپو» كەزىندە مۇز ەرىتىلمەيدى
الاۋ – «جىلدام مۇز» دايىنداۋعا قاۋقارلى, زاماناۋي جوعارعى تەحنولوگيالىق قۇرال-جابدىقتارمەن جابدىقتالعان, الەمدىك دەڭگەيدەگى مۇز سارايى. بىرەگەي كەشەن – استاناداعى ءساۋلەتى كوز تارتارلىق عيماراتتاردىڭ ءبىرى. بيىلعى ايتۋلى «ەكسپو» كورمەسىنىڭ قارساڭىندا بۇل مۇز سارايىنىڭ ەسىگى قىسقى سپورتقا قىزىعۋشىلار ءۇشىن دە اشىق بولماق. ياعني, جازدىڭ اپتاپ ىستىعىندا دا «الاۋدىڭ» مۇزى ەرىتىلمەيدى. بۇل تۋرالى بىزگە ورتالىقتىڭ ديرەكتورى ساۋىرباي ەسجانوۆ مالىمدەدى.
حالىقارالىق كورمەگە وراي, وسى ماۋسىمدا مۇز ايدىندارى دا ەرەكشە بەدەرلەندى. جاپپاي سىرعاناۋعا ارنالعان نەگىزگى ايدىندا «ەكسپو» لوگوتيپى مەن ۇلتتىق ويۋ ورنەكتەر كورىنىس تاپتى. وسى ۋاقىتقا دەيىن بۇل ايدىندار تەك ءبىر ءتۇرلى ءورنەكپەن زەرلەنىپ كەلگەن.
ءبىزدىڭ ەلگە تاڭسىق بۇل مۇز توسەۋ تەحنولوگياسىن قازىر ءوزىمىزدىڭ قاراكوزدەرىمىز دە مەڭگەرىپ الىپتى. «الاۋ» العاش اشىلعاندا بۇل جۇمىس تەك گوللانديالىق ماماندارعا سەنىپ تاپسىرىلعان. كەلە-كەلە سولاردىڭ جاندارىندا قولعابىس بوپ ءجۇرگەن ءوزىمىزدىڭ ازاماتتار بۇل ءىستى ءبىرجولا وزدەرىنىڭ قولدارىنا العان. سولاردىڭ ءبىرى – ساعىندىق جولشىبەكوۆ ەسىمدى مامان.
– مەن وسىندا جۇمىس ىستەپ جۇرگەنىمە التى جىلدان استى. ياعني, «الاۋ» «الاۋ» بولعالى وسىندامىن. باسىندا مۇز ءتوسەۋدى گوللانديالىق ماماندارمەن بىرگە كومەكتەسە ءجۇرىپ اتقاراتىنبىز. قازىر بۇل شارۋاعا تولىعىمەن ءوزىمىز جاۋاپ بەرەمىز. جىل سايىن ءتاجىريبەمىز تولىسىپ, باسقا ايماقتاردان دا سۇرانىس بولىپ جاتىر. مىسالى, جاقىندا الماتى قالاسىندا وتكەن ۋنيۆەرسيادا كەزىندە ارنايى بارىپ قىزمەت ەتتىك. جالعىز ءبىز ەمەس, جان-جاقتان ءتۇرلى تىسقاققان ماماندار جينالدى. ارقايسىسىنىڭ ءوزىنىڭ مۇز قۇيۋ قۇپياسى بولادى, – دەدى ول.
سونىمەن قاتار, مۇندا جىلداعى ءداستۇر بويىنشا 1 مامىردان باستاپ جازعى ورتالىق جۇمىس ىستەيدى.
بالالاردىڭ تۇساۋى مۇز ايدىنىندا كەسىلەدى
دەمالىس كۇندەرىنە قوسا, مەرەكە كۇندەرى «الاۋ» مۇز سارايى ءتۇرلى ءىس-شارالاردى ۇيىمداستىرۋعا ۇيىتقى بولىپ ءجۇر. بۇل بۇقارانىڭ سپورتقا بەت بۇرۋىنا وڭ ىقپال ەتەتىنى ءسوزسىز. ەندى الداعى «ناۋرىز» مەيرامىن دا ەرەكشە اتاپ ءوتۋدى جوسپارلاپ وتىر.
ۇلىستىڭ ۇلى كۇنىنە ارنالعان قىزىقتى شارالار 17 ناۋرىزدان باستالادى. وسى كۇنى «الاۋدان» تابىلعاندار «دومبىرا Party» دۋمانىن تاماشالاپ, ۇلتتىق اسپاپتا ويناي السا, وزدەرىنىڭ ونەرىن دە تارتۋ ەتە الادى. سونىمەن قاتار, تانيۋشا ەسىمدى ءبۇلدىرشىننىڭ ەمدەلۋىنە قاجەت قاراجاتتى جيناۋ ءۇشىن قايىرىمدىلىق شاراسى وتكىزىلەدى.
جۇمىس كۇنى بولعاندىقتان, بۇل كۇنى جاپپاي سىرعاناۋ ءۇشىن ۇلكەن ايدىن كەشكى ساعات 19.00-دەن باستاپ كوپشىلىكتىڭ يگىلىگىنە جارايدى.
كەلەسى كۇنى «الاۋعا» ات باسىن بۇرعانداردىڭ اراسىندا كونكيمەن سىرعاناۋدان جارىس وتەدى. 100 مەتر قاشىقتىقتا جۇيرىك شىققاندارعا جاپپاي سىرعاناۋدىڭ بيلەتتەرى ۇلەستىرىلەدى. وعان قوسا, #Alauspring حەشتەگىمەن ينستاگرام ارقىلى مۇز ايدىنداعى ۇزدىك سۋرەتتەرگە بايگە جاريالانادى. بۇعان بەلسەندى اتسالىسقانداردىڭ فوتولارى LED-ەكرانداردان كورسەتىلەدى.
19 ناۋرىزدا «اسىق Party» اتتى اسىق اتۋدان جارىس ۇيىمداستىرىلادى. بۇل ويىندا كوپشىلىكپەن بىرگە, قاللەكي تەاترى مەن «جاستار» تەاترىنىڭ اكتەرلەرى باقتارىن سىناپ كورمەك.
ودان كەيىن ءۇش كۇن بويى سۋرەتشىلەر قاۋىمى ءوز تۋىندىلارىن ۇسىنادى. سونداي-اق, «قارا جورعا» ءبيىن بيلەۋدەن فلەشموب وتەدى.
ال 22 ناۋرىز كۇنى «سۆەتوچ» بالالار ءۇيى تاربيەلەنۋشىلەرىنىڭ «الاۋدا» تۇساۋى كەسىلەدى. بۇل راسىمگە جازۋشى, ىلەسپە اۋدارمانىڭ شەبەرى قامال ءالپەيىسوۆا قاتىسادى. كىشكەنتايلار العاشقى قادامدارىن مۇزدا باسىپ, كونكيمەن سىرعاناۋدى جايلاپ ۇيرەنە باستايدى. وعان قوسا, «قىز قۋ» ويىنى دا ۇيىمداستىرىلادى.
جالپى مەرەكەلىك شارالار 26 ناۋرىزعا دەيىن جالعاسىن تابادى. بەلسەندى تۇرعىندارعا «ناۋرىزناما» سىيلىقتارى تاراتىلادى. «الاۋدىڭ» ەسىگى كەلەم دەۋشىلەرگە ارقاشان ايقارا اشىق.
ورىنبەك وتەمۇرات