قۇربان ايت كۇنى جاسالاتىن ەڭ ۇلكەن قۇلشىلىقتاردىڭ ءبىرى – قۇربان شالۋ. قۇربان شالۋ دەگەنىمىز – قۇربان ايت نامازى وقىلعاننان كەيىن اللا ءۇشىن قۇرباندىققا مال سويۋ ءراسىمى. قۇربان شالاتىن كەزدەگى نيەت – قۇرباندىقتىڭ نەگىزگى شارتى. عالىمدار: «نيەت دۇرىس بولماسا قۇرباندىق جارامسىز بولادى, ويتكەنى مال تەك ەت ءۇشىن ەمەس, اللاعا جاقىنداۋ ءۇشىن عانا باۋىزدالعان بولۋى ءتيىس» دەيدى.
حانافي مازحابىندا قۇربان شالۋ – مۇمكىندىگى بار ءار ادام ءۇشىن مىندەتتى عيباداتتىڭ ءتۇرى. اللا تاعالا قۇران كارىمدە «كاۋسار» سۇرەسىندە: «راببىڭ ءۇشىن ناماز وقى جانە قۇربان شال» دەپ ءامىر ەتتى.
ال قۇرباندىققا شالىناتىن مالدىڭ جاسىنا كەلسەك, ءىرى قارا مەن ۇساق مالدىڭ جاسى ۇقسامايدى.
– تۇيەنىڭ جاسى – بەستەن;
– سيىر-بۇقانىڭ جاسى – ەكى جاستان;
– قوي-ەشكىنىڭ جاسى ءبىر جاستان باستالادى. ەگەر قوي-قوشقار ءىرى بولسا, وندا ءبىر جاسقا تولماعانىن دا شالا بەرۋگە رۇقسات ەتتى. بىراق التى ايدان اسقان مال بولعانى ابزال.
قۇرباندى قاي ۋاقىتتا شالۋ كەرەك؟ ايتتىڭ الدىندا ءبىر كۇن بۇرىن نەمەسە ايت نامازىنا دەيىن شالىنعان قۇرباندىق قابىل بولا ما؟
قۇربان شالۋدىڭ بەلگىلەنگەن ۋاقىتى بار. ول قۇربان ايت كۇنى ايت نامازى مەن ايت قۇتپاسى وقىلىپ بولعان سوڭ باستالادى. قۇربان شالۋدى ايت نامازىنا دەيىن نەمەسە ءبىر كۇن بۇرىن ورىنداعاننىڭ قۇرباندىعى جارامسىز بولادى. دەمەك, قۇربان شالۋ ءراسىمىن ايت نامازى اياقتالعاننان باستاپ, ءتورتىنشى كۇننىڭ اسىر نامازىنا دەيىن ورىنداۋعا بولادى.
پايعامبارىمىز (وعان اللانىڭ يگىلىگى مەن سالەمى بولسىن): «قۇرباندىق رەتىندە ءتورت ءتۇرلى مالدى شالۋعا بولمايدى: اقاۋى ايقىن ءبىر كوزدى مالدى; اۋرۋى ايقىن اۋرۋ مالدى; اقساقتىعى ايقىن اقساق مالدى جانە السىزدىگى ايقىن ارىق مالدى» دەگەن. جاعدايى بار, قۇربان شالۋى مىندەتتى بولعان كىسىنىڭ قۇرباندىق مالىندا اتالعان كەمشىلىكتەردىڭ بىرەۋى ساتىپ العاننان كەيىن پايدا بولسا نەمەسە العان مالى ءولىپ قالسا, قايتادان قۇرباندىققا جارايتىن مال ساتىپ الىپ شالۋى كەرەك. ال وزىنە قۇربان شالۋ مىندەتتى بولماعان (جاعدايى كەلمەيتىن), بىراق ساۋاپ ءۇشىن شالۋدى نيەت ەتكەن كەدەي ادامنىڭ ساتىپ العان قۇربانىندا ءبىر كەمشىلىك پايدا بولسا, سول مالدى شالا بەرەدى. ويتكەنى كەدەي ادامنىڭ شالعان قۇرباندىعى – ءناپىل (مىندەتتى بولماعان) قۇرباندىق. ءناپىل عيباداتتا كەشىرىم بار.
ال ءبىر مالدى قانشا ادام بىرىگىپ شالا الادى دەگەن ماسەلەگە كەلسەك, سيىر مەن تۇيەنى جەتى ادام بىرىگىپ شالۋعا بولادى. قوي مەن ەشكى تەك ءبىر ادام اتىنان شالىنادى, ويتكەنى قوي مەن ەشكىنى بىرنەشە ادام بىرىگىپ شالدى دەگەن ەشقانداي نۇسقاۋ جوق. عۇلامالاردىڭ نۇسقاۋى بويىنشا قۇرباندىقتىڭ ەتىن ۇشكە بولگەن ءجون. ونىڭ ءبىر بولىگىن وزىڭىزگە الىپ قالىڭىز, ەكىنشى بولىگىن اعايىن-تۋىس كورشى-قولاڭعا اسىڭىز. ال ءۇشىنشى بولىگىن كەم-كەتىك, جەتىم-عارىپتەرگە, مۇقتاجدارعا ۇلەستىرگەن ابزال.
