كەشە رەسەي فەدەراتسياسىنىڭ قازاقستانداعى ەلشىلىگى ۇيىندە كەزىندە اۋعانستان سوعىسىنا قاتىسىپ ەرلىك تانىتقان قازاقستاندىق جاۋىنگەرلەرگە سالتاناتتى جاعدايدا ناگرادالار تاپسىرىلدى.
رف توتەنشە جانە وكىلەتتى ەلشىسى الەكسەي بوروداۆكين 1987 جانە 1989 جىلدارى كسرو جوعارعى كەڭەسىنىڭ پرەزيديۋمىنىڭ جارلىعىمەن جاۋىنگەرلىك ناگرادا بەرىلگەن, بىراق ءتۇرلى جاعدايلارعا بايلانىستى ارحيۆتاردا قالىپ قويعان مەدالدارىن ءوز يەلەرىنە تاپسىردى. اتاپ ايتقاندا, جانات ابدراحمانوۆ پەن قالىبەك بۋرالحيەۆكە «زا وتۆاگۋ» مەدالىن, ناعي ساليەۆكە «زا بوەۆىە زاسلۋگي» مەدالىن تابىس ەتتى.
كوپ جىلدان كەيىن ناگرادالارىنا قول جەتكىزىپ, تولقىپ تۇرعان جاۋىنگەر-ينتەرناتسيوناليستەردى قر قارۋلى كۇشتەرى باس شتابى باستىعىنىڭ ورىنباسارى, گەنەرال-مايور مۇحامەدجان تالاسوۆ, پارلامەنت دەپۋتاتى باقىتبەك سماعۇل جانە مايدانداس دوستارى دا قۇتتىقتاپ, جىلى لەبىزدەرىن ءبىلدىردى.
– جەرلەستەرىمىزدىڭ جاۋىنگەرلىك ناگرادالارىن ىزدەستىرۋگە, زاڭدىلىق نەگىزىن سايكەستەندىرۋگە كومەك كورسەتكەن رف قورعانىس مينيسترلىگىنە, تمد ۇكىمەت باسشىلارى جانىنداعى جاۋىنگەر-ينتەرناتسيوناليستەر ىستەرى جونىندەگى كوميتەتكە, سونداي-اق ناگرادا ىزدەستىرۋ اكتسياسىنا ماتەريالدىق قولداۋ بىلدىرگەن ءماجىلىس دەپۋتاتى باقىتبەك سماعۇلعا العىسىمىزدى بىلدىرەمىز. ءبىزدىڭ قوعامدىق بىرلەستىكتىڭ اتىنان اۋعانستاندا ەرلىك كورسەتكەن جەرلەستەرىمىزدى ناگرادالارىمەن قۇتتىقتايمىن. ەرلىك پەن ەلدىكتى قاستەرلەيتىن قازاقستان مەن رەسەي اراسىنداعى دوستىق ءارى ارىپتەستىك بايلانىسىمىز نىعايا بەرۋىنە تىلەكتەسپىز, – دەيدى «قر اۋعانستان جانە جەرگىلىكتى سوعىس ارداگەرلەرى وداعى» رەسپۋبليكالىق قوعامدىق بىرلەستىگىنىڭ توراعاسى ءشارىپباي وتەگەنوۆ.
فاريدا كاريموۆا
