ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا داۋىلپاز اقىن, كورنەكتى قوعام قايراتكەرى ساكەن سەيفۋللين مۋزەيىنىڭ قۇرىلعانىنا وتىز جىل تولۋىنا ارنالعان ادەبي-مۋزىكالىق كەش ءوتتى.
ساكەننىڭ ءومىرى مەن شىعارماشىلىعى كەشەگى اقمولا, بۇگىنگى استانا تاريحىمەن جىمداسىپ ورىلگەن. وسىنداعى ءۇش سىنىپتىق قالالىق ۋچيليششەدە ءبىلىم الدى. ەلوردادان الىس ەمەس احمەت تورە اۋىلىندا بالالارعا ساباق بەردى. 1917 جىلى اقمولاعا كوشىپ كەلىپ, «جاس قازاق» ساياسي جانە الەۋمەتتىك-مادەني قوعامىن قۇردى. ايتا بەرسە, اقمولا توپىراعىندا ارقالى اقىننىڭ باسقان ىزدەرى تولىپ جاتىر. الايدا, قارا باسىنان تۋعان حالقىن بيىك قويعان قايراتكەر قىزىل يمپەريانىڭ قاقپانىنان قۇتىلمادى. 1938 جىلى جالعان جالامەن اتىلدى. 1957 جىلى جارى گۇلباھرامنىڭ وتىنىشىمەن اقتالدى. ارادا ءبىراز جىلدار وتكەن سوڭ, قازاق كسر مينيسترلەر كەڭەسىنىڭ جارلىعىمەن 1988 جىلى 21 اقپاندا اقمولادا ساكەن مۋزەيى اشىلدى. 1995 جىلى 17 تامىزدا ەلباسى اقمولاعا كەلگەن ساپارىندا, اقىن مۋزەيىنە سوعىپ, «اسىل بابامىز ساكەن سەيفۋلليننىڭ ارۋاعى تاۋەلسىز ەلىمىزدى جەلەپ-جەبەپ ءجۇرسىن» دەگەن تىلەگىن جازىپ قالدىرعان.
مىنە, سودان بەرى دە دوپتاي دومالاپ وتىز جىل ءوتتى. مۇراجايدىڭ العاشقى باسشىسى روزا اسىلبەكوۆا ارداقتى ازاماتتىڭ مۇراسىن جيناقتاۋدا كوپ ەڭبەك ءسىڭىردى.
كەش بارىسىندا مۋزەي ديرەكتورى, اقىن, مەملەكەتتىك سىيلىقتىڭ لاۋرەاتى نەسىپبەك ايتۇلى جينالعاندارعا قۇتتىقتاۋ لەبىزىن ءبىلدىردى. ۇجىمنىڭ ءبىرىنشى باسشىسى روزا اپاي پەن اقىن مۇراسىنىڭ جاناشىرى, قايراتكەر ورالباي ابدىكارىموۆكە قۇرمەت كورسەتتى. قاپاش قۇلىشەۆا, سەرىك وسپانوۆ, قانات ءجۇنىسوۆ, جانعالي ءجۇزباي سەكىلدى تانىمال ونەرپازدار اۋەلەتىپ ءان سالىپ, كۇمبىرلەتىپ كۇي توكتى. سونداي-اق, جاستار اقىننىڭ ولەڭدەرىن وقىپ, اندەرىن شىرقادى. ءسويتىپ, ساكەن مۋزەيىنىڭ مەرەيى ءبىر بيىككە كوتەرىلدى.
