استاناداعى №1 قالالىق بالالار اۋرۋحاناسى – ەرتەدەن كەلە جاتقان ەلوردالىق مەكەمەلەردىڭ ءبىرى. 1950 جىلى نەگىزى قالانعان دەنساۋلىق ساقتاۋ ۇيىمى سوڭعى 20 جىل ىشىندە 100 مىڭعا جۋىق بالانى ەمدەپ شىعارعان. مەكەمە باسشىسىنىڭ ەمدەۋ-پروفيلاكتيكالىق جۇمىستار جونىندەگى ورىنباسارى سايران جامۋكوۆانىڭ ايتۋىنشا, ءبىر مەزگىلدە جۇزدەن اسا بالانى قابىلداي الاتىن ۇيىم سوڭعى التى اي ىشىندە 17 مىڭنان اسا سابيگە مەديتسينالىق قىزمەت كورسەتكەن.
اتالعان ۇيىم دارىگەرلەرىنىڭ كومەگىنە جۇگىنەتىن بالالار سانى كۇن ساناپ ارتىپ وتىر. سەبەبى قالا حالقىنىڭ كورسەتكىشى «رەكوردتىق» دەڭگەيگە جەتتى. وسىنداي اۋىر جۇكتەمەلەرگە قاراماستان, دارىگەرلەر ەلوردالىق بالالارعا دەنى ساۋ بولاشاق سىيلاپ, قولدان كەلەتىن شارالاردىڭ ءبارىن جاساۋدا.
«ءبىزدىڭ مەكەمەگە جۇگىنەتىندەر سانى جىل ساناپ ارتىپ كەلەدى. اۋرۋحانادا ماماندار جەتىسپەۋشىلىگى بار. بەس كۇن جۇمىس ىستەگەن دارىگەر تۇندە, سەنبى جانە جەكسەنبى كۇندەرى دە كەزەكشىلىككە شىعادى. وسىنداي جۇكتەمەسى كوپ جۇمىستارعا قاراماستان, ءبىزدىڭ ماماندار سىرقات بالالارعا جان-جاقتى كومەك كورسەتىپ, ەمدەپ جازادى. وسىنى ەرەكشە اتاپ وتكىم كەلەدى» دەيدى №1 قالالىق بالالار اۋرۋحاناسى باس دارىگەرىنىڭ ەمدەۋ-پروفيلاكتيكالىق جۇمىستار بويىنشا ورىنباسارى سايران جامۋكوۆا.
«بالالاردىڭ قورعانى» بولا بىلگەن مەكەمەنىڭ دارىگەرلەرى اللەرگيالىق, پۋلمونولوگيالىق, گەماتولوگيالىق, كارديورەۆماتولوگيالىق, گاستروەنتەرولوگيالىق اۋرۋى بار بالالارعا, سونداي-اق, جاڭا تۋعان سابيلەر مەن شالا تۋعان نارەستەلەرگە كومەك كورسەتەدى. مۇمكىندىگى شەكتەۋلى بالالارعا ەرەكشە كوڭىل بولەدى. بالالار نەۆرولوگياسى بولىمشەسى بازاسىندا رەابيليتاتسيالىق جۇمىستار جۇرگىزىلەدى.
دارىگەرلەر كۇندە وزگەرىپ جاتقان زامان تالاپتارىنان قالىپ قويماي, سىرقات بۇلدىرشىندەرگە بارىنشا ساپالى قىزمەت كورسەتۋ, دەرتىنە داۋا تابۋ ءۇشىن ۇنەمى بىلىكتىلىكتەرىن ارتتىرىپ وتىرادى. ولار رەسەي, لاتۆيا, بەلارۋس, جاپونيا, فينليانديا سياقتى ەلدەرگە بارىپ, تاجىريبە جيناقتاپ قايتقان ەكەن. سايران جامۋكوۆانىڭ ايتۋىنشا, مىقتى دارىگەر بولۋ ءۇشىن كەمىندە ون جىل جۇمىس ىستەپ, ءومىر بويى وقۋ كەرەك. ويتكەنى بالانىڭ دەنساۋلىعى ۇلتتىڭ بولاشاعىمەن بايلانىستى. دەنى ساۋ ۇرپاق قانا تىرەگى مىقتى مەملەكەتتىڭ نەگىزىن قالاي الادى.
«بالا دەنساۋلىعىن قورعاۋدا اتا-انا جاۋاپكەرشىلىگىنىڭ ماڭىزى زور. قازىر كوپتەگەن ايەلدەر ءتۇرلى ينفەكتسيامەن اۋىرادى. سونىڭ سالدارىنان بالالار ءتۇرلى اۋرۋلارعا شالدىعىپ دۇنيەگە كەلەدى. ول بىردەن بىلىنبەسە دە, ۋاقىت وتە كەلە ءوزىنىڭ زارداپتارىن بايقاتادى. سوندىقتان دا ايەلدەر جۇكتىلىك كەزەڭىن جوسپارلاۋى كەرەك. ويتكەنى دەنى ساۋ ايەل عانا دەنى ساۋ بالانى ومىرگە الىپ كەلە الادى. بالالاردى ۋاقىتىلى تەكسەرۋلەردەن وتكىزۋ, بالانىڭ ەمدەۋشى دارىگەرىمەن تىعىز قارىم-قاتىناس جاساۋ – بالا دەنساۋلىعىنىڭ ءبىر كەپىلى. سوندىقتان ءبىزدىڭ ۇجىم وسى باعىتتاردا دا كوپ جۇمىستار اتقارۋدا» دەيدى ول.
جالپى, استانا قالاسىنىڭ №1 قالالىق بالالار اۋرۋحاناسى حالىقارالىق دەڭگەيدە مويىندالعان مەكەمەلەردىڭ قاتارىنا كىرگەن. مەكەمە «بالا جۇرەگىنە جاقىن اۋرۋحانا» اتاعىنا, ءتۇرلى حالىقارالىق سەرتيفيكاتتارعا جانە بۇۇ يۋنيسەف بالالار قورىنىڭ «التىن تاقتاسىن» يەلەنگەن. مەكەمەدە 39 بىلىكتى دارىگەر قىزمەت ەتۋدە. ولاردىڭ ارقايسىسى وزىنە جۇكتەلگەن مىندەتتەردى ادال اتقارىپ شىعۋعا تىرىسىپ باعادى. سوندىقتان دا ۇيىم جۇيەسى مەن جۇمىسىندا ىلگەرىلەۋشىلىكتەر بايقالادى.
بۇگىندە مەكەمە دەنساۋلىق ساقتاۋ سالاسىنداعى بىرىڭعاي ۇلتتىق جۇيەنى ەنگىزۋدە. جاڭا تۋعان بالانى كۇتۋ جونىندەگى «Developmentae care» باعدارلاماسى مەن جاڭا تۋعان بالالارعا كورسەتىلەتىن باستاپقى رەانيماتسيالىق كومەكتى جەتىلدىرۋ ۇستىندە. ايتا كەتەيىك, مەكەمە جاڭا تۋعان نارەستەلەر مەن 15 جاسقا دەيىنگى بالالاردى ەمدەۋ ءىسىن جوعارى جاۋاپكەرشىلىكپەن اتقارىپ كەلەدى.
