جاستار مەن وقۋ ورىندارىنىڭ تۇلەكتەرى ءۇشىن جۇمىس ورىندارىنىڭ قولجەتىمدىلىگىن ارتتىرۋ جانە ولاردىڭ جۇمىسقا ورنالاسۋىنا جاردەمدەسۋ ماقساتىندا جۇمىسپەن قامتۋ جانە الەۋمەتتىك قورعاۋ باسقارماسى ينۆەستيتسيالار جانە كاسىپكەرلىكتى دامىتۋ, ءبىلىم جانە جاستار ساياساتى باسقارمالارى, سونداي-اق حالىقتى جۇمىسپەن قامتۋ ورتالىعىمەن بىرلەسىپ, جاستار مەن جوو, كوللەدج تۇلەكتەرى ءۇشىن بوس ورىندار جارمەڭكەسىن وتكىزدى.
جارمەڭكەگە جاس مامان ىزدەپ جۇرگەن 60-تان استام جۇمىس بەرۋشى مىڭعا جۋىق جۇمىس ورنىن ۇسىندى. بۇلاردىڭ دەنى – ونەركاسىپ, تۋريزم جانە ساۋدا سالاسىنداعى ءىرى بيزنەس كومپانيا وكىلدەرى.
«ءبىز جارمەڭكەگە ەكىنشى رەت قاتىسىپ وتىرمىز. مۇنداي ءىس-شارالار وتە قاجەت دەپ ايتا الامىن. ۇمىتكەرلەرمەن تىكەلەي قارىم-قاتىناس, سۇحباتتاسۋ ونىڭ دەڭگەيىن تۇسىنۋگە جانە ۇجىمنىڭ بولاشاق مامانى رەتىندە باعالاۋعا مۇمكىندىك بەرەدى. بۇل سۇحباتقا شاقىرۋدان گورى ءتيىمدى. جۇمىس ىزدەيتىندەر ءۇشىن, مەنىڭ ويىمشا, ءبىر جەردە بىرنەشە ساعات ىشىندە بىرنەشە جۇمىس بەرۋشىنى اينالىپ ءوتىپ, وزىنە ۇناعانىن تاڭداۋ وتە ىڭعايلى. قالاداعى مەكەمەلەردى ارالاۋعا ەكى-ءۇش اپتا جۇمساماي, جۇمىس بەرۋشىلەرمەن ءبىر جەردە جۇزدەسۋگە مۇمكىندىك بەرەدى. سونىمەن قاتار ءبىزدىڭ كومپانياعا «جاستار تاجىريبەسى» باعدارلاماسى وتە ۇنادى. ال بۇگىن بىزگە «ۇرپاقتار كەلىسىمشارتى» جانە «العاشقى جۇمىس ورنى» باعدارلامالارى ۇسىنىلادى. حالىقتى جۇمىسپەن قامتۋ ورتالىعى قىزمەتكەرگە 18 اي ىشىندە 30 اەك-كە دەيىن ءوزى تولەيدى. وسى ۋاقىت ىشىندە بىزدە جاڭادان كەلگەن قىزمەتكەردىڭ قۇزىرەتتىلىگىن تانۋعا مۇمكىندىك بار» دەپ ءتۇسىندىردى «قازاقتەلەكوم» كومپانياسىنىڭ وكىلى ءلاززات باەلوۆا.
مەنەدجمەنت جانە بيزنەس كوللەدجىنىڭ ستۋدەنتى شىڭعىس قاناتوۆ تا ءوز اسەرىمەن ءبولىستى.
«مەن بولاشاق باعدارلاماشىمىن, بيىل سوڭعى كۋرسقا كوشتىم. ماعان مىندەتتى تۇردە ديپلومالدى پراكتيكادان ءوتۋ كەرەك. ءوزىم سايتتار ارقىلى ورىن تابۋعا تىرىستىم, بىراق وكىنىشكە قاراي, كومپانيالار پراكتيكانتتاردى الىپ, ولاردى وقىتقىسى كەلمەيدى. بىراق ءبىز, جاستار, قايدا تاجىريبە جينايمىز؟ ويتكەنى تاعىلىمدامادان ءوتۋ پروبلەماسىنا تاپ بولعان مەن عانا ەمەس قوي. مۇنداي ماسەلە مەنىڭ بارلىق قۇرداستارىمدا بار. وسى بوس ورىندار جارمەڭكەسى سياقتى ءىس-شارالاردى ۇيىمداستىرعاندارعا راقمەت» دەدى ول.
ۇيىمداستىرۋشىلار جارمەڭكەنىڭ ماقساتى – جۇمىسسىز ازاماتتاردى, ءبىلىم بەرۋ ۇيىمدارىنىڭ تۇلەكتەرىن جانە جاستاردى جۇمىس بەرۋشى مەن جۇمىس ىزدەۋشى اراسىنداعى تىكەلەي بايلانىس ارقىلى جۇمىسقا ورنالاستىرۋ.
«جىل سوڭىنا دەيىن تاعى 10 جارمەڭكە وتكىزۋدى جوسپارلاپ وتىرمىز. ءىس-شارانىڭ نەگىزگى ماقساتى – جاستاردى جۇمىسقا ورنالاستىرۋ, ولاردىڭ الەۋەتىن اشۋ, كاسىبي داعدىلارىن دامىتۋ. بۇگىندە مۇندا 60-تان استام جۇمىس بەرۋشى – ءىرى بيزنەس وكىلدەرى, سونىڭ ىشىندە ونەركاسىپ, قۇرىلىس, تۋريزم جانە ساۋدا سالاسىندا جۇمىس ىستەيدى. مۇنداي ءىس-شارالارعا قاتىسۋ ءوزىنىڭ مانساپتىق جولىن باستاعان جاس ۇرپاق ءۇشىن ماڭىزدى, ويتكەنى ول قىزمەتتىڭ ەڭ قىزىقتى سالالارىن جانە قىزمەتكەر رەتىندە ءوزىنىڭ «قۇنىن» انىقتاۋعا كومەكتەسەدى. ىزدەنۋشىلەر وزدەرىنە ۇنايتىن كومپانيانى تاڭداپ, ەڭبەك نارىعىن باعدارلاي الادى» دەپ قورىتىندىلادى جارمەڭكە جۇمىسىن نۇر-سۇلتان قالاسى اكىمدىگى حالىقتى جۇمىسپەن قامتۋ ورتالىعىنىڭ ديرەكتورى ازامات بايتاسوۆ.
بوس ورىندار جارمەڭكەسى كومپانيالار ءۇشىن دە, ىزدەنۋشىلەر ءۇشىن دە اقىسىز نەگىزدە وتكىزىلدى.
