جىل سايىن شىلدەنىڭ العاشقى جەكسەنبىسىنە ءدوپ كەلەتىن, ۇلتتىق اسپابىمىزدى ۇلىقتاۋعا ارنالعان دومبىرا كۇنى 2018 جىلدان بەرى ەلىمىزدە كەڭىنەن اتالىپ وتەدى. بيىل دا ەلوردادا ۇلتتىق دومبىرا كۇنىنە وراي بىرنەشە مادەني ءىس-شارا ءوتتى.
مەرەكە قارساڭىندا «Amanat» پارتياسىنىڭ جاستار قاناتى رەسپۋبليكالىق «Dombyra party» شاراسىن ۇيىمداستىردى. اكتسيا اياسىندا ەلىمىزدىڭ ءار ايماعىنداعى 2500-دەن استام دومبىراشى قازاق كۇيلەرىن ورىندادى. ال ەلوردادا «بايتەرەك» مونۋمەنتىنىڭ جانىندا «التىن دومبىرا» ونەر ورتالىعىنىڭ 200-دەن استام وقۋشىسى قۇلاق قۇرىشىن قاندىرار كۇيلەرمەن كورەرمەندى ريزا ەتتى. ونەرلى بۇلدىرشىندەر «ەركە سىلقىم», «اداي», «بالبىراۋىن», «اكە تولعاۋى» سياقتى شىعارمالاردى ورىندادى. ۇيىمداستىرۋشىلار كورەرمەندەرگە قىزىقتى سۇراقتار قويىپ, جەڭىمپازدارعا سىيلىق بەردى. سونداي-اق ونەر ورتالىعىنىڭ جەتەكشىسى يبراگيم ەسكەندىر جاس دومبىراشىلارمەن بىرگە «كوك تۋدىڭ جەلبىرەگەنى» كومپوزيتسياسىن ورىندادى.
ءىس-شارا بارىسىندا ۇيىمداستىرۋشىلار «قاسيەتتى دومبىرا» اتتى اۋقىمدى بايقاۋ باستالاتىنىن اتاپ ءوتتى.
– بۇل اكتسيا حالىق اراسىندا ۇلتتىق مادەنيەتىمىزدىڭ ءبىر بولىگى سانالاتىن كونە مۋزىكالىق اسپاپتى ناسيحاتتاۋعا باعىتتالعان. دومبىرا – ۇرپاقتان-ۇرپاققا بەرىلەتىن قازاق مادەني مۇراسىنىڭ اجىراماس بولىگى. وسى الاڭدى پايدالانا وتىرىپ, ءبىز «قاسيەتتى دومبىرا» رەسپۋبليكالىق بايقاۋىنىڭ باستالعانى تۋرالى جاريالايمىز, – دەدى پارتيانىڭ جاستار قاناتىنىڭ توراعاسى نۇرجان جەتپىسباەۆ.
بايقاۋ 10-15 جاس ارالىعىنداعى جاسوسپىرىمدەر مەن 16-35 جاس ارالىعىنداعى جاستار اراسىندا وتەدى. ول وتىنىمدەردى قابىلداۋ, وفلاين تىڭداۋ جانە فينال كەزەڭىنەن تۇرادى. وتىنىمدەر 31 شىلدەگە دەيىن قابىلدانادى.
تاۋەلسىزدىك الاڭىنداعى «قازاق ەلى» مونۋمەنتىنىڭ جانىندا «جاس دومبىرا» شوۋ-كونتسەرتى ءوتتى. كەشكە ايگۇل ۇلكەنباەۆا, نۇرجان تاجىكەنوۆ سىندى تانىمال كۇيشىلەرمەن قاتار, جۇبانىش جەكسەنۇلى, مارجان اراپباەۆا, ەربولات قۇدايبەرگەنوۆ, قۋاندىق راحىم, ارداق بالاجانوۆا جانە الىشەر كاريموۆ قاتىستى. كۇيشىلەر قۇرمانعازى, داۋلەتكەرەي, تاتتىمبەت پەن قازانعاپتىڭ شىعارمالارىمەن كورەرمەننىڭ قۇلاق قۇرىشىن قاندىرىپ, مەرەكەلىك كوڭىل كۇي سىيلادى.
– دومبىرا – اسىل قازىنامىزدىڭ ءبىرى. بۇل ءىس-شارانىڭ نەگىزگى ماقساتى – دومبىرانى ناسيحاتتاۋ. ەكى جىلدىق پاندەميا كەزىندە حالىق مۇنداي كونتسەرتتى ساعىندى. جالپى ەلىمىزدە ءتۇرلى دومبىرا مەكتەبى بار. سولاردى ءبىر-بىرىمەن ۇيلەستىرە وتىرىپ, جاڭا فورماتتا حالىققا جەتكىزگىمىز كەلدى, – دەدى قالالىق مادەنيەت باسقارماسى باسشىسىنىڭ ورىنباسارى جاڭاباي بەردىقۇلۇلى.
قازاقستان حالقى اسسامبلەياسى ۇلتتىق دومبىرا كۇنىنە وراي «بابالاردىڭ كوزىندەي قاسيەتتى دومبىرا» قايىرىمدىلىق شاراسىن وتكىزدى. جاڭا تۋعان وننان استام سابيگە دومبىرا سىيعا تارتىلدى. ءاربىر سىيلىق قازاقستان حالقى اسسامبلەياسىنىڭ قۇتتىقتاۋ سوزىمەن ساباقتاسىپ, ولارعا ەلىمىزدىڭ لايىقتى ازاماتى بولۋعا تىلەك ايتىلدى.
– بابالارىمىز ەجەلدەن دومبىرانى قازاقتىڭ جانىمەن پارا-پار دەپ كيە تۇتقان. سوندىقتان اقىن قادىر مىرزا ءالى «ناعىز قازاق قازاق ەمەس, ناعىز قازاق – دومبىرا» دەگەن ەدى. اسسامبلەيا جىل سايىن ءداستۇرلى تۇردە پەرزەنتحانالارعا بارىپ, دۇنيە ەسىگىن اشقان سابيلەردى مەرەكەمەن قۇتتىقتايدى. ءىس-شارانىڭ ماڭىزى – بالالاردى ۇلتجاندى, اسقاق رۋحتا تاربيەلەۋ, ۇلتتىق قۇندىلىقتاردى ناسيحاتتاۋ. بالالارعا دومبىرانىڭ قۇلاعىندا وينايتىن داۋلەسكەر كۇيشى بولسىن دەپ ىرىمداپ ۇلتتىق اسپابىمىزدى سىيعا تارتىپ, انالارعا گۇل شوعىمىزدى ۇسىندىق, – دەدى ەتنوسارالىق قاتىناستار جونىندەگى ءبولىم باسشىسى گۇلنار تايگوكوۆا.
پەرزەنتحاناداعى انالاردىڭ قۋانىشىن ەسەلەگەن قايىرىمدىلىق اكتسياسى قازاقتىڭ ۇلتتىق اسپابى – دومبىرانى دارىپتەۋگە باعىتتالعان. اكۋشەرلىك ءبولىم ديرەكتورىنىڭ ورىنباسارى شۇعىلا ەسەمباەۆانىڭ ايتۋىنشا, مەرەكەدە مۇنداي شارا ءجيى ءوتىپ تۇرادى.
– كۇن سايىن وسى ورتالىقتا 30-40 ءسابي دۇنيەگە كەلەدى. ال بۇگىن بۇل كۇن ەرەكشە اتاپ وتىلۋدە. سەبەبى ءدال دومبىرا كۇنى بوسانعان انالاردى قازاقستان حالقى اسسامبلەياسى وكىلدەرى ارنايى قۇتتىقتاپ كەلىپ جاتىر. تۇسكە دەيىن دۇنيەگە 13 ءسابي كەلدى. بارلىعىنا وسى سىيدى تابىستادىق, – دەدى شۇعىلا ەسەمباەۆا.
اكتسيا دومبىرانى دارىپتەۋگە باعىتتالعان. سونداي-اق بايىرعى ءداستۇردى جانداندىرۋعا ءارى ۇلتتىق كود ەرەكشەلىگىنە, اتا-بابالارىمىزدىڭ تاريحى مەن مادەنيەتىنە ارنالعان.
