بالام اياق استىنان اۋىرىپ, اعىل-تەگىل قۇسقان سوڭ, دارىگەردىڭ كەڭەسى بويىنشا جەدەل جاردەم شاقىردىق. بىراق جەدەل جاردەم بىزگە باياۋ قىزمەت كورسەتتى. 1 ساعات 20 مينۋت كەشىگىپ كەلگەنىن بىلاي قويعاندا, اۋرۋحاناعا اپارار جولدا دا اقىرىن ءجۇرىپ, بۇكىل باعدارشامعا توقتاپ 21:23 ساعاتتا شاقىرعان جەدەل جاردەممەن ساعات 23:23-تە قالالىق №3 كوپبەيندى بالالار اۋرۋحاناسىنا ازەر جەتتىك. ول ازداي, قارايتىن دارىگەردىڭ قابىلداۋىن كۇتىپ تاعى جارتى ساعاتتان ارتىق وتىردىق. قايتا-قايتا قۇسقان بالا ءۇستى-باسىمدى مالمانداي قىپ قۇسىققا شىلاپ تاستادى.
سودان نە كەرەك, ساراپتامالارىن الىپ, پالاتاعا جاتقانشا بىرەر ساعات ءوتتى. ناۋقاستىڭ كوپتىگىنەن اۋرۋحانادا جاتار ورىن دا قالماعان ەكەن, دارىگەرلەر ءبىزدى وزدەرى جاتىپ جۇرگەن كابينەتكە تۇنەتتى. سول جەردە 4 قۇتى سۇيىقتىق اكەلىپ, سيستەما سالدى. «قۋاتتاندىراتىن, بالا دەنەسىنىڭ سۋسىزدانۋىنىڭ الدىن الاتىن سۇيىقتىق» دەپ ءتۇسىندىردى. 8 ساعاتتا ازەر تاۋسىلعان سول سيستەمادان كەيىن بالام اۋناپ تۇرعانداي جازىلدى دا كەتتى. بىراق سول كۇننەن باستاپ بالاما ەشقانداي ەم قولدانباي, 3 كۇن جاتقىزىپ قويدى. قايناعان سۋ ءىشىپ, ەمحانانىڭ بوتقاسىن جەپ ءۇش كۇن جاتتىق. نە ىستەپ جاتىرمىز؟ ەندى ەم جاساماساڭىزدار ءبىز ۇيىمىزگە قايتايىق دەسەك, «اناليز شىققان جوق» دەپ جىبەرمەيدى. بالانىڭ قۇيرىعىنان الاتىن د گرۋپپانىڭ (پاتولوگيالىق فيلورانىڭ) ساراپتاماسى 4 كۇندە شىعادى دەيدى دارىگەرلەر. ول ءاناليزدىڭ ءوزىن قابىلداعان دارىگەرلەر ءبىر رەت, جاتقان پالاتامىز ءبىر رەت الدى. «2 رەت الىپ نە كەرەك, بىرەۋى دە جەتپەي مە؟» دەسەم, «جوق, بىزدە ءتارتىپ سولاي» دەيدى. دەمەك, ءبىر اناليزگە ەكى رەت اقشا تولەنەدى دەگەن ءسوز بۇل. بۇل جاعداي ءبىزدى ءبىراز ويعا سالدى.
ەلىمىزدىڭ باس قالاسىندا ادەتتەگى ءبىر اناليز 4 كۇندە شىقسا, باسقا ايماق, اۋىلداردا قانشا كۇندە شىعادى؟ ول شىقپاي ەشقانداي ەم جاساماسا, بالانىڭ سىرقاتى اسقىنىپ كەتپەي مە؟ نەمەسە جۇقپالى ۆيرۋس بولسا, 4 كۇنگە دەيىن توڭىرەگىندەگى بالالارعا جۇقتىرماي ما؟ ساراپتاما دۇرىس شىقپاسا, 4 كۇننەن كەيىن جاسالعان ەم كەش بولماي ما؟ ادام ەمدەۋدەگى ەڭ نەگىزگى ەكى ءتۇيىن دۇرىس اناليز قويۋ مەن ۋاقىت ەمەس پە؟! دارىگەرلەر مۇنى بىزدەن جاقسى بىلەدى, بىلە تۇرىپ ىستەپ جۇرگەندەرى اناۋ. بۇل جەردە ناۋقاستاردىڭ ۋاقىتىمەن قاتار, قانشاما قاراجات كەتىپ جاتىر؟! تەگىن ەمدەۋ دەگەنمەن, ونىڭ دا سۇراۋى بار عوي.
مەن وسى ماسەلەنى Facebook الەۋمەتتىك جەلىسىنە سالىپ ەدىم, جەلى قولدانۋشىلار «قازىر ەمحانادان گورى جەكە دوعدىرلار جاقسى عوي. ءبارى تەز», «استانادا دارىگەرگە كورىنگەنشە جازىلىپ كەتەسىڭ, وتكەندە مەن 5 كۇن بارىپ دارىگەرگە قارالا الماي, 6-كۇنى تاڭەرتەڭ كەزەگىم كەلىپ بارايىن دەسەم جازىلىپ كەتىپپىن», «اۋىرىپ بولنيتساعا بارساڭ, ءاناليزدىڭ ناتيجەسى شىققانشا اۋرۋىڭ دا جازىلىپ بولادى, ءارى-بەرى سارساڭعا ءتۇسىپ دىڭكەڭ قۇرىپ بىتەدى» دەگەن مازمۇنداعى پىكىردى قاراشا بوراتتى. مىنە, بۇل دا ءبىزدىڭ ەمدەۋ سالاسىنداعى ماسەلەنىڭ ءبىر كورىنىسى ەكەنىندە تالاس جوق.
