كەشە ەلوردا اكىمدىگىندە وتكەن اپپارات وتىرىسى پارلامەنت ءماجىلىسىنىڭ كەزەكتەن تىس جانە استانا قالاسى ءماسليحاتىنىڭ كەزەكتى سايلاۋىنا, سونداي-اق, ناۋرىز مەيرامىنا دايىندىق ماسەلەلەرىنە ارنالدى.
جەكسەنبى, ياعني, 20 ناۋرىز كۇنى باس شاھاردا 213 داۋىس بەرۋ ۋچاسكەسى جۇمىس ىستەيدى. قالا باسشىسى ادىلبەك جاقسىبەكوۆ بۇل وقيعانىڭ ماڭىزدىلىعىن اتاپ ءوتىپ, اكىمدىكتىڭ بارلىق قىزمەتكەرلەرىنە ۇلكەن جاۋاپكەرشىلىك جۇكتەلەتىنىن تاعى دا ەسكەرتتى.
بۇگىنگە دەيىن 50 مىڭداي ەلوردالىق تۇرعىن ءوز سايلاۋ ۋچاسكەسىن انىقتاۋ ماقساتىندا استانا قالاسى اكىمدىگىنىڭ قىزمەتتەرىن پايدالانعان. وسى ورايدا ادامدارعا ىڭعايلى بولۋى ءۇشىن سايلاۋ ۋچاسكەسىن انىقتاۋدىڭ بىرنەشە جولى ۇسىنىلعان. ولارعا e.astana.kz ەلەكتروندى قىزمەتتەر ۆەب-پورتالى, اstana.gov.kz رەسمي سايتى, بايلانىس ورتالىعى, قوعامدىق ورىنداردا ورنالاسقان اقپاراتتىق دۇڭگىرشەكتەر, سونىمەن قاتار, 1414 نومىرىنە SMS-حابارلاما جولداۋ سەرۆيسى, «WhatsApp» جانە «Telegram» ءموبيلدى قوسىمشالارى جاتادى. مۇنداي يگىلىكتەردىڭ بارلىعى سايلاۋ كەزىندە ءار كىسىنىڭ ازاماتتىق قۇقىعىن جۇزەگە اسىرۋعا باعىتتالعان.
بيىل دەمالىس جانە مەرەكەلىك كۇندەر ناۋرىزدىڭ 19-ى مەن 23-ءى ارالىعىنا سايكەس كەلىپ تۇر. سوندىقتان ەلوردالىقتاردىڭ دەمالىسىنا جانە قوعامدىق قاۋىپسىزدىككە باسا نازار اۋدارىلادى. قالادا ناۋرىز مەيرامى 14 جەردە تويلانادى. نەگىزگى شارا 21 ناۋرىزدا «سارىارقا» رەسپۋبليكالىق ۆەلوترەگىندە ۇيىمداستىرىلادى. سونداي-اق, «استانا ارەنا» ستاديونىنىڭ الدىنداعى الاڭدا حالىقتىق سەرۋەن ءوتىپ, ەتنواۋىل اشىلادى. اتالعان مەيرامعا ورايلاستىرىلعان شارالار «قازاق ەلى» جانە «بايتەرەك» مونۋمەنتتەرىنىڭ جانىندا, قالالىق الاڭدا, «ستۋدەنتتىك» جانە «جەرۇيىق» ساياباقتارىندا دا وتەدى. مەرەكەلىك باعدارلاما اياسىندا كونتسەرت قويىلىپ, كيىز ءۇي تىگىلىپ, التىباقان ورناتىلادى, قوناقتارعا ۇلتتىق تاعامدار ۇسىنىلادى.
«باعدارلاما قانىق ءارى قىزىقتى بولۋى ءتيىس, ءار ادام ءوزىنىڭ بۇل ىسكە ورتاقتاس ەكەندىگىن سەزىنۋى كەرەك. بۇل رەتتە بارلىق قالالىق قىزمەتتەر كۇشەيتىلگەن رەجيمدە جۇمىس ىستەۋى قاجەت» دەدى ەلوردا اكىمى. جالپى, ناۋرىز مەيرامى قارساڭىندا استانادا 70-تەن اسا شارا وتكىزۋ جوسپارلانعان.
مۇنىمەن قوسا, جيىن بارىسىندا جول توسەمىنىڭ ساپاسى دا تالقىلاندى. اۆتوموبيل جولدارى باسقارماسىنىڭ باسشىلىعىنا ءاربىر مەردىگەر بويىنشا تالداۋ جۇرگىزۋ تاپسىرىلدى. ال جۇمىسىن ساپاسىز ورىنداعاندار قالالىق جولداردى سالۋ مەن جوندەۋگە بۇدان بىلاي جىبەرىلمەيتىن بولادى. ارينە, كليماتتىق جاعدايلارعا بايلانىستى ورىندى سەبەپتەر دە بولۋى مۇمكىن. مىسالى, بيىل قىستا اۋا تەمپەراتۋراسى كۇرت وزگەرىپ وتىردى. دەگەنمەن, جولدار – قالانى اباتتاندىرۋ ماسەلەسىنىڭ اسا ماڭىزدى بولىگى.
«ءبارىن قولعا الۋ كەرەك. اعىمداعى جىلعا جوسپارلانعان ۇزىندىعى 14 شاقىرىمدى قۇرايتىن 11 كوشەنى جوندەۋ جەتكىلىكسىز. جول جوندەۋ جۇمىستارىن باسىم تارتىپتە قارجىلاندىرۋ كەرەك» دەدى ادىلبەك جاقسىبەكوۆ.
اۋدان اكىمدەرىنە دە كوشەلەردى ارالاپ, قالپىنا كەلتىرۋدى قاجەت ەتەتىن تۇستارىن انىقتاۋ مىندەتتەلدى. جوندەۋ-قالپىنا كەلتىرۋ جۇمىستارى ناۋرىز ايىنىڭ سوڭىندا باستالۋى كەرەك.
ماتەريالدى “استانا اقشامى” گازەتىنىڭ astana-akshamy.kz رەسمي سايتىنا سىلتەمە جاساعاندا عانا پايدالانۋعا رۇقسات ەتىلەدى.
